عمريّات 💬💙

🔵 قال صلى الله عليه وسلم:

من قال حين يصبح: اللهم ما أصبح بي من نعمةٍ أو بأحدٍ من خلقك فمنك وحدك لا شريك لك فلك الحمد ولك الشكر، فقد أدى شكر يومه
وتكملة من غير رواية: ومن قال مثل ذلك حين يمسي فقد أدى شكر ليلته

مرة اول ما تفيق ومرة قبل ما تنام.. بتكون شكرت الله عن ليلتك ونهارك 🌚💙

سنة الامتياز ❌
سنة النصب عالطبيب المقيم ✅

الف مُبارك لمعشر الأطباء المقيمين وطلاب الطب 🌚🔥🔥

🔴 أفتّانٌ أنت يا معاذ؟

لما كان سيدنا معاذ ابن جبل عم يصلي إمام بالناس بصلاة العشاء.. ويطيل كتير بالصلاة
وصل هاد الأمر للنبي وقال له: أفتّانٌ أنت يا معاذ؟ (بمعنى انت عم تنفر عن الدين وتصد عنو)؟

هاد البوست موجه الي كصاحب قناة.. والأصحاب القنوات يلي عم يقرؤوه.. ولكل واحد عندو منبر دعَوي
وللعالم يلي عم يبعتولي احيانا عالصراحة او بيحطوا اقتراحات

الاطالة بالصلاة بحد ذاتها منيحة ولا لا؟ اكيد منيحة ما انت قاعد عم تناجي رب العالمين

🔵 طيب ليش سيدنا محمد نهاه عنها؟
لان العالم مو كلها باستطاعتها متل يلي باستطاعة سيدنا معاذ.. وفي عالم عندها التزامات اكتر ومشاغل اكتر ما بتحسن تلتزم متلو بالصلاة الطويلة تبعو

معناها انت لازم تشجع العالم عالعبادة وتجيبن لطريق الهداية بس بالتدريج وشوي شوي وبدون تنفير
التشديد بيضر.. التنفير بيضر.. الأسلوب اللئيم بيضر.. إنك تحسسو دائما انو هو كتير فاشل كمان بيضر

🟢 أمثلة من عندي مو من باب شوفة الحال وإنما بس من باب اني أعرض فكرتي منيح وتوصلكم مقاصدي
◽️ كنت بدي أعرض تحدي ال 100k صلاة عالنبي قبل ما بلش فيها انا.. ونبلش فيها سوا

بس انا لا كنت بعرف صعوبة التحدي ولا كنت بعرف كيف بدي شجع العالم يفوتو فيه وما يحسوا انو الموضوع مستحيل.. لهيك قررت ساويه انا اول شهر وشارك تجربتي ليكون الموضوع قابل للتطبيق الطبيعي ومو شغلة من الخيال

◽️ للي عم يقلي صيام تنين وخميس.. كتير كتير ممتاز وحلو.. بس كيف بدك واحد ما بيصوم الا برمضان تقلو ضغري صوم تنين وخميس بكل حياتك؟
انا ما بحسن وانت وهو غالبا ما بيحسنو وصعب عليهن

◽️ عطينا كل يوم سنّة نلتزم فيها
طيب مستحيل انت بالاسبوع الواحد تضيف 7 سنن.. ولا حتى بالشهر فيك تضيف على نظامك اليومي هيك عدد من الالتزامات

ما رح تحسن تمشي عليه ورح تتعب وتبطل

🟡 لهيك راعوا قدرات الناس الطبيعية ولا ياخدكم الحماس فتحرقوا الطبخة...تركوها تستوي على نار هادية وقربوا شوي شوي 🌚💙

كالعادة اسف عالاطالة 😂
وشكرا كتير للقارئ يلي مأحسن الظن فيني وبيوصل دائما لاخر البوست 🫡🔥

عم تجيب شي سُنن الوضوء ولا بتشبل وبتمشي؟ 🌚

🔵 قال صلى الله عليه وسلم
ألا أدلكم على ما يمحو الله به الخطايا ويرفع به الدرجات؟ قالوا: بلى يا رسول الله، قال: إسباغ الوضوء على المكاره، وكثرة الخطا إلى المساجد، وانتظار الصلاة بعد الصلاة، فذلكم الرباط

