الشاعر ابو فاطمة الطائي

للسيده شريفه سلام الله عليها



فارگتهم ضيعتهم
لا والي عندي ولا دار مثل الخيم بيّه نار
__________________________

ويلي الشريفه والدمع يجري ادموم
ودلالها شايل جبل مال اهموم
حسراتها اتبچّي الصخر ع المظلوم
عطشان ذبحوو والفرات ابكتره

ماتنسه لوعة كربلا بيها اشصار
يوم الزمان ابلا رحم بيهم دار
بين الشمر وي حرمله وبين النار
وعمها التوده . الخيل داست صدره

بيها الگلب ضل محتار مثل الخيم بيها النار
فارگتهم ضيعتهم
__________________________

ابنيت الهواشم والنعم رفعة راس
مهيوبه اجت اويه الضعن كلها احساس
العمتها زينب رافگت والعباس
اربات المشايخ چان ابوها اشكبره

امدلله ابنيت الحسن بت اشيوخ
يم بابهم نوگ اوزلم چانت تنوخ
ياوسفه وعليهم علت ناس امسوخ
خلو گلبها يستعر چن جمره

وادموعها اتصب مدرار مثل الخيم بيها النار
فارگتهم ضيعتهم
__________________________

محتاره ضلّت بالخيم بس اتلوب
فص عينها ابگد الدمع راح ايذوب
ابهالحال وتداوي الوگع والمصيوب
وايديها ترجف خايفه لتلچمه


كل ساعه من يمها طفل رايح جاي
عطشان يصرخ مومتت وين الماي
بعيوني مامش كل دمع صاحت يوفاي
امنين اشربها اوعلي ملتمه

الزينب اتدير انضار مثل الخيم بيها النار
فارگتهم ضيعتهم
__________________________

واشلون بيها اويه الحرم مر الليل
ما خلّه عدهن عافيه أولا ضل حيل
ادگول بيها امن التعب داست خيل
وامست رچيچه امضعضعه اومالومه

ابگد دمعها الصبته بيها اجروح
مابيها تبچي او لا بعد بيها اتنوح
تاليها طلعت بالسبي منها الروح
ماتت وحيده امن الاهل محرومه

هيج الوكت بيها اندار مثل الخيم بيها النار
فارگتهم ضيعتهم
__________________________

ماتت شهيده بالسبي وااويلاه
وربك اسمها اعله الخلگ قد علاه
على شريفه ابكل وكت صلى الله
واعليها سلم كل صبح يوميه

ربّك گبرها ايقرّبه واختاره
وخلّاه سرّ امقدّس امن اسراره
قبله اوتگصده المرضه والمحتاره
واللي گصدها حاجته مگظيّه

واحد مثلها ما صار مثل الخيم بيها النار
فارگتهم ضيعتهم
__________________________

منها المعاجز شاهدت هالوادم
الي گصدها ابحاجته مو نادم
كلش رحيمه اوتشبه الچف فاطم
الروحه ميته يمها ترجع حيه

بنت الكريم اشنحچي مانوصفها
من تعتنيها اودمعتك تذرفها
ابجاه الحسين ولوعته حلفها
صدگني ترجع حاجتك مگظيه

من جودها الكل احتار. مثل الخيم بيها النار
فارگتهم ضيعتهم
__________________________


ابو فاطمة الطائي

يخو زينب دخيلك .. يخو زينب
___________________________

يخو زينب يالصميده
سيفك ايدورله صيده
هاي روس ومو بعيده دنگت گدامك

بيك گد الكون غيره
شيخ انت للعشيره
كربله اگبالك زغيره ما تسع لجدامك

ريح صرصر حوّطت بالحومه
اگبالك الوادم تهد مهزومه
البطل شارد ابطرگ اهدومه
امن الخوف گلبه واصل البلعومه

يخو زينب دخيلك .... يخو زينب
___________________________

گال بيدي الطف افرها
وكل شواربكم اجرها
ألحرب بيدي أمرها چلمتي مسموعه

ابروسكم املي المعاره
سيفي ماترهمله چاره
بيده جنه اوبيده ناره والحشر موضوعه

ضيف عزريل اعتنالي الداري
وٱنه معروف ابكرم بتاري
كون اذبحكم هلا الخطاري
يشهد اعليه الجليل الباري

يخو زينب دخيلك ..... يخو زينب
___________________________

زينب اتحشم گمرها
يابعد روحي وذخرها
كون لعيوني تسرها من تطب ميدانك

الماي مايمنعوك عنه
خلي للبتار رنه
والنهر دم يجري منه من فعل ذرعانك


نار أبراهيم بين أعيونك
انت سبع ابحور ميطفونك
شنهي الٱف اربعه ايمنعونك
والله عشر ٱلٱف ميلاوونك

ياخو زينب دخيلك ..... ياخو زينب
___________________________

گال يازينب ابشري
الشجاعه بيّه تسري
الماي وين اليوم يجري كون أصل لحدوده

أربع آلاف ابعددهم
اصبعي كافي يردهم
ٱنه موت آنه وعدهم حملتي مشهوده

اليوم شوفي الشيف شوفي أفعاله
مايميز راجله أو خياله
سيفي حز ارگابهم يحلاله
يقبض ارواح الوحي اوحاله

يخو زينب دخيلك .... يخو زينب
___________________________

يلكد ابمهره اوگصدهم
سيل بكتاره مردهم
صار ياخذهم يردهم يحكم ابچفينه

من خزرته اطيح ميه
صار بالطف مرجعيه
اتقلده املاك المنيه. كلهم ايقلدونه

داس فوگ الروس يتمشه ابفخر
ايحاچي اشّط گاله ها يالنهر
شنهي حسبالك أخاف امن الخطر
والله اوصلك لون يم القمر

ياخو زينب دخيلك .... يخو زينب
___________________________


والله يالشاطي أذلك
چان ماتعرفني اگلك
ٱنه اشدنّك واحلّك انه ابن كرارها

استمعلي وعالي صوتي
يانهر ميهمني موتي
المهم زينب سلوتي ما يهل مدرارها

زينب اوسكنه غلاهن بالعمر
العطش لو بيهن اسمعته يمر
والله روجاتك احولها جمر
وما اسامح . منك واقبل عذر

ياخو زينب دخيلك .... ياخو زينب
___________________________


ابو فاطمة الطائي

ومن الارشيف ايضا لزيد الشهيد سلام الله عليه...

