⭕️بۇز آراباسی
✍یازار: میرجلال
کؤچۆرن: #محمود_بنیآدمدیزج
ننه قاریشقا بالالارینی – قاراجانی، ساریجانی، خاللیجانی ایشه گؤندردی و دئدی:
باغدا میوهلر یئتیشیب، - دئیه، لازیم اوْلان تاپشیریقلاری وئردی:
- عطریندن دۇرا بیلمیرم. آغاجلارا، تَنَکلره* دیرماشین. آلما، آرمۇددان، اۆزۆملردن دوْیونجاق یئیین، دیشینیزده منه شیره گتیرین!
بالالار دۆزۆلۆب، یۇوادان چیخاندا ننه دئدی:
- باخ! یوْل اۆستۆنه چیخمایین، کۆنج – بۇجاقدان گئدین، سۇیا دا گیرمهیین، سسدن قوْرخمایین!
بالالار میوهلری تاپدیلار. قاراجا آلما گَمیریردی، ساریجا آرمۇد دیشلهییردی. خاللیجا اوْنلاری چاغیردی:
- بۇرا گلین، قیزلار! قارا شانێن آیری لذتی وار.
باجیلار اوْنون یانینا گئتدیلر. قارا سالخیمین آیری، دوْلو گیلهلرینه یاپیشیب سوْردۇلار.
باغبان گلیب تَنکدهکی یئتیشمیش سالخیملاری دَرنده قاریشقالار قوْرخۇیا دۆشدۆلر و «بیزی هارا آپاریرلار؟» دئیه دۆشۆندۆلر.
خاللیجا تاپشیردی:
- گیلهلرین ایچینه گیرین! گیلهدن برک یاپیشین! دیشینیزی ایلیشدیرین، ترپنمهیین!
سالخیمی تَنکلدن اۆزۆب، آیری بیر زنبیله قوْیدۇلار، اۆستونو اؤرتدۆلر. سس کسیلدی. قاراجا یاواشدان دیللندی:
- قیزلار بیز هارداییق؟ من لاپ داریخیرام!
خاللیجا دئدی:
- قارانلیق فرصتدیر، ایشینیزی گؤرۆن!
چوخ چکمهدی زنبیله ایشیق دۆشدۆ. اۆزۆملری گؤتۆردۆلر. خاللیجا پیچیلدادی:
- جوْمالاشمایێن، سس سالمایین!
اۆزۆمۆ بیر آغ تاسایا* قوْیدۇلار. سالخیم – سالخیم اۆستۆنه ییغیلدی. خاللیجا باجیلارینا اۆرک وئردی:
- گیلهدن بَرک تۇتون!
تاسی گتیریب آغ دیوارلی، ایشیقلی، تمیز بیر یئره قوْیدۇلار. ائشیڲه بنزهیین بیر یئرده چیراق گؤرنده خاللیجا دۆشۆندۆ:«بورا هارادیر گؤرهسن؟» قاپی باغلاندی، ایشیق سؤندۆ. بیر خیریلتی سسی گلدی. هاوا سوْیۇدو. قاراجانین سسی ائشیدیلدی:
- من اۆشۆیۆرۆم.
- منده! - دئیه ساریجا پیچیلدادی.
- من دوْنۇرام! - دئیه خاللیجا علاوه ائتدی.
قاراجا اؤزۆنه جرأت وئردی:
- بلکه قوْرخۇروق!
خاللیجا دئدی:
- من عؤمرۆمده قوْرخۇ بیلمرم. ایندی اسیرم.
سوْیۇق داها دا آرتدی. باجیلار:
- سوْیۇقدان اؤلدۆم! قیش دۆشدۆ دئیهسن! - دئیه اؤزلرینی خاللیجانین اۆستۆنه آتدیلار.
هارا دؤندۆلرسه بۇز گؤردۆلر. باجیلار تیترهیه – تیترهیه قالدیلار.
ننه قاریشقا بالالارینی گؤزلهیه – گؤزلهیه قالمیشدی. آخشام اوْلدو گلمهدیلر، گئجه – گۆندۆز خبر چاتمادی. سحر تئزدن ننه اوْنلاری آختارماغا گئتدی. دروازه آغزیندا اۆزۆم اییسی دۇیدۇ، چۆرۆک بیر سالخیما یاخینلاشاندا بالالارینی اؤلمۆش گؤردۆ کی، بدنلری بۆتؤودۆر. تئز حکیم دالینجا قاچدی.
حکیم گلیب باخدی، یوْخلادی و دئدی:
- ننه! بۇنلارا آزار دَڲمهییب، دوْنۇب، اؤلۆبلر.
یایین بو قیزماریندا دا دوْنماق اوْلارمی؟ - دئیه ننه تعجّبلندی.
حکیم چیڲینلرینی چکدی:
- اوْنا من ده معطلم.
- آخی قیشا آلتی آی وار؟
- بۇنلاری قیش دوْندۇرماییب.
- بس بۇ شاختا نه ایشدیر؟
- نه ایشدیرسه، بو، انسان ایشیدیر!
🔸آچیقلامالار؛
آرابا: ماشین
تَنَک: اۆزوم کوْلۇنا تَنَک، یارپاغینا دا تَنک یارپاغی دییرلر.
