#အချစ်နှင့်စစ်

မောင်ကစစ်သား ၊ ချစ်စကားတော့
ပျားရည်စက်လို ၊ အစဥ်ချိုအောင်
မေ့ကို အထပ်ထပ် ၊ မချွဲတတ်ပါ
ပေးဆပ်ဖြတ်သန်း ၊ ခရီးကြမ်းကို
ထမ်းရွက်တာဝန် ၊ စ ဥ်ကျေပွန်ဖို့
ခြေသွန်ပင်ပန်း ၊ ဘဝကြမ်းလို့
အနမ်းခြွေလည်း ကြမ်းနေနိုင်တယ် ။

မောင်ကစစ်သား ၊ အလုပ်များ ၍
မအားတဲ့ခါ ၊မေ ကညာကို
စာလွှာမရေး ၊ ပို့မပေးလျှင်
စစ်ရေးစစ်ရာ ၊ ထမ်းဝန်တာက
စီကာပြည့်နှက် ၊ တိုက်ပွဲထက်ဝယ်
အသက်ကိုလု ၊ ရင်ဆိုင်တု ၍
တည်မှုကြိုးပမ်း ၊ ခရီးကြမ်းမို့
အလွမ်းတွေလည်း ခန်းနေနိုင်တယ်။

သြော် ....
အချစ်နှင့် စစ် ၊ နှိုင်းယှဥ်ဖြစ်သော်
အချစ်ကနု ၊ ယုယမှုနှင့်
ပြုသမျှမွှေး ၊ ပန်းကလေးလို
လှသွေးနုရွ ၊ ကြည်နူးကြလည်း
စစ်ကတော့လေ ၊ ကြမ်းတမ်းနေ၍
မျက်ရည်(ရေ)တောမှာ ၊ ဝေဒနာနှင့်
ပြည့်ကာဖြတ်သန်း ၊ ခရီးလမ်းမို့
ယမ်းငွေ့တွေအား ၊ အချစ်များနှင့်
အစားထိုးကာ ၊ ငြိမ်းချမ်းသာသည့်
ကမ္ဘာတစ်ခွင် ဖြစ်စေချင်။
ကဗျာရှင်၏ ဆန္ဒပင် ။

အောင်နိုင်သူ ( ဇွဲကပင် )