هلق المي باردة والجو برد؟
هية هية المكاره

هون بيكسب يلي وضوءه زابط وموافق لوضوء سيدنا محمد صلى الله عليه وسلم

تعلم سنة سيدنا محمد صح
وبعدها جاهد نفسك على اغتنام الخير

وابواب الخير يا لطيف شو كتيرة ويا لطيف شو الدخول منها سهل
معقول تتكفر ذنوبك بس لانك تحملت المي الباردة شوي؟ 🌚🔥

🟢 وبالنهاية قال صلى الله عليه وسلم:
من تمسّك بسنتي عند فساد أمتي فله أجر مئة شهيد
تمسّك بالسنّة وعضّ عليها بالنواجذ.. ورح تكون من الرابحين المفلحين ان شاء الله

🔵 مساء الخطط والبرامج 😂💙
بدون مقدمات.. جاهزين كل واحد يقوم يعمل برنامج دراسة؟ 🌚🔥

رح اختصر حكي واكتب بس الشي العملي

لحتى يكون برنامجك ازبط ما يمكن.. إنت بحاجة عدة مقومات
1⃣ انك تفهم منيح شو المنهاج يلي فايت تدرسه
2⃣ انك تفهم منيح شو الالتزامات يلي عليك وشو الايام يلي فيك تدرس فيها كتير والايام يلي لا
3⃣ انك تكون واقعي وما تجرب ابدا تحط خطط السوبرمان
4⃣ انك ما تستسلم ابدا واذا كربجت بيوم تفرط كامل البرنامج

🔵 افهم المنهاج

🔹 اول شي يباشا بتمسك ورقة بتكتب عليها كل المواد يلي عندك
🔹 بعدين بتاخدن مادة مادة.. وبتروح بتشوف مين الدكاترة الصعبين وبدن شغل.. ومين يلي بيتمرقوا قبل المادة
وبتسجل هاد الحكي عندك وبتحط خط تحت الدكاترة الصعبين
🔹 بتعمل هيك بكل موادك.. وبتحط بكل مادة شو دارس منها انت من قبل كمان

🔹 بعدين بتشوف برنامج امتحان السنة الماضية لتشوف شو المادة يلي وقتها مضغوط عادةً وشو المادة يلي وقتها مرحرح.. مشان تعرف شو المادة يلي الها الاولوية بالدراسة

2⃣ افهم التزاماتك

على الوجه التاني من الورقة بتكتب شو عليك التزامات خارج الدراسة
وكل التزام بانو يوم بيكون
اي شي.. دروس جامع.. تسميع قرآن.. دورك بالطبخ والجلي

3⃣ انك تكون واقعي

شفت النتيجة يلي عملتا تبع فهم المواد؟
بتشوف كم يوم ضالل عليك من هون للامتحان وبتحطن قدامك
مثلا 35 يوم: بتقسمهن على المواد تقسيم تثقيلي.. يعني ممكن تعطي لمادة 5 ايام ولمادة يومين حسب ما بتشوف كل مادة شو لازمها

وهون بدك تعرف انك مارح تحرر القدس بالبرنامج ولا رح تختم كل المواد.. وإنما رح تاخد القدر يلي فيك تحملو فقط
وعصفور بالايد أحسن من 10 على الشجرة

بعدين بتحط الترتيب يلي بدك تدرس المواد فيه مشان تبنّدن اخر شي بالترتيب

4⃣ كتابة البرنامج بقى

🔵على ورقة منفصلة.. اول عامود بتكتب فيه كل الايام الباقية من هون للامتحان
🔹 اول شي بتعمله انك بتحذف كل الايام يلي مانك حسنان تدرس فيها
مثلا انا حذفت يومين لمقابلة العملي يلي عليي
وكل ايام الجمعة يلي جاية

🔹 بعدين كل التزاماتك بتنزلها.. مثلا هاد اليوم في درس.. هاد في عرس.. مشان لما تحط الدراسة تشوف هاد اليوم شو وضعو

🔹 انا بفضل انك بعد كل أسبوع تفرغ يوم للتقصير او تفرغ اخر شي 3 ايام للتقصير
اذا. كتير كتير مزنوق لا تفرغن

