🌿@Bizimdil🌿M.Dalğa

⭕️یۇردۇمۇن گیزلری

✍یازار: رضا براهنی
چَویردی: #سوسن_نواده‌رضی

آلتینجی بؤلۆم

- ایڲیرمی ثانیه‌دن سوْنرا، ائششڲین گؤڲلرده اۇچاجاق.
بؤلۆمدن بعضیلری‌نین دئیینمه‌سی ائشیدیلیردی که، آللّٰه‌ین دیلسیز حیوانینی تی‌ان‌تی ایله پارتلاتماق دوْغرۇ ایش دڲیل. آما اوْلایین هیجانی اوْ قدر یۆکسک ایدی که، قوْیمادی بۇ دئیینمه جمعی‌اعتراضا چَوریلسین. آیریجا، هاممی غفیللَنمیشدی، ائله ائششڲه باخیردیلار سانکی قارّه‌راکتی گؤڲه فیرلادیلاجادی. گیزملی قیغیلجیم حیوانا یاخینلاشدیغیندا، حیوان سوْیۇق‌قانلیقلا باشینی دؤندریب، پیلته‌نین اوْدۇنا باخدی. سوْنرا باشینی اؤنجه‌کی حالینا دؤندریب، گؤزله‌دی. قیغیلجیم ائششڲه یئتیشدی. ائششک اوْنۇن ایستیسینی قارنی‌نین آلتیندا حسّ ائیله‌دی، ایشه‌دیڲی یئرده اوْ آیاق بۇ آیاق ائیله‌دی، سانکی بیر ایت‌میلچَڲی اوْنا مزاحم اوْلۇرمۇش کیمی. سوْنرا بیردن بیره توْو گؤتۆرۆب، بۆتۆن حێزیله اوْن متر بوْیۇنجا ال آیاق چالاراق هاوایا آتیلدی و همان حالدا پارتلادی. گؤوده‌سی‌نین پارچالاری دۆزنسیزجه‌سینه گؤڲده داغیلیشدی، بعضی تیکه‌لری اوْرداکی آداملارین اۆست باشینا بیله دۆشدۆ. کندلی مات، مبهوت بۇ صحنه‌یه باخدی، سانکی پارتلاما بیر یۇخۇیمۇش کیمی. اؤنجه‌دن ائششک اوْلان یئرده، ایندی هیچ نه گؤرۆنمۆردۆ. یاشلی کیشی باشا دۆشنده که، پارچالارا بؤلۆنن اوْنون ائششڲی ایدی، اللرینی قۇلاقلاریندان گؤتۆردۆ، اوْتۇردۇ یئره، دۇوارا دایانیب، عزیزینی ایتیرن و اؤلۆ چرخی‌نین گئری دؤندرمک اوْلمادیغیندان آرخایین اوْلان بیریسی کیمی باشلادی آغلاماغا. دِیویس دیلماجینا دستور وئردی: - آداملارا سؤیله کامیوْنلارا مینسینلر!
***

