ابعيني السؤال ايدُوْر .. وايدوّر اجواب
باب الحوايج ليش .. ينسد عليه باب ؟

••••••••••

هذا السؤال ايحير .. كلمن يسمعه
وايخلّي بالدلال .. صدعه اعله صدعه
حي ميّت ايسمعوه .. ولسانه دمعه
شلون النسيم ايموت وايخنگه سرداب

••••••••••

طبع الورد ميعيش .. والعلّه تبدي
لو فارگ السندان .. وابابه (سندي)
شگد ناده ما سمعوه .. يا طه جَدي
يا جَدي ما ظل حيل .. حيل الگلب ذاب

••••••••••

زمرة بني العبّاس .. ما عدها رحمه
شلون الضوه ايسجنوه .. بطاموره ظلمه
وينه اعله طه الگال .. چان ابن عمه
بچبدةْ أسد بغداد .. چبد النبي انصاب

••••••••••

كل الطيور ايتام .. والدها غصنه
والطاغي .. جوّه الگاع عايش يدفنه
عين الشمس (يعگوب) .. (يوسفها) جفنه
بلا صدره .. صفنةْ موت عاش الهوه الهاب

••••••••••

بغيابه جدم الناس .. بالنسمه يعثر
والسهله صعبه تصير .. والشده تكبر
هو الفرح تفسير .. (موسى ابنَ جعفر)
ابن اليِجَمْع الناس وامْفَرْق الأحزاب

••••••••••

الباب انفتح .. والباب .. طفّوا شمعته
بيد اربعه احماميل .. آه يا غربته
من السجن للموت .. چانت طلعته
فوگ الجسر والصوت .. مات ابن الاطياب

••••••••••

يعيوني المغيمات يلّه انتحزّم
جرفچ على المسموم كون ايتثلّم
الشافچ اريده ايشوف يعيوني مأتم
غيم الله كون اليوم من جفني سچّاب

••••••••••

✍ بقلم الشاعر ✍
أحمد هادي الشمري