اليوم يومك يازيد بالحومه
.......................................

يللي مثل حسين وحدك للصلح ولدين جدك طالع لهل غايه

كربلا ابروحك اثرها والخيم يلهب جمرها وروحك امچوايه

عيونك اتشوف المخيم نار والنهران من دم من تطيح الرايه

والفرات ايهز كيانك هو تسبيح واذانك هو المصلايه

والروح لطيحت عباس ملچومه

.......................................

اليوم يومك بالحرايب ياشهم وابن الاطايب ياورث عباسها

كمل الثوره الشريفه واهدم اركان السقيفه لاتخلي بساسها

جدك الليث الغضنفر بيدك انت الموت لحمر وتقبض لانفاسها

الشرع مدلك ادينه عليك بس مشدوده عينه اقرع لاجراسها

بعيونك خطه وللثار مرسومه

.......................................

سمي بسم الله كبر هذي روس وبيها طبر خل تصيح التوبه

هو ملچ الموت يحسب انت بس اعليك تضرب يمنتك مهيوبه

خله عزرائيل يگعد انت بيدك بيهم احصد والعدد بجبوبه

سيفك يلوگ ابگصصهم خل يموتون ابغصصهم موتت المنكوبه

خل بسبح كلمن عاداك بدمومه
.......................................

زيد واسمك كله هيبه عيّش اعداك ابمصيبه تنتحب خلاها

وين ماتشرد تشوفك چنها گاع الله چفوفك حارت ابمنواها

منك المتلوحه طبره يموت بس عينك تخزره خزرتك محلاها
ماهي بس اعداك تنزف الارض جواك ترجف تزلزلت معناها

وعروش الطاغي العاداك مهدومه

.......................................

صيح بيهم صيحه وحده حته للميت تگعده خل يفز من نومه

آنه ملچ الموت اني بالحرب عباس ثاني يلله هاي الحومه

يالله وين الحاربوني مو زلم چا مايجوني ما اضن ملزومه

هذا انه وهذا سيفي اليوم امحيها اعله كيفي حتى لو مهزومه

وتصير انفاس الگوم مكتومه

.......................................

نعرف اوليد السقيفه بالغدر طعنات سيفه طبعه غدار

حسبو غدروك فازو ياشهيد وبل تجازو حسره والنار

خالد واسمك مناره تبقى للعالم شعاره زيد الاحرار

وينه خصمك هسه وينه ما اثر منه لگينه ماله تذكار

باقي انت وي التاريخ كل يومه

.......................................

ابو فاطمة الطائي

من الارشيف
شوط كربلائي لزيد الشهيد سلام الله عليه...

يازيد الشهيد البيك دين الله ارتفع راسه
........................................

يافخر الهواشم ليك هالشيعه اعتنت صوبين
تواسي المصطفى الهادي وتهلها دموع العين
يازيد الفخر والزود يالماشي اعله نهج احسين
ومضحي ابگطع نحرك خاطر يرتفع هالدين

من دم رگبتك مولاي شرع الله صبح ساسه
يازيد الشهيد البيك دين الله ارتفع راسه

........................................

يمكمل طريج احسين ورافع للشرع رايه
هيهات اعله ذله انبات ترددها لهل احچايه
ان چان انذبح عطشان جدي وما شرب مايه
لخلي الماي يجري دموم واكتب للحرب آيه

وارث من گمر عدنان زود وغيره وحساسه
يازيد الشهيد البيك دين الله ارتفع راسه

........................................

ياچلمة رفض للضيم يمجدد عهد هيهات
صوره من الطفوف احويت بس بيها طفل مامات
صوره ابلا نهر وچفوف لا بيها انسبن حرّات
بس بيها نحر مگطوع وراس ابحوزة الشمات
علنخله جسم مصلوب باقي بهيبة انفاسه
يازيد الشهيد البيك دين الله ارتفع راسه

........................................

يازيد ابوكت لحساب واحد بس عدوك شاف
بيمينك ملايك موت وبيسارك جيوش الاف
من احسين ماخذ زود ومن عباس بيك اوصاف
جيش الگابلك مرعوب كل ضالم يشوفك خاف

واحد يردم الواحد چنها اتشوف عباسه
يازيد الشهيد البيك دين الله ارتفع راسه

........................................

صح راسك تصوب طاح وعلنخله انصلب جسمك
لاچن باقي فوگ الفوك وبعلو النجم اسمك
وبقيت ابكل گلب مولاي ونداس او وگع خصمك
وغدينه افواج بعد افواج نگصد يم گبر ضمك

ويعتبره نصر مشهود اليوصل گبرك وجاسه
يازيد الشهيد البيك دين الله ارتفع راسه

........................................

اليوصل يم ضريحك فاز ويرضي الطاهره البضعه
تشوف اليگصدك هاليوم واليبچي ويهل دمعه
واليندب عليك ب آه تون وياه وتسمعه
وتسجله باسم خدام زيد وهيه التوقعه

ويهنياله اليفوز بهاي فوز وعالي مقياسه
يازيد الشهيد البيك دين الله ارتفع راسه

........................................

ابو فاطمة الطائي

سريعه للامام السجاد عليه السلام




هذا السجاد هذا السجاد
ماناسي الطف اويومه
ويلي الچبده المسمومه
___________________________

عايش بالدمعه احساسه
عاشور ابنص انفاسه
ويلي الطف شيب رأسه
بين احسين اوعباسه هذا السجاد

ابگد الدنيه اهمومه
ويلي الچبده المسمومه
___________________________

جفنه امساهر ليليّه
يبچي الجثه المرميه
ينعه اويقره ابمرثيه
ويرد ينصب لطميه هذا السجاد

واسود كل يوم اهدومه
ويلي الچبده المسمومه
___________________________

ايلوج اوتجرح وناته
ذايب گلبه ابحسراته
غيمه اوتمطر دمعاته
ناسي النوم اولذاته. هذا السجاد

الون واصل لنجومه
ويلي الچبده المسمومه
___________________________

يبچي واتخنگه العبره
لمصيبة ابن الزهره
واشفاه الي متفطره
ايذبحو والماي ابكتره هذا السجاد

واتلاثه ايضل بالحومه
ويلي الچبده المسمومه
___________________________

بس الهم ضل يبراله
من يذكر ذيچ الحاله
جابه امچتف چتاله
دمعاته ابدم هماله هذا السجاد