🟢 العمود التاني بتنزل فيه المواد يلي بدك تدرسها.. بحسب الترتيب يلي انت رتبتو
اذا اتفقنا مثلا عندك الكلية وقررت تحطها اول شي وتعطيها 5 ايام
بتشوف شو اهم الدكاترة يلي لازم تدرسهن بال 5 ايام.. وبتشوف كل محاضرة كم صفحة وشو مستواها.. لتعرف قديش فيك تدرس

وبس خلصو ال 5 ايام بتنتقل للمادة يلي بعد.. هيك ليخلص العمود التاني بكل الايام

🟡 العمود التالت.. وهاد إضافة جديدة لبرنامجي بصراحة
لحتى اخلص من قاعدة الكل او اللا شيئ يلي عندي.. صرت قيّم يومي بنسبة مئوية.. لهيك هاد العمود عنوانو نسبة الإنجاز.. بتكتب فيه كل يوم قديش بتقدر انجازك الدراسي (80٪ مثلا)

🔴 العمود الرابع.. هو: الشغلات يلي قلت انك بدك تدرسها بس ما درستا

اذا بدك برنامجك ما يفرش بيومين بدك تكون مرن فيه.. لهيك حطيت اخر عمود
وانا قلت اني مفرّغ ايام للتقصير
بجي بشوف شو تركت بقلب هاد العمود وبدرسن

◽️ ملاحظات
اذا لا سمح الله كتير كربج معك البرنامج شو تعمل؟
ببساطة يا عدل عليه واختزل من يلي كنت كاتبو بحيث تكمل
يا اذا ما عرفت تعدله.. كتوب واحد جديد 🌚💙

قولاً واحداً.. 90٪ انك ما رح تدرس كلشي كاتبه لان الحياة مليانة متغيرات
بس 100٪ انو دراستك وانت كاتب البرنامج احسن بكتير من دراستك بدون ما تكتبه

لهيك لا تدرس ابدا بلا برنامج ولو كان الامتحان بعد يومين

هي مانها الخطة الوحيدة لوضع البرنامج.. وإنما هي خطتي يلي بمشي عليها

شوف مثال تطبيقي عن الحكي بالتعليقات

احم
استعدوا نفسيّاً لبوست بدو كتير شغل
مخصص للمزنوقين متلي 😂😂💙

🔴 تذكير من هلق لحتى تعملوا حسابكم

بكرة يوم تنين = صيام 🌚💙

يمكن من هون لرمضان في شي 10 ايام تنين

عميل شي جانبي على جدول مهامك..وحط فيه خانة لصيام التنين من هون لرمضان .. مشان كل ما تصوم تحط ✅ وهيك لرمضان بتلاقي حالك عامل انجاز محترم

صدقني مارح تسخى ما تصوم وتحط ❌.. والموضوع بساعدك شوي بالتحفيز والتذكير ان شاء الله

علما اني رح ذكركم كل اسبوع باذن الله 😂💙

🔵 قال صلى الله عليه وسلم
إن الله يبسط يده بالليل ليتوب مسيئ النهار ويبسط يده يده بالنهار ليتوب مسيئ الليل

هو الإله ونحنا عبيده.. ومع هيك هو دائما بانتظار توبتك
بتتوب بالنهار بيستقبلك.. بالليل بيستقبلك
باي لحظة بتدق الباب بيفتحلك

في عندك شي حجة لحتى ما تتوب؟
اذا رب العالمين سألك يوم القيامة.. ليش ما تبت من ذنوبك عندك شي جواب؟

{ولا تيأسوا من روح الله إنه لا ييأس من روح الله إلا القوم الكافرون}

صباح الخير 🌚💙

حديث طويل بس كتير مهم والله.. اقرأ بتأمّل وتمعّن

🔵 قال صلى الله عليه وسلم:
ضرب الله مثلا صراطا مستقيماً وعلى جنبتي الصراط سوران فيهما أبواب مفتحة، وعلى الأبواب ستور مرخاة، وعلى باب الصراط داعٍ يقول: يا أيها الناس، ادخلوا الصراط جميعا ولا تعوجوا، وداع يدعو من فوق الصراط، فإذا أراد الإنسان أن يفتح شيئا من تلك الأبواب، قال: ويحك، لا تفتحه؛ فإنك إن تفتحه تلجه .
فالصراط الإسلام، والسوران حدود الله، والأبواب المفتحة محارم الله، وذلك الداعي على رأس الصراط كتاب الله، والداعي من فوق الصراط واعظ الله في قلب كل مسلم .

