قناة النعي (رائد الاسدي)

نعي في طريق السبي جديد محرم ١٤٤٣ هـ


حادينا العدو والذابح اعضاي
بحبل واحد يشدنا هاي وي هاي
يجرونة ومشيهم موش بهداي
بالحسرة علينا شربت الماي
==================
نعثر بالمشي ونصد لهلنا
اذا طاحت الأولى انطيح كلنا
ومن ديرة لعد ديرة نزلنا
وتتفرج علينا الناس شفنا
====≠============
اذا راح الولي الحرمة ذليلة
تتباچة الحرم يم العقيلة
راس حسين جدامي يشيلة
يطگونة العدة من نشتكيلة
=================
يدير العين راسك النة يحسين
من يسمع تناديه النسواين
چنك تعتذر واديرلي العين
انة شبيدي يگلي وياچ ماشين
===================
وگف راسك واشوفة ايصد علية
وفلا گدورا يحركونة ال مية
عينة اعله الدرب ظلت ربية
اثاري ظلت بعيدة رقية
=================
طاحت والضعن سار وجزاها
وراس حسين ظل عينة وراها
وكف كل الضعن لمن لگاها
عزيزة گلبة ما يصبر بلاها
==================

أسألكم الدعاء رائد الاسدي

نعي وصول الظعن إلى كربلاء يوم ٢٠ صفر

وصلنة لكربلة يحنان اگعدوا
اجينا من سبينا علينا انشدوا
الحرم لرض المدينة بيها ردوا
اجيناكم يهلنة گوموا لينة
==================
بس گبور ما نعرف اهلنة
وحشة خلافكم مظلم نزلنة
من بعد الغياب التم شملنة
خل نشكي الجرة والصار بينة
=================

لسان حال الرباب
============
چهبت الگبر شو درن ثداياي
شلونك يالمتت ماضايكَ الماي
شو چنها حلتلك نومتك هاي
يبعد امك اجيت وراسك وياي
يعبدالله بعد ما أريد دنياي
==================
دللول الولد يبني دللول
عليك انحب ييمة واسكن الچول
انوخها اعله گبرك يمة الحمول
خلها شما تلوم الناس وتگول
من مثلي ابنها يموت مكتول
================≠
زغير وبين ادية طوير جنة
چان ابني وفلا شبعانة منة
يايمة الدهر طشر شملنة
فلا تهداش بالدلال ونة
لجيمن بالشمس دوم ابنزلنة
==================

لسان حال رملة
=================
فك گبرك يجاسم جيت يبني
يا يمة السبي كلش تعبني
كلمن شافني ميتة ايحسبني
حسبت الولد للبيت يبني
وي ابني العزيز ابگبر ذبني
==================
شلونك ياعزيز امك يغالي
لجيم اعله الگبر واسهر ليالي
واسكن بالگبور عليك تالي
انحب والدمع بالعين هالي
بعد عينك ييمة كلشي مالي
====================
تمنيت الگبر بي باب يفتك
واطب وياك يبني وكون يصتك
چا وياك نمت وما تركتك
رحت عنك يغالي وگوة عفتك
صار هواي عنك هسة شفتك
===================

لسان حال ليلى
================
يبو طول الحلو يازهرة البيت
ادور عالگبر يالغالي رديت
اشم تراب گبرك يبني حنيت
خذاك الموت مني وما تهنيت
أظل طول العمر وياك ياريت
====================
ها عزة الولد عالروح ثاري
انوح اعليه ماتطفاش ناري
عليك انحب واون ليلي ونهاري
واخليه الدمع نهران جاري
چا لمك علي ياهو اليباري
==============≈======
چنت اسمع ييمة روحي اتهيد
من بعدك اليمة كلشي متفيد
نايم بالگبر عن عيني بعيد
شمالك يا دهر من خذتة شتريد
عليك اصفج حسافة الايد بالايد
===================

زينب َوام كلثوم
=======+============
ها يطياب رد ظعن النساوين
چنة ابعاد اجيناكم محزنين
تلگونة يخوتي ها يطيبين
نشكي همومنا جيناك يحسين
جبنة الروس انتم وين ما وين
===================
خوية حسين راسك بين ادية
ندفنة وياك اجــــيناك بعزية
ننصــــب ماتمك بالغاضرية
وننوح اعله الگبر صبح ومسية
ما تدري يخوية اشصار بية
==================
متعيـــــني ادور وين عباس
يخوية انطر دليلي بشوفة الراس
هيچ مسوية بيك الگوم الارجاس
چا مثلك يخوية شلون ينجاس
اتمنى اعله گبرة تروح الانفاس
====================
الاخو وكت الشدايد حطة تچوة
هوة حزام ظــــهرك بيه تگوة
طــــشرنا الدهر يحــنان گوة
انة بعازتكـــــم بعازت مروة
يا ناس الاخو فرگاه بلوة
===================