امن الگيد اتسيل ادمومه
ويلي الچبده المسمومه
___________________________

منّه الرايح شيعيده
ضايع كلشي من ايده
والسم الٱم ايزيده
لايج والموت ايريده هذا السجاد

كل الدنيا المذمومه
ويلي الچبده المسمومه
___________________________

ماتبره ابيوم اجراحه
ينحب ليله ومصباحه
رايد بالموت الراحه
صبره امضيع مفتاحه هذا السجاد

تاذي اجروحه المالومه
ويلي الچبده المسمومه
___________________________

سموه اوفاضت روحه
مات اوما بطل نوحه
ولا طابت ذيچ اجروحه
الا ايشاهد مذبوحه هذا السجاد

وذيچ اعظامه المهشومه
ويلي الچبده المسمومه
___________________________

غمض والدمعه اتلالي
راح ابن احسين الغالي
ويلي اعليه اويا ويلي
يادمعاتي دم سيلي هذا السجاد

مات ابحسره المحتومه
ويلي الچبده المسمومه
___________________________


ابو فاطمة الطائي

ميمر للامام السجاد عليه السلام



سمّ او رمح
جرح ابجرح
زين العباد السجاد ... مات أو دمع بعيونه
_______________________________

روحه الهضايم ياوسف تاليها. (( توليها ))
ويوميه قصة كربلا تاليها
تاليها مسموم ابغدر تاليها

نفس الرجس
اليوم اوأمس
الذبحو ابوه العطشان رجعو اله ايذبحونه
_______________________________

زين العباد الساجد ايسمّونه
اشذنبه وولاد الخنه ايسمّونه
أنواع العذاب ابدنيته ايسومونه

من كربلا
امعلعلا
روحه فلا شافت روح دوم ابقهر محزونه
_______________________________

مو مثله يعگوب النبي. شاف الهم
اولاده ماهي امفطّره شاف الهم
اولاعلوطيه اموذره شاف الهم

اومن السفر
اعمه النظر
چا شنهو بحواله ايصير. لو يسمع ايرضونه
_______________________________

زين العباد ابكربله عمّه الهم
من شاف اهله والذبح عم الهم
اشلون منهم راح ابو . اوعم الهم

چنه الگمر
يم النهر
ايوزع ثواب اعله الماي من جربته الميمونه
_______________________________

امغيم سمّاه امن الحزن ماصاحي
ودلاله من طف كربلا ماصاحي
گالوله گلبك بي نبض ماصاح أي

حافر فرس
ابصدره انغرس
ماينبض اخلاف احسين خصم الحچي اومضمونه
_______________________________

ذكرهم ابحيدر علي من سالف. (سالف الدهر))
اعروش اميه اتزلزت من سولف
عن الشجاعه ابوگفته. منسولف

يم الطغو
واعليه بغو
ماهايب اسيوف الموت خلاهم ايهابونه
_______________________________

شافو عرشهم من علي ماسالم
يلعنهم ابليل اوصبح ماسالم
تاليها من سم الغدر. مسّا لم. (( مسه الم ))

صوته الصدح
بسم انذبح
واويلي يبن الزهراء بالسم تغير لونه
_______________________________


ابو فاطمة الطائي

للامام السجاد عليه السلام



يالناشدت عن موتته زين العباد اويا سبب
سيل المدامع ذابحه وابكربله موته انحسب
_________________________

المعروف عن موت البشر كل واحد اشمكتوب اله
الموت مرّه بالعمر. معروفه هاي المسأله
ماصارت ابواحد گبل كل ساعه موته نازله
بس زين العباد اختلف چم مره مات ابكربله

ماندري بالسم انغدر مدري انذبح يم النهر
بس ندري بيت ميّت عدل وابكربله موته انحسب
_________________________

الله يسٱعد مهجته ذابت مثل ذاك الشمع
اسنين عايش بس حزن واينازع ابروحه الدمع
فوگ الأرض يمشي لچن بالسمه ونّه ينسمع
السجاد مثله ماشفت موت وحيا بي تنجمع

روحه ابمراحل من مشت مانعرف أول مرحله
من الرمح مدري العطش ابكربله موته انحسب
_________________________

مايشبه اقدار الخلگ اقداره كلّش مؤلمه
زين العباد اويه الاجل حالاته حيلي اتهدّمه
مات اويه كل طعنت رمح مات اويه كل قطرة دمه
مات اويه كل لوعة طفل من يشتكي حرّ الضمه

طاح اويالاكبر من وگع وجسّام لمّن مارجع
وعبدالله حيل امصوّبه وابكربله موته انحسب
_________________________

زين العباد امصيبته اتصدّع اجبال الأرض
مسموم وايلوج ابحزن ضاگت علي طول ابعرض
ماندري منّ السمّ يون مدري الحوافر بي ترض
وجهه أصفر وما ينعرف. وماضل دليله بي نبض

كل عمره طاح ابكربله بين الشمر أو حرمله
من گطعو الذاك النحر. ابكربله موته انحسب
_________________________

والي قبض روحه ابألم من طاحت اچفوف الگمر
ماينحمل وضعه غده. محني الضلع ظهره انكسر
اكلف مراره ابكربله العمته من دار النظر
شاهد دمعها اعله الوجه كل دمعه وياها احتظر

چم لوعه شاف ابنينوه وچم علّه ما ألها دوه
اكلف من السمّ والغدر ابكربله موته انحسب
_________________________

وازيد بعد واكلف جرح جرح السبي الما ينجبر
كل خطوه للشام اطلعت روحه وبعد روح الصبر
لوعات عمته بالسبي كل لوعه تٱخذ هالعمر
كاس المنيّه اتجرّعه من يوم داسن ع الجمر

وشباقي من عنده بعد السجاد باقي بس جسد
الروح ألف مره اطلعت وابكربله موته انحسب
_________________________

ابو فاطمة الطائي

ياوجيها عند الله اقبل دموعي اقبل الآه
خادمك لتنساه
اشفع لنا عندالله ياوجيها عند الله
-----------------------------------------

ياوسيلة آدم من تراجع نادم
دافيات احروفك انت اوبارده ابنص الجحيم
عايشك بحساسي. ياسبب انفاسي
مجلسك لمن احظره اشعر اني بالنعيم
اغله منكل غالي. يانبض دلالي
گلب مايذكر مصابك يابو سكنه مو سليم
دمعتي وحسراتي. لوعتي اوعبراتي
من يمر ذكراك ابچي وانت بدموعي عليم