الحديث مليان مبادئ ومواعظ والله

🟢 اذا بتلاحظ من الحديث.. الأبواب يلي بتوصل عالمحارم مفتوحة.. وبينك وبينها في بس ساتر
بس الانسان بطبعو فضولي كتير
ومفكر حالو بطل خارق.. بيفوت بيستكشف وبيطلع وأموره بخير

مع انو رب العالمين عم يخبرك انو انا حاططلك واعظ بقلبك.. شي من جواتك بيقلك دير بالك..
🔹 هاد الباب ما بصير تفوتو
🔹 هي الشغلة مو منيحة بلالك ياها
🔹 هي القصة حرام حتى لو اختلف شكلها واسمها وعنوانها وتزينت وتحضّرت والعالم كلها حاببتها.. بس والله انا شايفلك ياها حرام

بس المشكلة انو دائما جهاز الانذار بيكون شغال للاعطال الصغيرة
لما تكتر الأعطال حتى جهاز الانذار بيخرب وماعاد يرن 🌚💔
دير بالك على المنبه تبعك.. اوعك تخسره بكثرة الأعطال

ويحك لا تفتحه فإنك إن تفتحه تلجه

حفظها كتير منيح.. إنت مانك خارق.. إنت إنسان.. وشو قال عنك رب العالمين؟
وخُلِقَ الإنسان ضعيفاً

لا تجرب حالك مع الفِتن.. ولا تجرب حالك مع الحرام
لأنك اول ما تفوت راسك رح تفوت كلك.. واول ما تفوت رح تغرق

فهام ضعفك منيح... وتقبله... واحمي حالك على أساسه.. والتجئ دائماً للقويّ المتين

🔴 من بكرة بيكون ضالل 42 يوم للامتحان

بدون 10 ايام لاول مادة بيضل 32
منحذف 5 ايام جمعة (الجمعة مستحيل يندرس فيه) بيضل 27
منخلي 3 ايام على جنب لاني ما بحب الكسور
بيضل 24 يوم ل 6 مواد

4 ايام للمادة

للي عندو نفس الزنقة بكرة رح ورجيكم كيف تعمل برنامج تطلع فيه بأقل الخسائر وانت عم تدرس كل 4 ايام مادة 🌚💙

(خبرة 4 سنين بالموضوع) 🔥

🔵 قال صلى الله عليه وسلم:

إن لكلِّ دينٍ خُلُقاً.. وإنّ خُلُق الاسلام الحياء

بدي عيش 12 يوم بالبيت بدون وجود أيدي نسائية 🌚💔

فرصة مناسبة لقيّم الخبرات يلي اكتسبتا خلال 3 سنين بالسكن الجامعي.. لاعرف بكرة شو قول لبيت حمايي 😂😂😂😂

🔵 للوحوش يلي ماشيين لسا بتحدي الصلاة عالنبي..
اليوم هو يوم تحطيم الأرقام القياسية 😂💙

يوم جمعة = عدد خارق من الصلاة عالنبي
وبنفس الوقت بيكون اليوم هو ترميم اذا في شي تقصير صاير من قبل
يعني من الآخر ممنوع يكون في على عدادتك اقل من 5000 😂🔥

🟢 للي مانن وحوش ومانن ماشيين بتحدي الصلاة عالنبي
شو باشا؟.. اقل من انو يوم بالأسبوع تلتزم فيه بالصلاة عالنبي؟ 🌚
جرب حالك معنا اليوم ما تترك العدادة من ايدك والتزم بالصلاة عالنبي طول النهار
خلص تعودوا انو يوم الجمعة هو حصّة سيدنا محمد صلى الله عليه وسلم 🌚🔥

وصباح الخير 😂💙🌸

🔵 نحن منعرف انو رب العالمين يعلم ما كان وما سيكون وما لم يكن لو كان كيف يكون

يعني رب العالمين بيعرف انو مثلا بعد 1400 سنة رح يجي كفار يحاولوا يطلعو شبهات حول بدايات السور مثل (الم- كهيعص)

ورب العالمين بيعرف انو في عالم رح تفرش بالآيات تبع القتال.. او الآيات المنسوخة حُكماً