أسالكم الدعاء رائد الاسدي

نعي محاورة بين السيدة زينب عليها السلام والامام السجاد عليه السلام بعد رجوعه من دفن الاجساد الطاهرة

السيدة زينب عليها السلام
==============
فگدك يبن اخوي ودوريتك
سولفلي يعمة وين نيتك
اشوف تراب متروسة لحيتك
بهذا الحال رديت ولگيتك
=================
غبت عني ودليلي راح لحسين
چنت غايب يعمة وغيبتك وين
بدربك ماشفت اهلي المطاعين
بعدهم عالتراب ابغير تچفين
===================

الامام السجاد عليه السلام
=================
چنت بالطف يعمة وليچ رديت
اگعدي وخل اسولفلچ اشسويت
كون وياي يا عمة تمنيت
نموت وياهم ولا نرد للبيت
==================

السيدة زينب عليها السلام
==================
سولفلي اعله اخيي شلون حالة
وعباس الفحل ياهوة شالة
وجاسم والطفل شنهي الجرالة
والاكبر والاصحاب وكل رجالة
==================

الإمام السجاد عليه السلام
==================
يعمة ادفنت الانصار ابحفيرة
وحبيب لوحدة شيخ العشيرة
بعيد الحر علينا بغير ديرة
وبني سد كلفتهم چم حصيرة
==================
لميت بحصيرة جسم الاكبر
اعله كبر الگاع يا عمة توذر
المن بي وذر والنار تسعر
الم بيه ابحصيرة الله واكبر
==================
ابن عمي الشباب انوب شفتة
بثياب العرس جاسم دفنتة
شباب وبالچفوف ادماه حنتة
تشيب الراس يا جسام جثتة
==================
ابوي حسين ظل بالعين عبرة
نزلتة بحفرتة وصاح نحرة
طلب عبدالله اخليه اعله صدرة
دليلي ذاب حسرة بأثر حسرة
==================
رحت صوب النهر دلالي ملهوف
بشاطي العلگمي لن گمر مخسوف
شفت جثة عظيمة وماكو چفوف
عفية وما متت وعيوني تشوف
==================
دمع من دم عليهم سال مني
عضو من اعضاي ماضل سال مني
يربي العمر بالطف سال مني
ولا اضلن بعد عين الشفية
==================

أسالكم الدعاء رائد

نعي للدفنة
عن الامام زين العابدين
------------------------------------------------
ثلث تــــــيام فوكَ الكَاع يحسين
امدد بالشــــــــمس وبغير تچفين
اخوتك والانصار الكل مطاعين
ماتنشف عليكم دمعت العين
---------------------------------------------
نار وبالكَلب يافــــكَد الاحـــباب
ابوي وكل هلي وانصارة الاطياب
ظلت بــس جثثكم فــوكَ التراب
مــــــا مدفـون نايم بالهوة الهاب
------------------------------------------------

بحق والده الحسين
--------------------------------
صاباني الدهر بالــــغاظرية
اخذ وين العزيز وخان بية
انزلك للـكَبر بــــثنين ادية
اخذ روحي يلاهي وهاي هية
---------------------------------------
تسمع يا اله الكون صـــــوتي
وي حسين اريد اليوم موتي
عكَب عين الابو بلوة بلــوتي
تمنيت اندفن وي كل اخوتي
----------------------------------------
الف وتــسعــمية جروحك كبار
مطبر والجرح فوكَ الجرح صار
ساحگتك الخيل وصرت طشار
عليك احزن وانوح الليل ونهار
------------------------------------------
اشيلن يا كتر لن طاح ثاني
المن بيك من الگاع ماني
عمت عيني مصابك شيباني
گبلچ كربله ميت عساني
-------------------------------------

بحق الرضيع
------------------
ما اگدر اشيلة اشلون ارفعة
يمرد بالگلب عبدالله وظعة
زغير وهالسهم مدري شيجرعة
لنوح عليك طول العمر وانعة
---------------------------------
حاچاني النحر طالت المدة
حنين وگلبي لوليدي شيهودة
حط ابني اعله صدري من توسدة
رضيع وخاف يستوحش لوحدة


بحق علي الاكبر والقاسم
------------------------------------
يحزام الــــظهر ردتك تچية
عزيز وفركَتك تصعب علية
على التربان يا وسفة رمية
كل واحد كتر يهل الحمية
---------------------------------------
وسعولي الكَبر لخواني الاثنين
بعدهي حنتة جاســم بالايدين
يفت الروح يفراكَ الـــــعزيزين
صابني ومضن بالروح سهمين
---------------------------------------
عليمن انتچي لو مال حملي
يا عيني على الزينين هلي
بعدكم بالعمر يحباب شلي
ما واحد تحمل ظيم مثلي
_______________
افگدكم وانوح وتجري العيون
اشو كلكم فرد شيلة تشيلون
وياكم اخذوني يالتروحون
بديار الغرب وحدي تخلون

