خواطر بي صوت منجدة المك📣

🙂💔🖤💥عايز نيو فريند م تسفهو

@Faxat😴💔💥

دقوا النحاس من ضى
صوت الشوارع حي
مافيش تخاذل تب
ما فينا زول نيى
مترس وجودك جد
عبي الهتاف يا جني
لا ترجى أخر الصف
قدام وإنت الضى
سوي الصفوف كالسيل
شعبا هميم بالحيل
ما أظنو يحكم يوم
دقنا بتلب ليل
أعوج وشوفه كمان
عاوز يعدل الميل
قدامو عزة هواك.
قالت يمين جيد لي..
حاشاهو فاشي الضيم..
عارفاهو ولدا لي..
أبدا بشيل همي..
وبمسح عذابي البي..
راجياهو من زمنا.
طول غيابو علي..

يا عزة إنت أساس..
شرفك محال إنداس..
هيلك نضال موروث..
محمولة فوق الراس..

ياهم ولادك جوك..
زي أزهري النبراس..
أكنس وشيلهم ديل..
ما تخلي فيهم شي..
سوسا بينخر ديل..

موية وشيك تتراق..
لي لقمة طي الجوف..
حتى الكلام ممنوع..
والأمن فيهو الخوف
سرقو البلد ي جني

دم الشهيد يا قحت
اوعاك تتناسى العهد
اوعاك تتنازل عنو
اياك تبقى سياسي
تتنازع في الكراسي
مطلبنا قصاص اساسي
عايزين قصاص يا كرور
لكل شهداء دارفور
عايزين نجيب التار
لى كل شهداء سنار
عايزين نجيب التار
لى كل شهداء كجبار
يا قحت اوعاك تتكبر
دا قصاص شهداء سبتمبر
يا قحت اوعاك تتكبر
دا قصاص شهداء ديسمبر
عايزين نبني السودان
لى كل شهداء رمضان
نبنيهو بى ارادة.....
للماتو في القيادة
عايزين دولة نظااام
يعم فيها السلااااام
ويتحاسب كل القتلة
الفضو الاعتصاااام
ثورتنا ثورة حديد
دي الجات بى دم شهيد
مطلبنا قصاص اكيد
ح نبل الجنجويييد
ح نبل الجنجويييد
قتلونا معروفين
كيزان تجار الدين
ومعاهم ق د س
ومعاهم ق د س
#مليونيه_30يونيو

الثورة حرية..
*

الثورة غنوة فال
الثورة دي قضية
راسمين ملامح الخير
لي دولة منفيا
هاتفين بي أعلي الصوت
سلمية سلمية سلمية سلمية
**
عايزين نجيب التار
بي أرواحنا نفديه
الضاع كتير بالحيل
وحقوقنا مخفية
سلمية سلمية سلمية سليمة
****
يا أمي أعفي علي
يوم قلت سلميق
حاال البلد ودر
والهم كبر لياا
عارف حشاك محروق
والخوف بقي عليا
سلمية سلمية سلمية سلمية
****
الثورة ما ضاعت
كذب البقول ضاعت
الثورة جوانا الثورة عنوانا
30يونيو شرف بان
والبهجة كاسيانا
طالعين نجيب الحق
والثورة دي خيارنا
سلمية سلمية سلمية سلمية

إهداء لمليونية *# 30يونيو*🇸🇩🖤.

من حقي اغني لشعبي..
من حق الشعب عليا..
لا بايدك تمنع قلبي..
ولا قلبي كمان بايديا..
علمني اغني الطين..
المخرطه والطوريه..
الناس الصابرة سنين..
بالحال الما دغرية..
القابضة الجمرة في ايدا..
والجمرة تلهلب حيا..
لا قادرة الجمرة تقيدا..
ولا دايرة تولع هيا..
يا قلبي بلاش نستعجل..
في الدرب شويه شويه..
واصلين الما بتأجل..
اليوم الشمسه قويه..
علمنا الشوق نترجل..
نستحمل وجع الجيه..
لا القش بيهاب المنجل..
لا تضبو النار الكية..
لا صقر الاهة يريح..
لا تنفضو عش قمرية..
من حقه يغني صريح..
ذرية ورا ذرية...
من حقي اغني العالم..
ابداع وعلم حرية..
انسان وشعوب نتسالم..
نتكالم بي حنية..
على نخب الود نتناجم..
لا جنس ولا لونية..
لا عرق لا آه نتقادم..
سكتنا بياض النية..
مش كلنا جينا من ادم؟؟
مش ادم ابو البشرية؟؟
السجن اذاً يترادم...
نبنيهو قلاع ثورية..
عقبال الخير يترادم..
والدنيا تمش دغرية..
مد كفك يا بني آدم...
حرية سلام حرية.

