يمه اشحلاته اعليك ثوب الحنه
جنك ابوك اليوم واگف چنه
@@@@
من شفتك ابثوب العرس بعد امك
گاصد تريد اليوم تنصر عمك
ناذر حياتك مثل ابوك ابدمك
مبروك الك يوليدي هاي الجنه
يمه اشحلاته اعليك ثوب الحنه
@@@@
يوليدي لازم سيفك ومتعني
متهني يبني ابوگفتك متهني
ماخاب بيك ارباك جاسم يبني
عفيه الولد لا متخيب الظنه
يمه اشحلاته اعليك ثوب الحنه
@@@@
ماخاب يبني تعبي الك واربايه
چنك ابوك المجبتى وگظ رايه
لاترجع الا اچفوفك امحنايه
اتمنه ازفك يالولد اتمنه
يمه اشحلاته اعليك ثوب الحنه
@@@@
احسب ليالي الحنتك والزفتك
يوليدي لجل اليوم انه ناذرتك
لامه اموك وصايته لبستك
هاي الوصيه امن الحسن يمهنه
يمه اشحلاته اعليك ثوب الحنه
@@@@
اتمنه من ربي الاله العالم
اتحنه من دم مصرعك ياجاسم
حتى انه اصيحن فدوه ابني لفاطم
يوم القيامه فاطم ترضه عنه
يمه اشحلاته اعليك ثوب الحنه
@@@@
اتمنه اشوفن دمك ابچفينك
گبل السبط كون انظر امگطعينك
روح انت بس خلي السبط نص عينك
يوليدي باچر عرسك ابنص جنه
يمه اشحلاته اعليك ثوب الحنه
@@@@

الخادم عمار الساعدي