МАШРАБОНА

Телба-телба изладим, гирён-гирён изладим,
Ўзим танда турдиму, руҳим ҳар ён изладим,
Бирор бандаси билмас, айтсин, қачон изладим,
Икки дунёларимни битта қилгувчи борми?

Бор борлиғим ишқ маним, яна сароблиғим ишқ,
Ҳар зарра тупроғиму томчи ҳар облиғим ишқ,
Ободлиғим ишқ маним, хору хароблиғим ишқ,
Маним гулдай бағримни гулда тилгувчи борми?

Кўзларим қамашдилар ишқи зиёларинда,
Дардимча сир яширин майса-гиёларинда,
Минг сирни билиб турган ўшал дунёларинда
Маним битта кўнглимни битта билгувчи борми?

Бу руҳи равоним-ла равоққа сиғмагайман,
Манга қиё боқмангиз, қароққа сиғмагайман,
Фироққа ташламангиз, фироққа сиғмагайман,
Висолимга етгувчи, ман деб ўлгувчи борми?

Баҳорга боролмасман, кузимга келолмасман,
Тўзғиб ҳам кетолмасман, тўзимга келолмасман,
Ҳуш-беҳуш айламуш ишқ, ўзимга келолмасман
Ёрни, ишқни, ўзимни битта қилгувчи борми?
Кўнглим билгувчи борми, мен деб ўлгувчи борми?
Икки дунёларимни битта қилгувчи борми?...

1998 йил

https://t.me/Guljamol_Asqarova