*# مليونيةة "30" يونيو*🇸🇩🖤.

ام الشهيد قالت
قاعدين ومافي رجوع
الا الحقوق ترجع
وتسقط حكومة الجوع
لا لف ولا دوران
والاعتزار ممنوع
قالت كفاية دموع!!!

والغش دا ما نافع
ورونا وين نافع؟!!
في بيتو ولا سجين ؟
الهندي عز الدين
رأس الفساد بشه
ورونا وين قاعدين؟
الخونة مندسين

اهل الشهيد حالفين
الدم قصاد الدم
زي ما بقول الدين
ما بقبلو الديه
شالو الكفن مارقين

دم الشهيد يرجع
وحكومة مدنية
لا كوز ولا أحزاب
لا زول يكون كضاب
لا ناس حرامية
دم الشهيد غالي
ما بنقبل الدية

صوت الهتاف عالي
أقوى من المدفع
قاعدين ولا بنرجع
الا الحقوق ترجع
لا لف ولا دوران
والغش دا ما بنفع

في كوبر الكيزان؟
يلا القضاة جاهزين
الحكم يبدأ الحين
بالعدل والميزان
بالشوف عيان وبيان
ما يكون وراء الحيطان!!
الكوز رجيم شيطان
نشاهد دليل وعيان
ورينا يا برهان

استغفرت..
ومشت علي الأوضة الوحيدة البابها لسع ما انفتح..
ياربي نايم كل دا..
بس ما عوايدو ينوم كدا
ويفوتوا اذان او صلاة..

دقت على الباب بهدوء واتمهلت..
ما جاها رد..
في مرتين اتنحنحت

دخلت عليو

الغرفة فاضية
وحالها زي حال البلد
مقلوبة من فوق لي تحت
زي التقول اتفتشت

علم البلد مختوت علي الترابيزة في آخر الركن
وأوراق مشتته في الأرض.. اتكرمشت..

مصلايتو مفروشة ف مكانها كما الدوام
والسبحة فوقها اتكومت..

ياربي ما بيت هنا؟
والله ما عاداتو ما يبيت معاي..
سواها يوم قبال سنة...
بس تاني ما اتكررت..

ياربي بس لطفك علي..
يا ربي دا الداخراهو لي

يا ربي هو الولد الوحيد
ركازتي في زمني العنيد..

ومشت علي التلفون تفتش في النمر
ياربي بات عند النذير؟
ياربي بات عن ناس عمر؟
ياربي اضرب لي منو؟
الدنيا بدري.. اقول شنو
احسن اخلي الشمس تشرق وانتظر..
بس بالي كيفن يهدأ فكرو ويستقر؟

طق طق طرق
الباب ضرب
دقات مكررة بي ادب
دقات ضيوف..
والقلب زاد جواها خوف..

ياربي عل الجاي خير..
انا بي حبالك مستجير

ومشت علي الباب في قلق
فتحت لقت كل الخلق..

الحلة.. واصحابو الكتار
والقلب ولع فيها نار

اصحابو غارقين في الدموع..
والناس تردد من بعيد
والله ما مات الشهيد..
والباقي عارفااااهو.. النشيد

يا والدة والله الحصل
ولدك بطل
ناضل فدا الوطن الفضل..
كان بحمي في اخوانو ديل
فوق المتاريس... انكتل...
ضربوهو اولاد الحرام
كان داير افضو الاعتصام
يا أمي كان بيوصي نهديك السلام
ووصيتو ليك
ما تدقوا صيوان العزاء
طول ما البلد ماسكاها اذيال النظام


*# مليونيةة "30" يونيو*🇸🇩🖤.