دِیویس هر زمان، هر یئردن خبری وار ایدی، ساده‌لوح‌لۇقدان دا هامیسینی هاممییا دییَردی. بۇ خبرلر چوْخۇنلۇقدا آمریکالی افسرلرله ایرانلی افسرلرین و عائله‌لری‌نین ایلیشکیلرینه مربوط اوْلاردی، یا دا مُستشارلارین بیری بیری ایله ایلیشکیلرینه. بیر چاوۇش نئجه کاپتان «برائوْن»ۇن قۇللۇغۇنا یئتیشر. «باجی*»لاردان هانکیسی ماژور «وود»دان اۇشاغا قالیب. هانسی آمریکالی سۇبایین آروادی آمریکادا بیر بانکچی‌نین اوْغلۇنا وۇرۇلۇب، اَریندن بۇشانماق ایسته‌ییب. آمریکا کوْنسۇلۇسلۇغۇندا کیم کیمین آروادییلا آرا سازلاییب یا دانس ائدیب، یا بیردن آرادان یوْخ اوْلۇب. نئجه اوْلدۇ اوْردۇ کوْماندانی‌نین قیزی تِیمَن «بیلی» ایله تهرانا گئتدی. و اُستاندارین هانسی قیزی، هانسی آمریکالی تِیمن‌له مکتوبلاشیر…
بیر گۆن دیلماجا دئدی:
- آرتیق راضیلاشمیرام تبریزدن تهرانا قارا یوْلدان گئدم. میانایا یئتیشمه‌میش اوْنباشی «کارتِر»ین کامیوْنۇ اۆچ دانا کندلی اۇشاغی بیر یئرده باسیب، اۆچۆنۆ ده اؤلدۆرۆب. اوْنباشی ماشینینی اللی آلتمیش آددیم اۇزاقلیدا ساخلاییب، دۆشۆب گلیب گؤرسۆن نئجه بیر دسته‌گۆل سۇیا وئریب. جسدلری گؤرمک همن قۇسۇب، اۇشاقلارین بیری‌نین قارنی ییرتیلمیشدی، باغیرساقلاری، ایچینده‌کی بۆتۆن قۇردلارلا ائشیڲه تؤکۆلمۆشدۆ. آما بیلیرسن سوْنرا نه اوْلۇب؟ باشینی قوْوزایاندا گؤرۆب بۆتۆن کند اهلی اوْرا گلیرلر، هامیسی‌نین دا الینده چوْماق واریمیش. تئز کامیوْنا مینیب آرادان جیریب. کند اهلی اُستاندارا، تبریز اوْردۇسۇنۇن کوْماندانینا، شهربانی رئیسینه شکایت ائدیبلر. آما قضیه‌نین سس صداسینی باستیریبلار. مُستشارلیغین اۇشاغین آتا-آناسینا وئردیڲی تکجه 250 تۆمنله. آرتیق هیچ بیر آمریکالی قارادان تهرانا گئتمک ایسته‌میر. کند اهلی هر یئری قوْرۇق ائیله‌ییبلر.
اطرافا باخینجا، قار بوْراندان سۇوای هیچ نه گؤرمۆردۆلر. دِیویس سوْرۇشدۇ:
- سنجه ایندی اوْ قۇرد هاردادیر؟
دیلماج ددی:
- البته که، بوْرانین‌ ایچینده‌دیر.
- دئییرسن بئینیندن نه نقشه گئچیر؟
- قۇردۇن تکجه بیر فکری اوْلار، اوْ دا قارنینی دوْیۇرماقدیر.
- من، کامیوْنۇن دالیسیجا قاچان بیر قۇرد گؤرمه‌دیم.
- داها بۇ دوْغۇردان دا آج اوْلمالیدیر. یوْخسا نه سببه گؤره کامیوْنۇن دالیسجا قاچسین که؟
دیلماج، ایکی ایل یاریم بۇندان قاباقکی بیر یوْلچۇلۇغۇنۇ خاطرلادی. بیر اوْتوْبۇس اردبیل‌ین قۇزئییندن، اوْرمان یۆکسکلیکلردن، اوْنۇ آستارایا آپاریردی. سۆرۆجۆ اوْتوْبۇسۇ ساخلادی که، هم موْتۇر سوْیۇسۇن، هم ده جماعت گؤرسۆن دنیانین هاراسیندادیر. یۇخاریدان، آیاغین آلتینداکی اوْرمان، سِحرلی بوْیالاری ایله رنگارنگ و مُحتشم بیر یئل کیمی اسیردی. اوْتوْبۇس سۆرۆجۆسۆ دئدی:
- چوْخلاری‌نین بئینینه وۇرۇب، بۇردان سێنێرێن اوْ تایینا قاچیبلار، آنجاق دره چوْخ تَهلِکه‌لیدیر. اۆزۆ آشاغیسی چوْخ ایتیدیر. قایالاردان اَنمڲه، آدام گرک بۇ ایشین اۇستاسی اوْلا. چوْخلاری اؤلدۆلر. بۇردان چوْخلۇ اوْتوْبۇس بۆتۆن مسافرلری ایله دره‌یه دۆشدۆ.

#آردی_گلن_ساییدا...

@SancaqDergisi
https://t.me/Sancaq_media/6052