مَـرامٌ التَرهونيِ

كلامك مقنع شكله هك صح 🤎

مفهمتش ليش

وقت تبتعتي شات في الواتس آب والعلامات يولوا زوز وميدكنوش شن معنها ولا تلفوني ملخبط ؟

انا شخص نتعلق بِكل شيء وصعب ننسى ولا بساهل نقسى ( منعرفش سواد القلب )

هلبا ليالي بكيت فيهم لأنه قلبي يحن يحن لذكرى ولا شعور ولا فصل من قصة ولا أُمسية من ليلة حزينة قدرت من فرط الكلام نرتب شعر شعر وشعور عن الغُربة والحنين عن قساوة الأيام وسرعة السنين لمبتش تستناني باش انوض من رحم المُعاناة ليدين الأم الحنون

لما نبكي معنها حق حسيت وحق السكين انغرس في قلبي وبكيت لما نبكي معنها هذا حد معطيت ولما نرحل نرحل بيا كلني ميقعدش إلا اسمي وشوية مواقف وصور وتشتت في عقول الناس كذاب لبيقول نساني ونسى ملامح الألفة الي فيا آثر حيرة وربكة مطر تنزل للأرض بلهفة تغذي أراضي قاحلة وقلوب معرفتش إلا إنها تكون ضحية لقصة منسية

لو قالولي التعلق إدمان حنقول التعلق تعاطي المكان الصور والتفصيل وحتى العنوان لو جيت حنصمم وجهة لكُل الامكان لنحبها حنحط على رأس القائمة ترهونة طرابلس والجبل مش لحاجة فيهم لا لذكرى لقصة الألفة لي أماكن عشت فيهم تفاصيل وقصص بلذة الحالم وبحماسة المُستكشف

وفي خِتام النص

واحد إثنين ثلاثة مية نِحبك هلبا مش شوية

لو عجباتك القافية خلي تعليق ولا رسالة في الماسنجر حنفرح هلبا ولو حابين ترسموا إبتسامة عوجهي لعنده رقمي الخاص يخليلي حاجه تخليني نستمر نعطي شعور الألفة لي ما عند حد يا اصحاب

الوقت من الليل تأخر والهدوء ساكن لدرجة لو يطلع حد منكم يقول نحبك يا مرام حنسمعه


_ مرام الترهوني

يروق الزمان وتنسى الي فغيابه
تقول غير ياريتني ننسى

اللهم صلي وسلم على سيدنا مُحمد .

خلي ايدك في ايدي وخلينا نعيش ترا .

في جو ساحر | خريف
من اول منضت قعدت دقائق نفكر ونتخيل ونبتسم لانه صوت الشارع قاعد يدير في صدى وإيقاع مع النسمات بيجامتي تلفوني توجهت للمطبخ خديت السكر حطيت الركوة على النار استنيت المية تغلي حطيت الكاكاو
نسمات مثلجة كل شوية تزور وتسكن في العروق مستاحشين لاكن مني مش عارفين

علاش نستاحشوا في الشتاء ونحنوا ؟
لانه للصقع رسالة لو معندكش حضن بسلامة عليك حتكمل الفصل تتكمش ومتدفاش ماهو أنتَ بروحك

مني نرد عليه !
عندنا بطانيات شالات صوف وحكايات دفاية وكتب مرتبة بحرفية وعناية عندنا قصص ضحكات ايام فنيليات باكمام واسعة وزاوية دافية مخزون كبير من برطمان القهوة والكاكاو مشاوير لمدن ساحرة ومطر لما تنزل تخلي الدفىء يسكن

امتى بنحبوا ؟
لما الوقت يحين لما بعد الأيام الممطرة تتحول لفل وياسمين لما مفعول الحزن يتلاشى لما نحبوا الدنيا بعيوبها لما يبطل الوقت يبكينا لانه قوينا لما نحتضنوا ذواتنا نتقبلوا اشكالنا و عيوبنا حالتنا وقصتنا الحزينة الي محد عاشها لما نسمعولنا نعيطوا نحكولنا نسجلوا فويسات لروحنا نسمعوا نطبطبوا نحنوا نحبونا قبل ما يحبنا غيرنا

- مرام الترهوني

كله سراب / وهم
اليوم كل حد مننا قاعد يعاني من أشخاص سيئين في حياته أشخاص لا يتماشى معاهم فعلياً بعد هلبا اختلاف وجهات حتكتشف ناس متحبكش متتمنالكش الخير ناس على سواد قلوبهم يبوا يسودوك ميحبوش النضيف والنقي والي مختلف هاوية سوداء يطيحوا فيها

