مجتبى الصحن

اكو ناس شافت صدى موت احمد راضي مُبالغ بي ، وحجتهم يمعود عالم بالمئات تموت محد جاب طاريهم ، اكيد ماجيب طاريهم لأن مااعرفهم بس هذا مايخليني مااحزن عليهم واترحملهم وادعي الله يحسن اليهم ويصبر اهاليهم .

وفاة احمد راضي اخلي مقارنة بوفاة امي وابوية ، تعلقي وحبي اله نفس تعلقي بأهلي ، اني مواليد ٨٤ اول ماوعيت العب طوبة بالشارع مثالي احمد راضي ، ابوية مفرحة احمد راضي ، امي تحب احمد راضي ، اخواني وأصدقائي احتفلوا سوه بهدف احمد راضي ، احمد راضي جزء من طفولتي وذكرياتي ، فرحتي الوحيدة بأيام الحصار ، اروح البيت جدي بحي العامل انزل قبل البيت بكيلو متر حتى اشوف بيت احمد راضي ، شخص اله سبب بتكويني الشخصي لأن انسان عبارة عن صانع للفرح اليه والغيري ومااستوعب الهالحظة فقدانه ، فشخص غالي عليك من يموت الوحيد التبالغ بحزنك علّي بس انت لأن الوحيد العندك ذكريات وياه حلوه وميصير اجي اكلك تره بغير فرع اكو واحد مات شخبصتنا ، راح تعصب وتكله هذا اخوية المات ، ابوية المات ، صديقي المات

ذوله كلهم اتلخصوا بداخلي بشخص واحد اسمة احمد راضي ❤️

شاب عراقي مايكدر يتزوج مرة قرر يجيب بنت ليل يكضي وياها ليلة.
بنت اليل اسمها ليلى مواليد 92 مطلقه وعدها بنت صغيرة يم أبوها
وليلى من هي وصغيرة بيها ربو أبوها عرف بيها من اختنكت بالليل ورادت أمها وامها جانت بحضن واحد وعافتها هي وزوجها.
كبرت ليلى أخذتها أختها الجبيرة ربتها. أختها الجبيرة انسانة حقيرة تنام هي وزوجها بغرفتهم وتعوف ليلى تنام بالمطبخ بالحر.
جانت تخليها تطلع ساعه بالباب تباوع على البكدها يلعبون توكي. تتمنى تلعب وياهم بس اتخيلت راح ينبذوها مثل مانبذتها أمها واختها على مود غريزتهن.
مرة اجه أبوها الطيب شافها وانقهر أخذها من ظلم أختها وليلى فرحت راحت وياه. وداها للكاظمية كاعد بغرفه بخان بالبيوت القديمه.
ظلت يومية تروح للإمام تلعب ويه اطفال عوائل الزوار والعوائل يسألوها على أهلها ويبجون.
جان بجيهم هو المراد الحقيقي الراده موسى الكاظم قبل ليبوسون ضريحه بعاطفه مزيفه.
بقت ليلى يم أبوها سنة، بالأحداث راحوا السوريا ولحكتهم أختها الظالمه. صارت ليلى حلوه ومحط إعجاب كل من يشوفها بحيث من تفوت للسيدة زينب كل الزوار يباوعون عليها.
صارت تنقهر وتحس بمسؤولية من شافت أبوها كبر بالعمر ومن ينام يحجي ويه نفسه مثل الطفل اللابس دشداشه بوجه بريء.
جان أبوها يحب الجاي ويدخن هوايه ظلت يوميه تجيبله جكاير يستحي يسألها منين .يبقى كاتم سؤاله ويطلعه بحسره ويه الدخان.
أختها فرحت بسقوطها وزوجتها الشخص يتزوج ويتاجر بالنساء حتى تحصل زنجيل ذهب وهي الزنجيل الوحيد الملبسته الليلى هو زنجيل الملهيه من جان عمرها سنتين.
اشتغلت بالملاهي ونامت ويه ارذل البشر حتى تبقى عايشه
وضعها يشبه وضع العراق التافه النام وياها نفسه فجر نفسه بسوك شعبي ببغداد ، ليلى وبلدها اثنينهم بدون مستقبل وأرض خصبه للذئاب.
بعد فترة اتوفى والد ليلى بعد ماصارت بي جلطة بالطيارة من اخذه زوج ليلى يطلع ليلى بمحرم أبوها.
بقت هي بحضن واحد وبالها يم أبوها بالمستشفى. فلوس الدوه بفلوس الحرام يصير حلال
طلعت الفجر راحت لابوها لكته ميت وبصفه صورتها وعوده ينظف بيها أذنه من جانت تخابر ويسد سمعه حتى تبقى ليلى بنظره شريفه.
رجعت للعراق زوجها عافها من شافها مثل بغداد ذبلت
بقت تتمنى تشوف بنتها وماشافتها
راحتلها للروضه شافتها من بعيد ورجعت اتحسرت عليها مثل مااتحسر أبو ليلى على بنته.
قررت تطلع لجوء التركيا احتاجت مبلغ اخير من مال حرام تسافر بي.
طلعت ويه هذه الولد المحروم
كلتله تكدر تنطيني بعد فوك المبلغ الله يخليك
انقهر الولد كلها ذكرتيني بوحدة اتوسلت بيه من جنت صغير بضريح الكاظم رادت مني لفتي جانت جوعانه

البارحة امرأة عراقية بعيني شفتها تدور اكل من الزبل
فتحت علاكة شافت بيها تفاحة مسحتها بعبايتها وضمتها ، واجاني شاب يدور شغل يقسم بالسماوات والأرض عنده خوات ٢ وامه وفلس ماكو ببيتهم ومستعد يشتغل حتى لو يومية ٥٠٠٠
وهاي من ولد صديقي سمعتها ابنهم مختفي من الصبح لليل يدورون علّي ماكو ، بالأخير مخابرهم مطمنهم ، رايح من بيتهم بالأمين مشي للجادرية على ولد مشغلة حارس بشركة ويستحي يطلب كروة يروح بيها لأن اهله ماعدهم.
يلا مو مهم اهم شي تاج راسك مرتاح وشبعان ومستند عليك تدافعله وخلي العالم تجوع ، تموت ، تنذل، اهم شي هيهات منا الذلة.