من يگول الحره ذلت بالسبي
تبچي مكسورة گلب لاوالنبي
مااصدگ هالوضع هيه بتمن وقتنع
تبچي مكسورة گلب لاوالنبي
***************
هاي زينب ياخلگ هاي العقيله
هاي بت حيدر علي واصل الفضيله
شلون فهموني اذن تمشي ذليله
وهيه حمل الدنيه لومالت تشيله

يم شماته شلون بالله تنكسر
وهيه من عدهه اخذ درس الصبر
شلون شافوه الدمع هيه بتمن وقتنع
تبچي مكسورة گلب لاوالنبي

زينب المفهوم للعز والاباء
وماتطيح ادموعهه بس بالدعاء
صوتهه يسمعوه بس اهل السماء
شلون بين اجناب تبچي بكربلاء

هيهه لورفعت اديهه للجليل
الگاع حدر اجدامهم والله تميل
الباري ألهه يستمع هيه بتمن وقتنع
تبچي مكسورة گلب لاوالنبي

هاي من حيدر علي اخذت صفات
كالجبل وكت الشدد بالنايبات
ماتطخ الراس تعرف يم شمات
وهيه بس للله تدنگ بالصلات

طاري اسمهه يخوف تهابه الزلم
حتلو طايح فرض راعي العلم
ياجبل دنك خضع هيه بتمن وقتنع
تبچي مكسورة گلب لاوالنبي

زينب بعلم وفهم منزل امام
وبالبلاغه چن علي توزن الكلام
الصبر يمهه يدنگ يحني هام
ويامره گلي مثلهه بهل المقام

چان صبر ايبوب مضرب للمثل
ومن صبرهه احتار ايوب وخجل
بالصبر ألهه رجع هيه بتمن وقتنع
تبچي مكسورة گلب لاوالنبي

الله مايقبل لون ذلت محال
هيه ستر الله وحجاب الكمال
هاي زينب هوه ياهو الگام گال
شلون چاه راحت سبيه وللجدال

هيه راحت موسبيه لا ابد
راحت لعرش الطغات تهده هد
هدمت عرشه وگع هيه بتمن وقتنع
تبچي مكسورة گلب لاوالنبي

انه اريدن واحد يگلي بدليل
زينب الحره مشت مشي الذليل
بالقصر وكفت مثل حامي الدخيل
براس مرفوع دخلت مو بالعويل

الاسير الذله بطباعه تصير
كيد كيدك هاي موچلمت اسير
هاي موذل وركع هيه بتمن وقتنع
تبچي مكسورة گلب لاوالنبي




علي الجناحي

@Ali_aLgenaih