بحق عمه العباس
------------------------------
مــــصيبة الروح ما ترتاح منها
جثة اعلى النهر يصعب دفنها
بس زنــود والــــجربة حظنها
عليك الروح ما يهداش ونها
-----------------------------------------
فجعني ابهالمصيبة بيك دهري
تلكَــــــيت الوطية بيــش مدري
اجيبة عليك عمي منين صبري
افديلك عمر لو صار عمري
--------------------------------------
كل اعظاك بيها السيف نازل
متوذر وذر عم يا ابو فاضل
طبر وسهام عمي شكثر شايل
عگب عينك يعمي الحمل مايل
-------------------------------------
هذا الحال يا زينين ميهون
لو تنشدني عنكم عمتي شلون
ام گلب الحنين هواي تدرون
الله يعيني اعله الجاي ويكون

بحق الانصار
------------------------
يا أبطال الصفا وفيتوا حگكم
طش بالگاع يا زينين دمكم
دون حسين اطيتوا رگبكم
ما يحصل بعد ينصار منكم
---------------------------------
ها يسباع يالوفيتوا العهود
وفيتوا وعليكم ماكو منگود
لحرم ال النبي صنتوها الحدود
حنزني البالگلب للموت ميهود
--------------------------------
عفتوا دياركم والأهل لحسين
واطيتوا النفوس وما مبالين
كفيتوا اوفيتوا َوما مقصرين
هنيالة اليرافجكم يطيبين


أسالكم الدعاء رائد الاسدي

نعي عن لسان حال ام الاكبر
-------------------------------- ------------- 
يبني من رحت كَلبي كَرصني
هذا اخر وداع وياه چنـــــــي
اشمك يا بعد روحي تخلنــي
ما انه الوالدة يا ماي عينــــاي
----------------------------------------------
عزيز امك يالاكبر بمك اشلون
اخذ روحي ييمة واخذ العيـون
ما اكَدر اشوفك فوكَ المــتون 
مذبوح ويخر دمك تجيـــــني
--------------------------------
عزيز الولد محلة دلالـــــــــة
ربيتة وكَلت اكَعد ابجالـــــــة
چن نوم الترب والحر حلالة
ما ابطل ابچاي ولا ونيني
------------------------ 
اعلى كيفك ياكَبر وياه بهـداي
مات وما تهنة ابشربة المــاي
ترة وليدي عزيز ونور عيناي
بعد ما اشوف طولة ولايجيني
------------ ------------------------------

أسألكم الدعاء رائد الاسدي

نعي بحق السيدة زينب عليها السلام


السيدة زينب عليها السلام تخاطب غروب ليلة العاشر
=====================
حل وكت الغروب وشمسا نزلت
وي طيحت شمسنا مصيبة حلت
بس ساعات وي اخواني ظلت
وبگلبي حزن ودموع هلت
===================
طول يالغروب ارحملي حالي
ما احمل وداع اهلي الغوالي
الظنون اتروح وترد اعله بالي
عزيزة مخدرة ومسبية تالي
===================
بس ينزل الليل دموعي تنزل
چا گلب العقيلة شراح يحمل
هلي يطياب والله الفرگة تكتل
تروحون وعلينة الگوم تحمل
===================
بساع الليل يخلص حين الوداع
اذا عنك عزيزك شايل بساع
اخوتي وينة وينة وكلهم اسباع
اذا طر الصبح تاخذهم الگاع
====================


السيدة زينب عليها السلام تخاطب ليل ليلة العاشر
===================
يا ليل انتظر طول يليلي
ترة ليلك هظمني وهدم حيلي
احباب الروح خاف تشيل ويلي
الكل منهم اودعة وما يجيلي
===================
المسامر حلة وي أغلى الاحباب
وداع فراكَ ادوعكم يالاطياب
العمر كله بسواد الليلة ينجاب
نذكر عمرنا الچن هوة وهاب
===================
مر بساع عمري وي اخوتي
ساعات وبعد ينسمع صوتي
وي اخواني ريت ايصير موتي
تطيح ابكربلة مني تچوتي
==================
بحياتي ما خفت مثلچ يليلة
احس بسفرتي صارت طويلة
بعدكم بالغرب تصفة العقيلة
ياهو الظيم البگلبي يشيلة
================