يا اخوي ياثائر ✌
يا طالع الشارع 🕺🏿
اهتف بأعل صوت 🗣
سمع اذن حمدوك 👂
خلي الاصم يسمع 😍
يسمع صوت الشهيد 😟
يوم طلقة الرصاص 🩸
يسمع صوتو هناك 🏰
في موكب الحرية ✌
في اللحظة البنقووول 🗣️
ارفع علمك فوق 🇸🇩
اخوانك ما غشوووك 👬
حكومتنا مدنياااا 😍
اصبر على الكيزان 🙌
اصبر بكره نشوف!!!!!!🤔
شمس الخلاص تشرق ☀
تشرق شمس مدنية 🇸🇩
تشرق شمس حرية 🥳
تشرق ولا تغيب 🌇
تحيى ولا تموت 👏
يا اخوي يا ثائر 🇸🇩
كلمني الشهيد 😢
قال انا حسي قاعد فوق👆
لكن بتلقاني 👇
في طلعة الشارع 🏃🏻
بهتف باعلا صوت 🗣
ماسك طرف علمي 🇸🇩
وسامع كلو جديد 👂
لو كنت في محلو 🧖🏻‍♂
لكنت حسي سعيد 😁
#الحل_فالبل
#الشارع_بس 🔥
#اصحااياترس 🔥✌


*# مليونيةة "30" يونيو*🇸🇩🖤.

هتاافاات 30يونيو ✌🏻🇸🇩

انته اشتريت وطنك..
لا خفته لا بعته ..
فلتحيا ياا استاذ ..👨🏻‍🏫
في دفتر الاوطان ..🇸🇩
صفحة كفاح وصمود ..✌🏻
ومحبة للسوداان ....
المجد للاستاذ 👨🏻‍🏫
والعار كل العار ...
لي كل خسيس وجبان...
من شلة الكيزان



#حنبنيهووو البنحلمبيهوو✌🏻🇸🇩

# لن ننسى ولن نغفر ✌🏻💔

فينا الشريف بندااس .. ثوورة
وسط الحرامية .. ثوررة
حتى القيم في الناس .. ثورة
مجدووعة مرمية .. ثورة
تسرق عرق عمال .. ثورة
وايدين مزارعية .. ثورة
تمرق تكدس مال .. ثورة
في بنووك سويسرية .. ثورة
تبني القصوور عاليات .. ثورة
منقووشة مطلية .. ثورة
جواها صف عربات .. ثورة
واعداد خيالية .. ثورة
جمب القصر تلقى .. ثورة
بييت اسرة محفوقة .. ثورة
لا لاقية تاكل عيش .. ثورة
لا كسرة محروقة .. ثورة
شفع صغار بالحيل .. ثورة
ضاميهم جسم نحيل .. ثورة
سااعة الرقااد بالليل .. ثورة
يتقااسمو الاوضة .. ثورة
شايلين همووم بكرة .. ثورة
كيفن يقومو شداد .. ثورة
يتعلمو ويقرو .. ثورة
يتووظف الاولاد .. ثورة
يتجدد التاريخ وشهادة الميلاد ... ثوورة

*# مليونيةة "30" يونيو*🇸🇩🖤.
*#ابقوووكتااار*🇸🇩🖤.

ي شهيد ي حي وعدتك تبقي زي م كنت تحلم**ماف كلام بسد فرقك قلبي مشتاق والله بعلم**اي سكه بديت نضالها نحنا حالفين الا تتم**
#خيانه_وطن
#ذكريات_القياده
#الرحمه_للشهداء💔

*# مليونيةة "30" يونيو*🇸🇩🖤.
*# ابقووو كتاار*🇸🇩🖤.

‏سيظل فض إعتصام القيادة العامة جرحنا الذي لا ينضب الي حين نصب المشانق 👌

*# مليونيةة "30" يوينو*🇸🇩🖤.
*# ابقووو كتاار*🇸🇩🖤.

صوت المطر خوان 💦..ذكرني ب يوم داك…💔 يوم كشه كان باسم…💔 وعباس كمان ثابت💔… يوم برعي كان بهتف💔… وكنداكه بس ترسم.💔.. واطفالنا ملمومين 💔💔..بالخوه متألفين بالوحده متكاتفين💔.. فاكرينه فجر جديد 💔غدرونا قبل العيد فرحتنا م تمت💔.. هتكو الشرف بضمير💔 ..وعروسنا غرقت دم...وعريسها اسمو شهيييد💔


*# مليونيةة "30" يونيو 🇸🇩🖤.
*# ابقووو كتاار*🇸🇩🖤.

جابوني ليك جثمان كفن
و انا كنت بهتف بالعديل
غدروني بي رمية بحر
طوبة و حبل و سقوني موية النيل غدر
و انا قلبي بالوطن انفطر
فقدوني اخواني الكتار
و لقوني لا حس لا خبر💔
#المجد_للشهداء


*# مليونيةة "30" يونيو*🇸🇩🖤.
*# ابقووو كتاار*🇸🇩🖤.