يامنارا ما اعلاه. اقبل دموعي اقبل الآه
خادمك لتنساه
اشفع لنا عندالله. ياوجيها عند الله
___________________________

ياوجيه اوعالي. انظر انت الحالي
عمري من دونك متاهه امضيع ادروب النجات
امحلفك يحسيني. خادمك خليني
خدمتك بيها المعاجز تنطي للميت حيات
عاشكگ تدريني. والضوه انت ابعيني
انت ديني واعتقادي وصومي واراكان الصلاة
روحي الك افديها. خدمتك شاريها
يللي منطي الخادمك من جلال اسمك صفات

اذ عليك صلى الله. اقبل دموعي اقبل الآه
خادمك لتنساه
اشفع لنا عندالله، ،، ياوجيها عند الله
___________________________


ياحسين ادركني. رايدك تملكني
ابكل تفاصيلي اوكياني ارد اعيشن كربلاء
ماأريد النسمه. والهوه الاشتمه
مااريد اشتمه لوما يحتوي ريحة عزاء
والشربته اخلافك. اقسم اباوصافك
دون ذكرك مايروي چنه سم ماچنه ماء
العمر وايامه. والسهر واحكامه
انت بيهن ياحسين امن الالف تبدي لياء

ياشعارا قد رفعناه، اقبل دموعي اقبل الآه
خادمك لتنساه
اشفع لنا عند الله، ، ياوجيها عند الله

___________________________

مانسيتك اني، بس الك احراني
احسين كل لحظه اعله بالي حته اذكرك بالمنام
لوسمعت ابضامي. انظرك گدامي
چني اشوف اشفاك يبست عاجزه عن الكلام
لوسمعت ابغربه. اذكرك بالكربه
گبالي اشوفك بالمعاره لاگرابه اولا عمام
لو اجو يحچولي. عن جرح گالولي
روحي اتفرفح واذكرك من تعاني امن السهام
خنصرك مگطوعه. ياعظم هاللوعه
عشره خياله التسحگك طحنت ابصدرك عظام

آه لصدرك يابلوآه، اقبل دموعي اقبل الآه
خادمك لتنساه
اشفع لنا عند الله، ،، ياوجيها عند الله
___________________________

اشأنسه واشأذكر. لوعتك بالخدر
لو عمر نوح اعله طوله مايكفي الهن انوح
زينب وحيرتها. عالنهر حسرتها
من جروح الطف جميعا زينب اكلفهن جروح
اگبالها ايذبحونك. وتنضر اعله اعيونك
چنها ياخويه تگلك لاتخليني اوتروح
لو رحت يسبوني. باليسر ياذوني
ريحة احقاد السقيفه اتورثت بيهم تفوح

هذا يوم التتمناه، ،، ارحم دموعي ارحم الآه
خادمك لتنساه
اشفع لنا عند الله ،، ياوجيها عند الله

___________________________

ياحزن ياعبره. ياجروح الزهزه
ناري مابردها دمعي تسعر ابوسط الدليل
دمعتي اوحسراتي. ونتي اوعبراتي
لو بحر من عيني اهمل يم مصايبكم قليل
ولذلك جيتك. سيدي اتنخيتك
اقبل الخدمه اودمعتي اولا تخليني ذليل
ما اريدن غيرك. اترعرت من خيرك
وين ما ميـٌل هواكم انه وياكم اميل

عهدا وعهدا لاننساه، ، اقبل دموعي اقبل الآه
خادمك لتنساه
اشفع لنا عند الله، ، ياوجيها عند الله
___________________________



ابو فاطمة الطائي

اخو زينب من نزل، ،، كربله زلزلها
___________________________

للنهر يتمشه رايه
ايشوف وضعه وشنهي مايه
گالو اهناك السرايه. اربع الآف

اربع الآف ابطريجه
بيها فك السيف ريجه
ضربته ضربه غميجه. فوگ الاوصاف

سيفه نار الله شمل. ،، كربلا زلزلها
___________________________


اخو زينب للمعاره
نازل ابگلبه حراره
مايضل واحد قراره. كلها تنداس

صاح بيهم ابو فاضل
هذا سيفي مايجامل
وينها الرادت تنازل. انه عباس

واسمي معناه الاجل، ،،، كربلا زلزلها
___________________________

يرعد اعليهم تشوفه
خله بالعدوان خوفه
جن ملك موت ابچفوفه. يقبض ارواح

الحرب ياناس عيده
هذا غير ابن الصميده
عشره عشره اتطيح بيده. والاجل لاح

ماترك عدهم امل، ،،،،، كربلا زلزلها
___________________________

العده انشلت اديهم
روس ماخله عليهم
للسمه واصل بچيهم. خرس احلوگ

لو مشه العدوانه خطوه
الارض من تحته تطوه
ماقبل يطيها عطوه. رايد احگوگ

مايرد لمن حمل، ،،، كربلا زلزلها
___________________________

هاشمي اوطلاب حيفه
گطع الروس اعله كيفه
مدري شنهي ادگول سيفه. ما اله احدود

العدو يقبضها روحه
وين ماواگف يلوحه
للقمر وصلت فتوحه. هذا ابو الزود
___________________________

اخو زينب والكفلها
راعي هيبتها واملها
عينها ومرود كحلها. صاحب الجود

لو شكت يمه عطشها
كربله ايجهز نعشها
بالجثث دربه فرشها. روس وازنود

العقل منه انذهل، ،،،، كربله زلزلها
___________________________

اسكينه من گالتله عمي
الماي اريده جيبه يمي
العطش زودلي همي. وجني ابنار

گال هونچ ياسكينه
خله صمصامه ابيمينه
تجدح ابنيران عينه. بيده بتار

النهر حس بالوجل، ،،كربلا زلزلها
__________________________

النهر من شافه هلَا
سلم الچفه وصلَه
يا ابو فاضل يگله، ،،،، والله حياك

ليش تتعنه اوتجيني
انت بس اشر يعيني
اعتني ازحوف اعله اديني،،، واوگف اهناك

يم خيمكم انه اصل، ،،كربلا زلزلها
__________________________




ابو فاطمة الطائي

قصيدة الليله الثالثة عشر من محرم
ليلة الدفن




روحي خذتها من غبت عمه يسجاد
رديتلي اوجايب عطر من ذيج الاجساد
يانور العيون ... دافنهم اشلون ... عمه يسجاد
_____________________________

