Дин деганда нимани тушуняпмиз ўзи?
Айрим манзараларни кўриб эзиламан, чуқур ўйга толаман:
* Орқа ойнасига “Биз сизни кўрмасдан севдик, ё Расулуллоҳ!” деб ёзилган машина учинчи қатордан хавфли бурилиб, биринчи қаторга ўтади ва азон айтилаётган мачит ёнидан магнитофонниванғиллатиб ўтиб кетади;
* Ошқовоқ, қовун, қўзичоқ устидаги ёзувсифат чизиқларни “Аллоҳ” дея ўқиб ҳайратланганлар буни дарҳол “Яратганнинг қудрати” дея ўртоғига улашишга интилади. Лекин шу пайтгача яратганнинг бошқа қудрати ҳақида мулоҳаза юритмагани хаёлига ҳам келмайди;
* Ҳижоб остидаги киприклар шунчалар узун, шунчалар ярқироқки, пардоздан таранг тортилган юзга соя солгудек;
* Соқол кўкракни ёпади, лекин рангдор ва тор иштонлар киндикни ёполмайди, намозда белнинг бир қаричи очиқ туради;
* Илмий асосланган минглаб маърузалар айтилса қулоққа кирмайди, лекин эртаксифат битта ривоятга қараб дини Исломга баҳо берилади;
* “Жума муборак” деган ёзувли, олдида улкан ва қимматбаҳо автомобиль,узоқда мачит минораси сурати кўрсатилган табриклар йўллайдиганларнинг аксариятини жума намозида кўрмайсан;
*Бир етимнинг бошини силашга ярамаган қўллар қичқириғи ва муридларини сўкиши билан машҳур “домла”ни кўрганда оёғини силашга тайёр;
* Боболарининг илм ва эътиқоди бугунги тараққиётга бешик бўлган дин вакилларининг аксарияти бугун нанотехнологиялар ҳақида тушунчага эга бўлмагани ҳолда намозда қўл кўкрак устида ёки қорин устида туриши ҳақида соатлаб тортишади;
* Бошқа бирор жиҳатда шариатни қўллашни хаёлига келтирмаганлар қўшхотинлиликда шариатни шу қадар пеш қиладиларки, бу пешво қайси маъҳадда илм орттирди экан, деб ўйлаб қоласан.
(С) Аброр Зоҳидов
@nurbekalimov