مع هيك رب العالمين نزل القرآن متل ما قدّر
ليش طيب؟

🟢 خلينا نقرأ هالكم آية:
◽️ إنَّ الله لا يستحيي أن يضرب مثلاً ما بعوضةً فما فوقها فأما الذين آمنوا فيعلمون أنّه الحق من ربهم وأما الذين كفروا فيقولون ماذا أراد الله بهذا مثلاً

◽️ هو الذي أنزل عليك الكتاب منه آياتٌ محكماتٌ هنَّ أمّ الكتاب وأخر متشابهات
فأمّا الذين في قلوبهم زيغٌ فيتبعون ما تشابه منه ابتغاء الفتنة وابتغاء تأويله

ولله المثل الأعلى.. اذا انا بدي اختبر ثقتك فيني كطبيب
وجبتلك فنجان لونه اسود عم يغلي وريحته بشعة كتير ومكتوب عليه: فنجان مسمم.. وقلتلك لا تقرب عليه
بتقرب؟ لا.. ليش ؟
مو لاني انا قلتلك.. لان مبين أشكرة انو مسمم يعني ما اثبتت ثقتك فيني وانما اتبعت الحقيقية الواضحة وضوح الشمس

طيب اذا جبتلك فنجان شاي طبيعي.. ظاهره بيقول انو شاي.. وانا قلتلك وثاق فيني ولا تشرب هاد مسمم
فهون انت اذا شرب معناها مانك مؤمن بقدرتي كطبيب واذا ما شربت معناها في ثقة

ولله المثل الأعلى

يعني هاد التمييز بين المؤمن والكافر هون شو هو؟ مو انو واحد ذكي وواحد غبي
لا.. هو واحد لما ما عرف الحكمة ما شك ابدا وضغري سلم لرب العالمين وعرف انو السبب هو قصر نظرو وقلة علمو
والتاني شو؟ ماذا أراد الله بهذا مثلاً
اعتراض على حكمة الله

🟡 رب العالمين قال ببداية سورة العنكبوت
أحسب الناس أن يتركوا أن يقولوا آمنّا وهم لا يفتنون، ولقد فتنّا الذين من قبلهم فليعلمنّ الله الذين صدقوا وليعلمنَّ الكاذبين

نحنا عايشين بدنيا تمحيص للمؤمن.. واختبار لصدق إيمانه بحكمة الله تعالى

اذا بدك تشغل مخك بكلشي مو غلط تتفكر وتدور عالحكمة
بس لما يوقف مخك وما تحسن تستنتج شي
متل آية حكمها منسوخ وانت هلق ماعم تستفيد من الحكم
رح تعترض.. ولا تقلو سمعاً وطاعة يارب.. تعلم ما لا أعلم

🔵 وهاد الموضوع هو إسقاط على كل الحياة مو بس عالقرآن ولكن انا حبيت انطلق من القرآن لان الكل مسلّم انو كلشي بالقرآن هو لحكمة.. ومعاني القرآن واعجازه مستمر ليوم القيامة

بس بكل أمور الحياة وبكل لحظة
بتمرق عليك أمور او أفعال بتقول.. يعني ليش هيك صار؟
معقول رب العالمين يعمل فينا هيك؟
ليش رب العالمين تارك هدول يعملوا هيك؟

تذكر انو: وليمحّص الله الذين آمنوا ويمحق الكافرين.. بهي اللحظات بالضبط رح يبين اذا انت إيمانك برب العالمين قوي ولا متزعزع
اذا عندك يقين ولا لا

لما تجي شغلة فهمك قاصر فيها.. رح تسلّم لحكمة رب العالمين ولا رح تعترض؟

طبعا هاد أحد المعاني الكثيرة الكثيرة
بس يلي عم يصير معنا هلق كتير محتاج هالمعنى

إنك تسلّم لله.. تسليم مطلق بدون اعتراض
في حكمة وراء كلشي.. مآمن بالحكمة حتى وانت مو شايفها؟ 🌚💙

الله يلهمنا حسن الظن به وحسن التوكل عليه والرضا الكامل بقضاؤه

رح راعيكم ووقف هون 😂💙

المهم
تاخدولكم بوست طويل واسرد على كيفي ؟ 🌚🔥

ولا الحالة صعبة واختصر الجواب