ياباقي عمري والامل شو طوّلت غيابك
موتدري عمتك خايفه ايفحعونها بمصابك
وهالساعه جيت اوبيك اشم ريحة هلي بثيابك
واتراب اشوف ابلحيتك وابدمعتك خضابك

چني اشوفك بالحزن .. من كربله جاي
سولفلي عن المارجع . والماشرب ماي
متغير اللون .. دافنهم اشلون ... عمه يسجاد
__________________________

ايگللها اجيتچ بالهظم احچيلچ اصار اوجره
ادفن ابوي آنه چنت ياعمه يذبح منظره
احسين ابحصيره ينجمع اعظامه كلها امطشره
محتار ادفنه ابيا وضع واشلون اوسد منحره

كلما اشيله من كتر .. يوگع كتر بي
والخنصره ناذر نذر ...بس كون الاگي
بالذاري مدفون .. دافنهم اشلون .. عمه يسجاد
__________________________

ألف اوتسعمية جرح ياعمه ابوي امگطّع
ياويلي ابو سكينه الترف فوگ الرمل توزّع
الخيل منّه اشگد خذت من راحت اومن ترجع
لميته وادموعي صفن واعيوني رادت توگع

يابس عليه دم ورمل .. عمه الرمل حار
واللون منه مختلف .. چن جاسته النار
خلاني محزون ... دافنهم اشلون .. عمه يسجاد
__________________________

شلته ابحصيره للکبر محني الضهر وانازع
اشلون اوسده اليا كتر روحي اشبعت مواجع
لا عنده خدّ ولا وجه ضهره اعله صدره طابع
واريته واتراب الگبر اعجنته بالمدامع

وعبدالله فوگ اعله الصدر .. امغمض اونام
ابنحره مايرهم مسك .. متصوب اسهام
دلالي مرهون ... دافنهم اشلون.. عمه يسجاد
__________________________

وانوب ياعمه ابحزن. عمي الگمر کصدته
بدر اوتطشر ع الأرض تضوي الوسيعه جثته
چن شايل اطراف السمه ياعمه من حملته
واچفوفه لا ماتنحمل لا يسرته اويمنته

لچفوفه كل واحد لحد .. ياعمه محفور
العباس مايكفي گبر ... اتلاثه الگبور
اتلاثه اويضوون .. دافنهم اشلون .. عمه يسجاد
__________________________

اتگله بدموع العتب چا ليش ماخذتني
مشتاگه لحسين اشكثر الفرکه موتتني
وعباس كافل شيبتي بس ردته ينظر متني
ياريت ياعمه ابگبر وياهم ادفنتني

ياريتني اهناك اندفن .. يم گبر الحسين
شلي ابحياتي ياعلي .. او شلي بالعين
ترتاح المتون ... دافنهم اشلون .. عمه يسجاد
__________________________




ابو فاطمة الطائي

عايش كل وكت يحسين بحزاني
دمعي بس ألك ما أبچي الثاني
___________

ماعفت الحزن وادموعي تتلاله
وابروحي عزه يوميه اقراله
ابچي المنذبح وامسلّبه اعياله
لو انسه الحزن ريت الله ينساني
_________

من غير السبط يستاهل ادموعي
ياريت ابلطم اكسرهن اضلوعي
يروحي اعله الغريب المنسلب لوعي
اواسي فاطمه المفجوعه باشجاني
___________

اويلي امن العطش متفطّره اشفافه
ماشاف العذب بس الهظم شافه
ذبلان اوصبح متغيره اوصافه
يصيح اتفطرن دلالي والساني
____________

عله الضامي تضل ادموعي بعيوني
وعهد للموت ادگ زنجيل بمتوني
اوصي اهلي وكت موتي يغسلوني
ابماي امن المواكب رشو اكفاني
______________

ماعوف العزه يالضامي واعيونك
اشلون انساك وآنه الضايع ابدونك
يريت الگاك واگلك سيدي اشلونك
يبعد اهلي اوعمامي اوجاري شرياني
__________


اشلون احوالك اوذاري الرمل يچوي
اشلون احساسك اوضامي الطفل يبچي
اشلون اتشوف زينب واشردت تحچي
تگللها العطش يا خويه اذاني
_________________

اشحچيت اويه العقيله والدمع همال
توصّيها اعله چف ماي انچوى الدلال
لو عن سكنه توصيها وعله الاطفال
اورقيه اعليها وصّيت ابگلب حاني
___________________

عليمن ويه زينب آخر احچايه
گلتلها بعد ماترجع الرايه
لا عباس . لا چفه . ولا مايه
ايسي ومايرد لا گلبچ ايتاني
____________

لو عن الهزيله سولفت همك
اشتگلها من تکلك ارد اضل يمك
بچيت السمه امن تضمها واتضمك
يحسين وهظم بچيتو قرآني
_____________

أضل انعاك واضل عايشلك ابحسره
واعيش ابونّه اواسي فاطمه الزهره
هاك اعيوني شوف من الدمع حمره
يروحي اوياهلي اويا عزة اوطاني
____________



ابو فاطمة الطائي

قصيدة الليله الثانية عشر
زينب .. وطريق السبي



قسما بالعادياتِ .......يخويه
بعد ماريدن حياتي .. يخويه
خلّصت دمعاتي .. وماگضت حسراتي ... يخويه
__________________________________

قسمن بالعادياتي الداسن اضلوع الذبيح
يبو فاضل كلشي بيّه أصبح امن الطف جريح
الياوكت گلّي اتاني يمته اموت اوأستريح
وآنه كل دمعه ابعيوني تاخذ اسنيني اوتطيح

الدمع ما خلّه بيه .... يخويه
لاني ميته اولاني حيه.... يخويه
اعثر ابخطواتي ... وما گضت حسراتي
_______________________________

يبو فاضل آنه زينب تدري ابخدري اشغلاه
أمي امّ الكون كلّه اوالدي الله ارتضاه
تالي ماتالي يخويه الدهر فرني ابهواه
واللي مدري امنين اصله امشي مسبيه معاه

حيره ما تشبها حيره ..... يخويه
بت علي ومشي اسيره .... يخويه
بالصدر عبراني ...وما گضت حسراتي ... يخويه
_______________________________

