To'rtburchak she'r

To'rtburchak ko'zingga osmonni to'ldir,
Daryoyu, dengizu, ummon — to'rtburchak.
To'rtburchak Vatanning to'rasi mo'ldir,
To'rga tushgan erksiz inson — to'rtburchak.

To'rtburchak tizimga ko'tarsang isyon,
Yo'q joydan yog'ilar to'rtburchak toshlar.
Dunyoni boshqarib turibdi pinhon,
To'rtburchak miyalar, to'rtburchak boshlar.

Men mudom besarhad bir ishqqa tashna,
Nechun tasavvurning qulochlari berk?
To'rtburchak umrimga mazmun bag'ishla,
Qaydasan eeeyyy, kenglik, qaylardasan, Erk?!


✍Mehrinoz Abbosova