تاسا: کاسا
دۇیدۇ: حسّ ائلهدی
@MuncuqAz
https://t.me/Sancaq_media/6057
✍یازار: میرجلال
کؤچۆرن: #محمود_بنیآدمدیزج
ننه قاریشقا بالالارینی – قاراجانی، ساریجانی، خاللیجانی ایشه گؤندردی و دئدی:
باغدا میوهلر یئتیشیب، - دئیه، لازیم اوْلان تاپشیریقلاری وئردی:
- عطریندن دۇرا بیلمیرم. آغاجلارا، تَنَکلره* دیرماشین. آلما، آرمۇددان، اۆزۆملردن دوْیونجاق یئیین، دیشینیزده منه شیره گتیرین!
بالالار دۆزۆلۆب، یۇوادان چیخاندا ننه دئدی:
- باخ! یوْل اۆستۆنه چیخمایین، کۆنج – بۇجاقدان گئدین، سۇیا دا گیرمهیین، سسدن قوْرخمایین!
بالالار میوهلری تاپدیلار. قاراجا آلما گَمیریردی، ساریجا آرمۇد دیشلهییردی. خاللیجا اوْنلاری چاغیردی:
- بۇرا گلین، قیزلار! قارا شانێن آیری لذتی وار.
باجیلار اوْنون یانینا گئتدیلر. قارا سالخیمین آیری، دوْلو گیلهلرینه یاپیشیب سوْردۇلار.
باغبان گلیب تَنکدهکی یئتیشمیش سالخیملاری دَرنده قاریشقالار قوْرخۇیا دۆشدۆلر و «بیزی هارا آپاریرلار؟» دئیه دۆشۆندۆلر.
خاللیجا تاپشیردی:
- گیلهلرین ایچینه گیرین! گیلهدن برک یاپیشین! دیشینیزی ایلیشدیرین، ترپنمهیین!
سالخیمی تَنکلدن اۆزۆب، آیری بیر زنبیله قوْیدۇلار، اۆستونو اؤرتدۆلر. سس کسیلدی. قاراجا یاواشدان دیللندی:
- قیزلار بیز هارداییق؟ من لاپ داریخیرام!
خاللیجا دئدی:
- قارانلیق فرصتدیر، ایشینیزی گؤرۆن!
چوخ چکمهدی زنبیله ایشیق دۆشدۆ. اۆزۆملری گؤتۆردۆلر. خاللیجا پیچیلدادی:
- جوْمالاشمایێن، سس سالمایین!
اۆزۆمۆ بیر آغ تاسایا* قوْیدۇلار. سالخیم – سالخیم اۆستۆنه ییغیلدی. خاللیجا باجیلارینا اۆرک وئردی:
- گیلهدن بَرک تۇتون!
تاسی گتیریب آغ دیوارلی، ایشیقلی، تمیز بیر یئره قوْیدۇلار. ائشیڲه بنزهیین بیر یئرده چیراق گؤرنده خاللیجا دۆشۆندۆ:«بورا هارادیر گؤرهسن؟» قاپی باغلاندی، ایشیق سؤندۆ. بیر خیریلتی سسی گلدی. هاوا سوْیۇدو. قاراجانین سسی ائشیدیلدی:
- من اۆشۆیۆرۆم.
- منده! - دئیه ساریجا پیچیلدادی.
- من دوْنۇرام! - دئیه خاللیجا علاوه ائتدی.
قاراجا اؤزۆنه جرأت وئردی:
- بلکه قوْرخۇروق!
خاللیجا دئدی:
- من عؤمرۆمده قوْرخۇ بیلمرم. ایندی اسیرم.
سوْیۇق داها دا آرتدی. باجیلار:
- سوْیۇقدان اؤلدۆم! قیش دۆشدۆ دئیهسن! - دئیه اؤزلرینی خاللیجانین اۆستۆنه آتدیلار.
هارا دؤندۆلرسه بۇز گؤردۆلر. باجیلار تیترهیه – تیترهیه قالدیلار.
ننه قاریشقا بالالارینی گؤزلهیه – گؤزلهیه قالمیشدی. آخشام اوْلدو گلمهدیلر، گئجه – گۆندۆز خبر چاتمادی. سحر تئزدن ننه اوْنلاری آختارماغا گئتدی. دروازه آغزیندا اۆزۆم اییسی دۇیدۇ، چۆرۆک بیر سالخیما یاخینلاشاندا بالالارینی اؤلمۆش گؤردۆ کی، بدنلری بۆتؤودۆر. تئز حکیم دالینجا قاچدی.
حکیم گلیب باخدی، یوْخلادی و دئدی:
- ننه! بۇنلارا آزار دَڲمهییب، دوْنۇب، اؤلۆبلر.
یایین بو قیزماریندا دا دوْنماق اوْلارمی؟ - دئیه ننه تعجّبلندی.
حکیم چیڲینلرینی چکدی:
- اوْنا من ده معطلم.
- آخی قیشا آلتی آی وار؟
- بۇنلاری قیش دوْندۇرماییب.
- بس بۇ شاختا نه ایشدیر؟
- نه ایشدیرسه، بو، انسان ایشیدیر!
🔸آچیقلامالار؛
آرابا: ماشین
تَنَک: اۆزوم کوْلۇنا تَنَک، یارپاغینا دا تَنک یارپاغی دییرلر.
تاسا: کاسا
دۇیدۇ: حسّ ائلهدی
@MuncuqAz
https://t.me/Sancaq_media/6057