ردت اودعكم يروحي ومارضو يطّوني مهله
اشويه ردت اوگف اشوفك ادفعوني ابچعب نبله
بيش حيرني زماني ياهي من لوعاتي سهله
شعتذر من روس اخوتي بليل لو ضيعت طفله

اشلون بيه يبوفاضل .... يخويه
لو طحت من المحامل ... يخويه
واحظرو شماتي .. ما گضت حسراتي ... يخويه
_______________________________

للسبي حادي ضعنهم غرّب وماخذني اسيره
اشلون اطب الكوفه وآنه أمس بيها چنت اميره
اگبال ابن ازياد اوگف ذاك هلماعنده غيره
ويگلي بحروف الشماته ها يزينب ي الچبيره

انصير للعربان فرجه ... يخويه
وشامتي بعيونه بهجه ... يخويه
زود ابلوعاتي .. ما گضت حسراتي ... يخويه
_______________________________

آنه بالديوان اوگف يبو فاضل هاي كلفه
ايسبني وايسب الهواشم خويه بينه اشگد تشفّه
عله شاف احسين خلّه الخيزرانه ابعين صلفه
ويگلي چا وينه الكفلكم هذا راسه اوماكو چفه

وانه دمعاتي اهلها ... يخويه
هاي شمّاتي شگلها ... يخويه
شيبن شيباتي ... ما کضت حسراتي ... يخويه
_______________________________

وآمر ابروس الهواشم والضعن للسوگ ينجر
امچتفين اگبال وادم يسوه والمايسوه ينظر
هذا يشتم .ذاك يضحك وآخر احجارات يشمر
اهواي بالكوفه مصايب والحچي ياخويه يكثر

انوب للشام ارسلونه ... يخويه
ولية الضالم ولونه .... يخويه
ايموتن شوغاتي .. وماگضت حسراتي ... يخويه

_______________________________


ابو فاطمة الطائي

يا ايها العالم ..... يا أيها العالم
قتل الحسين بكربلا مضلوما
__________

آنه المهدي المغوار
رافع رايات الثار
وارفع بيميني اشعار ....... واحسيناه

أعلنها الثوره اليوم
اطلب ثار المظلوم
وضلعه الاصبح مهشوم ....... واحسيناه

للطف ارفع رايات
آخذ ثار الآيات
وثارات العلويات ........ واحسيناه

يا ايها العالم ..... يا ايها العالم
ثار الحسين بكربلا محتوما
__________

آنه اسمي ثار الله
عهدي لا ما انساه
جدي ابكل يوم انعاه ....... واغريباه

للمذبوح اعله الماي
جاي اعله الطف عنّاي
ايرفرف بيها الواي ....... واغريباه

كل يوم النار اتزيد
ثاري وغيره ماريد
من كل اولاد ايزيد ........واغريباه

يا أيها العالم ..... يا ايها العالم
يبكي الحسين فؤاديا مهموما
__________

وامشي العمي العباس
جمره الي ما تنداس
راعي الجود اونوماس ...... واعباساه

سگاي الطف معروف
مشهور اباغله اچفوف
بيهن كل حب موصوف ........واعباساه

آخذ ثاراته اوزود
وقسم له بالمعبود
كون املي ابماي الجود ........ واعباساه

يا ايها العالم ...... يا ايها العالم
يبقي الكفيل شاعري الموسوما
__________

امليله الجود ابماي
ولسكينه ايرد اوياي
عمچ هذا الوفاي ....... واكفّالاه

زينب ترجع وياه
تنسه الآلام وآه
وسوط الضالم تنساه ...... واكفّالاه

يرجع چفه المگطوع
وماتبقه اهناك ادموع
كلشي الرايح مرجوع ........ واكفّالاه

يا ايها العالم ..... يا ايها العالم
كف الكفيل لوامعُ كنجوما
__________

والعمتي الحره ايكون
ثار اويشهدله الكون
وين الضربوا المتون ....وازينباه

ابگد ما گالت آه
اعليه الشاهد الله
الضالم امحي اعضاه ...... وازينباه

عمتي العاشت احزان
وتتنفس بس دخان
وطبتها اعله الديوان .....وازينباه

يا ايها العالم ...... يا ايها العالم
هذي الخدور جراحها مكلوما
__________

آنه اطلب الهه احگوگ
واخرس بيميني احلوگ
اشلون ايركبوها النوگ ...... واخدرالله

راح ارجع بيدي السيف
ماتعرف وين وكيف
وآخذ للحره الحيف ...... واخدرالله

آنه اعله الضالم موت
صرخة حق آنه اوصوت
ماعندي الحگ ايفوت ..... وآخدرالله

يا ايها العالم ...... يا ايها العالم
ثار العقيله راحعا محكوما
__________________

ابو فاطمة الطائي

حماسيه للاكبر عليه السلام




علي الاكبر ع العده .... يوم خيبر جدده
______________________________

علي الاكبر للمعاره نازل ابظهر الفرس
عطر هيل ايفوح منه والهوه منه انترس
نازل ابهيبة محمد ياعساكر يا حرس
ألكتيبه المر عليها ينگطع بيها النفس

لحظه ماهي صامده .... يوم خيبر جدده
______________________________

ودّع احسين اوگصدهم چن غنضفر من يهد
گال وين ابطال اميه يللا خلها تساعد
لن شمر وابن سعدها كلها گامت ترتعد
واحد الواحد يگله انت روح اوآنه ارد

كل دماهم جامده ... يوم خيبر جدده
______________________________

ريح (صرصر) چن عليهم داير ابسيفه يلف
گالو اعداد الي شردت بالمصادر تختلف
ألف من الخوف تركض والف الطلعت زحف
بالهزيمه اسباع كلها ألف ايغالب ألف

والف اينازع غده ... يوم خيبر جدده
______________________________

خله ملج الموت حاير ياكتر منهم يلم
من جيوش آل السقيفه كلسه يثلمله ثلم
عنده بفنون المعارك من علي حيدر علم
هذا اخو اسكينه اوفخرها حاضت اگباله الزلم

نار چنه وماهده .... يوم خيبر جدده
______________________________

للمعاره من گصدها گالو اعليه حيدره
شمس وجهه ع الوطيه يذهل الكل منظره
قارعه اوهجمت عليهم سوّت الي ماجره
حيث وحده من العجايب خيل تركض ليوره

للهزيمه شارده .... يوم خيبر جدده
______________________________

هذا ابن احسين هذا غيرت الله غيرته
جدد الخيبر عليهم اتحيروا من صولته
چنهم ابن العاص صارو من يكشّف عورته
كلمن ايكشّف عورته بلكي تسلم رگبته

