ابو ذيات للسبي


صفكت عليك يا عـباس راحات
اختك للسبي ويه الشمر راحات
الليالي الجانت ويحسين راحات
وايـام السبي ضلت اليه
......
وايـام الـسبي بيه تـراحـان
بعـدك محد عـليـنه تراحـان
يعباس الكلب تدري تراحان
ويـون عـليك وناته شجـيه
........
يـون عـليك كـل ونـات ونهن
جـفوفـك هسه ياعباس ونهن
ترضه ويالشمر انسبي ونهن
وبسياط انضرب وانه سبيه
.......
بسياط وبالحبل خوية يجرنه
وينه الجان حاميـنه يجـرنه
خلافـك جارو عـلينه يجرنه
ولا واحد حمل كـدنه اذية
........
ولا واحـد تحـمـل مـا حملنه
وينه الحـامي النه ما حملنه
انكطع جفه يويلي ما حملنه
الامل جان بجفوفك هاي هيه
.......
وامل عدهن خواته ما املهن
يردلهـن بعد يرجع ما املهـن
سياط الشمر خويه ما املهن
حوافر كون هم داسن عليه
......
وحـوافر كـون بفراكك ترضني
يخيب شلون من بعدك ترضني
يعباس شوكت ترجع ترضني
الـزعـل بغيابك مبين عليه
.......
الزعل يرحل اذا جفك اقبله
العـذر منك ابو فاضل اقبله
وراسك بالسبي ويانه اقبله
اشكليه الجره والصار بيه
........
الشاعر
اياد الفرح التميمي