من أصعب الأوقات اللي ممكن يمر بيها الإنسان ، وقت يحس روحه عاجز ومش بِـ يده يدير شي ، الإحساس هذا مرات يوصله لِعُزلة ما آختارهاش بِـ نفسه ، لَكن الظروف هي اللي فرضتها عليه ، في الوقت هذا ما يلقاش شن يقول ، لا الكلام ينفع ، ولا الأسئِلة اللي تنسأله يلقئ ليها إجابات تريّح الناس أو حتى تشرح اللي قاعد يحس بيه ، يقعد ساكت ، مش لأنه ما يبيش يحكي ، لَكن لأنه تعبان من الداخل أكثر مما يقدر يوصف ، قلة الحيلة والخوف والقلق مش حاجات الواحد يختارها أو يمثلها ، ومش حالة يحب يعيش فيها ، هي مشاعر تجي فجأة ، بلا مُقدمات واضحة ، ومرات تقعد فترة طويلة من غير ما تعرف امتئ  حَ تمشي ، واللي يمر بيها ما يحتاجش لوم ولا ضغط ، يحتاج شوية تفهّم وصبر لين يلقئ طريقه ويرجع يوقف على رجليه من جديد .