شهيدنا صوتو هنا..
في الجنة روحو هناك 💔
#ما تنسو شهدائنا.. ادعو ليهم بالرحمة والمغفرة 😊♥️


*# مليونيةة "30" يونيو*🇸🇩🖤.
*# ابقووو كتاار*🇸🇩🖤.

يازول ملازم البيت
يوم قمت واتحديت
بي كلمة بس هذيت
الليلة وين انت
دم الشهيد هنت
ارض الوطن خنت
خايف تلاقي الموت
الموت هو اصلا حق
بلقاك لو في الشق
احسن تقوم تطلع
حقك تشيل تقلع
قوم ياحبيب شارك
امرق مع المارق
خليك ابو مروة
زيد الجمع قوة
متن لساس بلدك
تلقاها دوام سندك😼✌🏽

*# مليونيةة "30" يونيو*🇸🇩🖤.
*# ابقووو كتاار*🇸🇩🖤.

يوم صبت المطره 💦 كل القياده دموع 😭 كل الوطن موجوع 💔😔 اتقاسمو السلطه حق الشهيد مبيوع 💔😭
انعل ابو العسكر منعول ابو العسكر💔الدمرو المشروع 💔 في ليلة العيد كم سقط منا شهيد 💔😭 كم من اخونا فقيد 💔😔
حالفين نجيب تارهم ونبني سودانا الجديد 🇬🇦✌
بس واجب علينا اكييد بل الجهاز العام وكل مليشيات الجنجويد 🔥✌
#المجد للشهداء ❤


*# مليونيةة "30" يونيو*🇸🇩🖤.
*# ابقووو كتاار*🇸🇩🖤.

يا والدة اعفيلي
وعدي القطعتو معاك
انو الكلام ممنوع
في شلة الحكام
يا والدة دمي بفور
لما البلد تغلي
لما العساكر ديل
الشوهو الاسلام
جايبين تفاهاتم
سجنونا بأسم الدين
حرقونا بأسم الدين
فصلونا بأسم الدين
قتلونا بأسم الدين
الدين برئ يمة
الدين بقول الزول
ان خلي حقو يموت
بيخاوي في الشيطان
الدين بقول تمرق
ما قال نشيل ساطور
نمرق نقيف في الضد
ونواجه الحكام
الدين بقول الزول
ان شاف غلط منكر
ما ينكتم يسكت
ببقي الغلط ستين
كوز السجم بغرف
في خيرنا ويتمتع
نحنا السقينا النيل
من دمنا الفاير
ما بننكتم نسكت
في وش عميل جاير
الخوف يمة الخوف
الخوف عديم الساس
وانا جدي ترهاقة
حبوبتي كنداكة
وعبد الفضيل الماظ
فراس بشيلو الراس
عيشتنا صبحت هم
وانا مشتهي الاعراس
يمة الشباب بحيو
وانا بالسكوت ميت
هزاع وسنهوري.أيمن وولي الدين
حازم وفاء أحمد وحنين حبيب القلب
ديل كلهم حيين
أكرم صهيب أحمد ومحمد الخاتم
مازن مني وعاصم لابسين حرير اخضر
سندس واستبرق وانا جلدي بتفرق
ساكت وبتفرج
وأم در عروس النيل
لابسة الرحط والحق
مليان بخور ولبان
ويزغردن نسوان
للكل يوم عرسان
وانا يمة دمي بفور
ما بنكتم واسكت
الا العسس دا يغور
إن كان سجن يمة
سجنا يكوسو رجال
سجنا ملان ثوار
ما قالوا فيهو سراق
ما أندس فيهو خائن
ما فيهو ولدا عاق
فيهو الشرف ذمة
فيهو الغباش دفاق
الضاق لهيب الشمس
راح يقهر الرقراق
وإن كنتي خايفة الموت
يمة الرجال احرار
شن فايدة العيشة
والروح مولعة نار
والطلقة يمة جواز
لي حقنا المقلوع
الطلقة يمة خلاص
لي زول خلاص موجوع
الطلقة يمة طلوع
من ذل مهانة وجوع
في ظل مصير مجهول
الطلقة يمة غسول
الطلقة يمة ثمن
لي كلمة سمحة وقول
الطلقة يمة حياة
لي زول جريح مقتول
زي وخزة الشوكة
اقصر كمان في الطول
قال المناضل يوم
الطلقة ما بتحرق
بحرق سكات الزول
الطلقة ما بتقتل
بقتل سكات الزول
يا يمة اعفيلي.......


*# مليونيةة "30" يونيو*🇸🇩🖤.
*# ابقووو كتاار*🇸🇩🖤.