والنواضر شاهده ... يوم خيبر جدده

______________________________

ابو فاطمة الطائي

حماسيه للقاسم بن الحسن عليه السلام




قباض الارواح جاسم والنعم
قباض الارواح جاسم والنعم
_______________________

عريس الطفوف. محله زفته
للحومه والسيف يلوگ ابيمنته
من دم الرگاب عجنها حنته
چنه ملك موت تموت خزرته

يشبه العباس . غده ايرجف الزلم
قباض الارواح جاسم والنعم
_______________________

في يمنته السيف چنه القسوره
يتمشى واعداه. تمشي ليوره
كض يمنت الجيش گلبها ميسره
من روس الأبطال سوه گنطره

ابكيفه بالگاع يطشرها ويلم
قباض الارواح جاسم والنعم
_______________________

من هيبته اهناك وگف حته الهوه
بچفوفه الاثنين يحوّط نينوه
كل ضربه بالسيف يذب عشره سوه
يفتر عليهم مثل سرعة ضوه

ماتعرف اعداه طريق اوتنهزم
قباض الارواح جاسم والنعم
_______________________

اربعطعش عام لچن زوده دهر
من دم الرگاب فتح بالطف نهر
يسحگ على الروس يشبعهم قهر
الما گصه نصين كسر منه الضهر

مابيكم ابطال ،؟ گالوله نعم
قباض الارواح جاسم والنعم
_______________________

ابگد السموات يجاسم هيبته
لو يضرب اجبال تطيح ابضربته
شد عزمه للگوم. يحارب نيته
اشما يوصل ابطال لگاها ميته

من اسمه الأبطال چانت تنعدم
قباض الارواح جاسم والنعم
_______________________


سير النعل بي تگطع والتوه
دنگ يشده ويشع مثل الضوه
گاللهم ابصوت تسمعه نينوه
سير النعل ها اوشواربكم سوه

وحچايتي هنا فنها تنثلم
قباض الارواح جاسم والنعم
_______________________

ابو فاطمة الطائي

حماسيه للانصار



انصاره من طبّوها ... كربلا گلبوها
....................

عن الانصار .. الاخبار ... تطش ابكربله
عدها بتار ... إذا ثار ... يزلزل زلزله
دارو افلاك .. والاملاك .. تگلهم ياهلا
تملك افنون .. بالجنون .. وأعلى منزله
الهامه ما وطّوها ... كربلا گلبوها

....................


عدهم اصرار .. هالانصار .. شبيه امن الوهم
شدو الثام ... والازلام ... غدت مثل الغنم
جرو السيف .. على الكيف .. بخذموهم خذم
صارت ادوس .. على الروس ..يحطون الجدم
للزلم ذلوها .... كربلا گلبوها

.........................

وفو الدين .. للحسين ... سوالفهم عجب
چنهم السيل .. اجه ابويل ..ولا يعرف تعب
عابس اوجون ... يهوسون .. يجاوبهم وهب
شيلو الگاع .... يالسباع .... اگلبوها لهب
جن جمر خلوها ..... کربلا گلبوها


...................

بن مضاهر ... يناضر .. يهز ايده غده
راجع اوراح .. غضب صاح .. فقط ذوله العده ؟؟؟؟
ناقص الجيش . اذن بيش . انه السيف ابرده
سيفي طماع .. إذا جاع .. يجيب الشارده
والخشم دوسوها ... ݣربله گلبوها

...................

حايره الناس .. بالانفاس .. يچنّها تختنگ
ترجف ارجوف . من الخوف . غدو كلهم زرگ
سيف الانصار .. عصف صار . حرگ بيهم حرگ
جمله وافراد .. هالوغاد ... على الشرده تدگ
الشرده ماحصلوها ... كربله گلبوها

...................

نصروا الدين .. للحسين .. يضحون ابوفه
شگو احلوگ .. للحگوگ . جفنهم ماغفه
بيهم الزود .. للحدود . جمرهم ماطفه
رفعوا الرأس .. ينوماس . لدين المصطفه
للشرع حفظوها .. كربله گلبوها



ابو فاطمة الطائي

عبدالله الرضيع عليه السلام


گلب امك .. وگع يمك .. يمن ذاري الترب ضمك
__________________________________

يعبدالله الترف خدك يكحل اعيوني وايامي
گلبي ما عطش للماي گلبي الشوفتك ضامي
أنه اومهدك سهرنه الليل تسامرنه ابجفن دامي
اگله اوليدي چا وينه يگلي أيسي اونامي

عفت نومي .. وانه اهمومي .. يا ليلي ابكثر نجمك
__________________________________

اون وانحب توالي الليل واشتم ريحة اهدومك
تارس عيني بالبسمات اشلون انساهن ارسومك
يعبدالله ابثگل لجبال عله امك صارن اهمومك
ياريت السمه اعله الگاع هوت من سالت ادمومك

انه اتمنيت .. متت ياريت .. ولا سهم اليصل يمك
__________________________________

من يوم الرحت لليوم متعوف المهد ايدي
چنت ما أحسب الكل عيد ضحكاتك غدن عيدي
انه اشبيدي ع لمثلث ييمه گلي اشبيدي
غفل مني خذاك البين يروحي ابونتچ زيدي

وحگ ربي .. يگع گلبي .. لون جابو ألي أسمك
__________________________________

دللول الولد مانام دللول الجرح صاحي
مهد خالي وأناغيله كل ليله اويه مصباحي
واگل لعيونك الحلوات غمضي ابهيده وارتاحي
ومانشدك على اجراحك ييمه اجراحك اجراحي

انهدم حيلي .. وسهر ليلي .. يعبدالله ارحم ابأمك
________________________________________

عوافي النومه يوليدي سهم متوسد اوغافي
حسره ابروحي ابوسك خاف ييمه اتلچمك اشفافي
حضن امك تتركه اعليش ييمه احضيني مو دافي
نايم ما دريت الحال جبل حزني عله اچتافي

حرت شحچي .. وبعد شبچي ..وانه اتنفس ابهمك
_____________________________________

دفنوك ابذرى التربان اوطاحت ع الثره اعيوني
صحت يللي تدفنونه اودع اوليدي خلوني
ويه ابني اطلعت روحي يهالوادم ادفنوني
بيتي ابكربلا مدفون بعد المن تردوني

