اسراء انا نفسي يبقالي حلم اسعي ليه ، نفسي يبقي ليا شغف في حاجة و اجاهد نفسي فيها .. ٢٠ سنة اهو مفيش حلم مفيش هدف! جربت حاجات كتير ومكملتش لاني محبتش .. هلاقي نفسي في يوم من الايام ؟

ج / أحب افاجئك .. دا مش شرط يبقى موجود أصلا :)

في نظري الحلم أو الشغف هو شيء واحنا ماشيين في رحلة حياتنا اتكعبلنا فيه لقينا إنه توافق مع قدراتنا أو هو أقرب شيء ليها فتبدأ ملامح قصته معانا تتشكل فيصبح حلم ،،

يمكن الحلم يتبلور فيصبح وسيلة ترتبط بغاية أكبر كنفع للناس أو كمكسب شخصي يعود على الفرد نفسه ليتخذ شكل الشغف، ولكنه يفضل شيء "قد" نصادفه ،

حتى اللي وصلوا يوما ما لإنجاز إذا اعتبرناه حلم فهو جه بعد كثير من محاولات وتجارب وإحباطات ولم يَرد في سيَرهم إنهم كانوا سائرين في الحياة بحثا عن شغفهم المفقود حتى إذا وجدوه تحولت الدنيا "بمبي"،

القصد من كل دا أوصّلك فكرة إن مجرد قيامك بما أقامك الله فيه بإتقان يمكن يكون هو حلمك المفقود لكن خافت الألوان مش زاهي زي كلمة شغف البراقة اللي ممكن لو قربتي منها تلاقيها زي القمر ،، يعكس رؤيتك أنت ..

ومع ما أقامك الله فيه مفيش أي مانع من تحربة كل جديد حولك للاستمتاع من غير وضع آمال عريضة على كون التجربة هتوصلك للشغف المرجو، وساعة أما تلاقي اللي بتحبيه هتوضح لك الرؤى ولحد ما دا يحصل فابذلي جهدك في ما أنت فيه ،، واستمتعي بالحياة وتذكري،

"The grass is always greener on the other side of the fence"

د.إسراء عبد اللطيف