احنى اليوم ناس المفروض تفكر بعقلها لأنه العيش فالواقع آمر مطلوب وأول خطوة لتقدير الذات نستخدموا اسلوب الفلترة لكل شيء ميعجبناش مثلاً عندي في حياتي هلبا ناس انفلتر ناس معينة يقعدوا قراب زي العيلة والصحاب ليحبوني ونلغي باقي الناس لتأذي فيا بشكل او بآخر او الي ميتفكرنيش إلا وقت مصلحته ( قبل على أساس ميعرفنيش )

برضوا خاصية الحظر هادي خاصية مهمة بطبيعة الحال لما اي شخص يكرهنا وميحبناش ويحاول ينشر السمية فينا نتجهوا طول للحظر شخص ميحبكش او يخلي فيك تشعر بمشاعر اخي بوجوده يتعامل معاك وكأنك عديم كرامة ويحسسك إنك اقل وناقص هذا طول حظر

داخليتك منطقتك حدودك سكنك تلفونك الاكاونت متعك هذا عاملهم معاملة المكان الخاص و المقدس ليك مش كل حد تسمحله بالدخول لعالمك الخاص باش مينشرش السمية متعه ويمتص روحك ويخليك جثة مركونة تحت شجرة الحياة

انا اليوم نقدر نواجه أي شخص مسببلي أذى وأي شخص ميحبنيش ونقدر نحط لأي شخص حظر ولو تلاقيت معاه في مكان وسألني عن سبب الحظر حنعترفله بالشيء لداره ومن كان يكون حتى لو كان شخص مهم يمثل نفسه ميمثلنيش لإني شخص مختلف بكيان مختلف

تصرف سليم لانه اي شخص تسكتله حيتماذى حيرجع يسببلك نفس الأذى لانك ساكت لانك يحسابك خايف ومعندكش كرامة ديروا رد فعل لكل فعل لانه الفعل حيرتب مكانة كل شخص متعليش بحد هلبا لين يبدأ يحسابك متقدرش تعيش بدونه وانك أنتَ الخاسر لو فارقك

خلوا المساحة في كافة أنواع التواصل للناس الي تبوهم متفتحوش مجال لحد يتغذى على روحك و لحمك و وقتك خلي الي بينك وبينه إنترنت ومبيناتكمش معرفة شخصية يلتزم حدوده متسمحوش لحد يتعدى عليك بالحديث الي مليشي لزمه

البرايفث قرار سليم لكل شخص يعاني من المسخ البشري في حياته ديروا حدود محدش يتخطاها حافظوا على قلوبكم النقية من بشاعة قلوبهم السوداء أنتَ إنسان تمثل نفسك

_ مرام الترهوني

اوضـح ماتمَ ألتقاطه للقمر 🤍.

اصابتني الحيرة من امرك يا ايتها الفتاة تكتبين شيئاً فتبكي الكُتب لماذا لم تحتضن سطورك بذلاً عن ذاك الهراء

صلاة الفجر : أشهد أن لا إله إلا الله واشهد أن محمد وسول الله ، اللهم اجعل لنا الخير

في آخر فترة قعدت نتألم جسدي ونفسي لانه نكره إني نشوف روحي مريضة ولا حتى متغيرة ، كل الليالي طلع فيهم الصُبح وانا نايضه التعب الجسدي والوهن والشعور المتضارب كل يوم انوض العصر بطريقة مرعبة نستيقظ إنسان خامل أطرافي منحسش بيهم نستيقظ وكأني طايحة من الدور الثالث ملامحي سكنها الصمت ويا ذوب نرتب داري ونشرب قهوة باقي اليوم نتألم

لعند ما فكرت بالمُنوم بعد إستشارة طبية وافق عليه اول يوم خديته رقدت وكأني في غيبوبة مقدرتش نوقف ولا حتى نفتح عيوني نسمع في أصوات في العالم لاكن المصدر مجهول جسمي تخذر محسيتش بوجود شيء لين نضت بعيون مقدرتش نفتحهم صداع حاد كل شيء مشوش

قررت إنه كان من المفترض نعدل نومي بدل ما نسبب لنفسي أذى المُنوم كان اشبه بالانفصال حسيت وكأني مش في الدنيا كل شيء مشوش ولحد الان وانا نكتب في النص مشوش

لدرجة من الصداع شبحت التاريخ واليوم وصارلي تضارب معش عرفت امتى آخر مره كلمت صاحبتي امس ولا اليوم

اليوم قررت منخداش ونعدل نومي بطريقة ثانية ونعيش في الليل لعند يترتب بروحه لانه التجربة كانت مرهقة ( الهروب من المشكلة مشكلة )

حنعيش في الليل ونكتسب تجربة جديدة

- مرام الترهوني