الابن وينه . وابو اسكينه .. يگلبي وين اليكلمك
______________________________________



ابو فاطمة الطائي

تبقه صرخه بالسنين .. ياحسين ياحسين
________________________________

ياعبرة اعيون المحب ي الما حصل مثيله
ياجرح المّبچي السمه وامزوّد ابعويله
ويّاك راد انحسب وادموعي الوسيله
وادري ابدموعي لو بحر هم تنحسب قليله

ياقطيع الودجين ... ياحسين ياحسين
_____________________________

أرض وسماوات ابحزن كلها انصبت مجالس
وآنه ابدموعي للنبي يعگوب صرت انافس
ربّاني الحسين ابفخر مدرسة المدارس
مدرسة الحسين التي بس خرّجت عوابس

للمناحر واهبين ... ياحسين ياحسين
______________________________

كل يوم عاشور اصبحِت عايش الك رزيه
ابگلبي شايلّك حزن وابروحي غاضريه
اتنفّسك . ماشم هوى ياديني والهويه
لو عوف روحي والعمر ما أترك العزيه

صخرة بالحب ماتلين .. ياحسين ياحسين
______________________________

قرآني انت وقبلتي وانت أكبر امنياتي
يالضامي لوما خدمتك متكاملت حياتي
لوما دموعي ابمجلسك ماتنقبل صلاتي
منٌ الله ادعي كل فجر يم منبرك وفاتي

وعمري بس دمعه وانين .. ياحسين ياحسين
_____________________________

يحسين دون اسمك حرف بالدنيه ماهوينه
مانفخر ابمال اونسب نتفاخر ابّچينه
خرسان احنه واصبحت انت فقط حچينه
لو شيعي چفه مالطم يتبرا من ادينه

وشاهد انت ع اليدين .. ياحسين ياحسين
____________________________

عاشور بينه والحزن خالد مثل خلودك
يحسين من هذا العزا انعاهد نضل جنودك
يالواصل السابع سمه ويه العرش حدودك
ياريتني بالطف رمل واتبارك ابخدودك

وانحسب بالفائزين ... ياحسين ياحسين
______________________________


ابو فاطمة الطائي

يلماشي تجيب الماي اچم دوب انتظر جيّه
ارجع يا شريك الروح اوشوف اشبيّه ما بيّه
نجمات الضهر ياخويه راووني
وابنار الخيم رادو يحرگوني
___________________________________

يالماشي وعفتني ابناس . مامش عدهم امروه
بس ما وحدي شافوني . ابنار الغربه اتچوه
دارو بيّه يالعباس . من كل صوب اجت بلوه
هذا اليحرگ اخيامي . واذاك اشسوه ماسوه

نار اويه الزلم والخيل . واسهام امطروني ابسيل
دخّان وعجاج اخيول . کلبو هالنهار ابليل
والصوب النهر بس شابحه اعيوني
وابنار الخيم رادو يحرگوني
_________________________________

أول تالي يا عباس اصيحك ما تحاچيني
مو چنّه اوچنت كل يوم ياروحي تسميني
نايم ع النهر چا ليش والوحدي تخليني
اگعد يانظر عيناي وامسح دمعه من عيني

اگعد وانظر البلواي اگعد ما نريد الماي
شوف ابمتني چم اصواب من عدها تسيل ادماي
وشماته اعله الجرح صارو ينشدوني
وابنار الخيم رادو يحرگوني
______________________________

مو بس حرگو الخيمات حرگو روحي واگليبي
اتنفّس صرت حسرات ما اتنفس اعذيبي
حرمه وعمري بالخمسين والشاهد علي شيبي
عليمن انسبي ابهالحال وامزودين اصاويبي

اشلون احرس حرم واطفال ومشدودات ادي بحبال
مو حنّت عليّه النوک ما تگعدلي يا كفال
انهض شاهد ابعينك يضربوني
وابنار الخيم رادو يحرگوني
______________________________

مو حنّت عليّه النوک من شافتهن احوالي
وجهك ضيعيته اوراح واصبح حرمله اگبالي
لو گتله اترك الايتام يطگني اويشتم الوالي
وغديت امحدّبه امن امشي لا أول ولا تالي

اگعّد هذا هذا ايطح ارعش مثل سعفه ابريح
اضم هذا ايتصوب ذاك. اسكت هذا ذاك ايصيح
ورقيه والتراچي ازيد يهظموني
وابنار الخيم رادو يحرگوني
__________________________

يا عمه اليتامه اتصيح اوكلها امچلّبه بثيابي
ساعه اعليهم آنه انحب ساعه انحب على امصابي
واتحيّر واصد للماي واحچي اوياه بعتابي
عليمن تآخذ العباس مني اويبقه سلًابي

آنه اشعندي بس عباس .واگبالي انضرب ع الراس
واعيونه اوچفوف ايديه .گطعوهن بلا احساس
ريت الگطعو اچفوفه يگطّعوني
وابنار الخيم رادو يحرگوني
_______________________________


واكلف من اجاني الليل وانتم صرعه بالحومه
وحشه والجفن سهران يهل ادموعه وادمومه
واعاين راسك المرفوع بي لوعاتي مرسومه
چن ايگلي اعذريني . هاي اللوعه محتومه

وراسك بالرمح شالوه يم هاي الحرم خلوه
مدري اشلون اوصّف هاي .ليل اهدعش من شافوه
يرجف شاربه عنك يحاچوني
وابنار الخيم رادو يحرگوني
_______________________

ابو فاطمة الطائي ..

اهلالك من طلع روحي ...وجرها
تطلع مني كل لحظه. .....وجرها
ثواب الدمعه ما طلب .....واجرها
ابثواب المات ع الشاطي وأخيه

_______________________

مع اهلالك اهل دمعي ..... واسيله
واناشد كل محب ينحب ...وسيله
غير الونه ماتحصل ..........وسيله ؟؟؟
لان ماتكفي فشله أمن الزچيه

_______________________

اشهور الحزن ريت الله ...لهلها
بيهن ماترد زينب ........ لهلها
عليها ادموعي كل ساعه لهلها
ومثل يعگوب انوح ابكل مسيه

_______________________

اعيون المابچت لجله ... لطمها
واگص ايديه لو راخي ..لطمها
الخاطر طفلته الظالم.....لطمها
وأخذ منها التراچي انصب عزيه


_______________________

ابو فاطمة الطائي