السيدة زينب عليها السلام تخاطب نجوم وقمر ليلة العاشر
================
ينجوم السما باچر تطلعن
اشوفنچن ظهر عاشر تلمعن
تشوفن زينب الحرة وتسمعن
من كثر البچي اعلينا تجزعن
==================
يا بدر السما يا زهرت الكون
تطلع وحدك باچر للعيون
عن عيني الگمر واهلي يشيلون
اظل ابلا. ضوة يالبلسما شلون
=================


السيدة زينب عليها السلام تعاتب اهلها
==================
تجافوني بعجل يهل المحنة
يطشر صدكَ باچر شملنة
بعدنا وداع منكم ما شبعنة
اعزاز انتم يهل ماشين عنة
==================
اعزاز انتم يهل ماشين باچر
الله يعين گلبي شلون صابر
على الشاطي يظل عباس حاير
وابن امي يدوس اعليه حافر
===================
وابن امي يدوس الحافر اعليه
يكسر اعظام صدرة ويكسر ايديه
ما حسبتوا عمري اشلون اگضيه
من عز ودلال ايسيرة تاليه
====================


وداع زينب مع الحسين عليهما السلام

==================
السيدة زينب عليها السلام

هلا بيك يامن جاي لية
تَودعني تريد ابهالمسية
تعال اگرب يبو أليمة علية
اشمن بيك ريح امي الزچية
====================
الإمام الحسين عليه السلام

حظريه الدمع يم گلب صابر
اخيچ بس سواد الليل حاظر
ابن امچ يخوية يشيل باچر
عينچ لا تشوف بيوم عاشر
__________________
يخوية من العطش يابس لساني
اريد الماي ما واحد سگاني
امدد والعدو بخيول اجاني
زماني بهاي حيرة حيراني
====≠==============

السيدة زينب عليها السلام

يهنيال الأخت واخوان يمها
يزيحون الحزن والضيم عنها
چا يحسين هالعيلة اشيلمها
اشوفنها الاهل شدت حزمها
====================

الإمام الحسين عليه السلام

حنينة يالاخت كلش حنينة
الله يعينچ أعله الجاي لينة
ترة باچر عزيزچ ذابحينة
كل واحد يخوية تسيل عينة
________________
سكتة لا أحد يسمع هالعتاب
أمر الله نزل يا اغلى الحباب
نتفاركَ لزوم بديرة اجناب
باچر كل اخوتچ خوية غياب
==================

وداع السيدة زينب مع العباس عليهما السلام

=========≠============
يبو الغيرة الشهم يربات ادية.
تدريني عزيزة وهاشمية
شلون تروح عني بغير جية
ترضى اختك يبو الغيرة سبية
===================
ترضى اختك يبو الغيرة يسيرة
يحيرني زماني شلون حيرة
ترضاها اطب ديرة اعله ديرة
موش اولامي وعلية چبيرة
====================

أسالكم الدعاء رائد الاسدي

نعي بحق الزهراء عندما يهل المحرم


يشيبني محرم من يجيني
يكدر خاطري ويكثر ونيني
بمصابك ييمة صايبيني
اويلاه يبني وماي عيني
=================
يفجعنني قميصك من انشرة
اشوف اثار طعنات البنحرة
واشوفنها الحوافر فوكَ صدرة
واشوف اظلوعة مطبوگة اعله ظهرة
====================
گلب الوالدة ما ينسى هيهات
وانة گلبي شبع يحسين لچمات
شكثر جسمك ييمة شال طعنات
عليك انحب ييمة وأجر حسرات
=====================
أسالكم الدعاء رائد الاسدي

نعي بحق فاطمة العليلة عليها السلام وهي تنتظر اهلها

===================
المفاركَ عزيز الله اليعينة
يسهر ما تنام الليل عينة
شحال اعزاز گلبة مفارگينة
شالوا كل هلي اوحشة المدينة
==================
شالوا كل هلي حتى النساوين
ما ادري بدربهم وين ما وين
متربة او موحشة اعلية الحياطين
انعى المن واونن واحد اثنين
===================
انعى المن واون يعزاز گلبي
اظل وحدي وعليلة موش حسبي
بيدي ارسم صور والعين تربي
اخذ مني الامانة ها يربي
==================
اخذ مني الامانة خلي ارتاح
راح الچنت اشوفة المسه ومصباح
اخذ كلهن خواتي ولية ما صاح
اشو طول سفرهم والعتب طاح
===================

بعد طول انتظار تراكم التراب على جدران المنزل وكأني بها اخذت ترسم بيدها صور للضعن وبدأت تتكلم مع الصور
====================
على الحايط صور ارسم بدية
واتخيل ضعنهم راد لية
احچي وياه واحس النار بية
هلة وكل الهلة بهل الحمية
=================
هلة بردت ابوي ونظر عيني
وهلة بجيت خواتي التداويني
عماتي هذن والكل يجيني
يفز گلبي واظل انة اونيني
==================

العليلة تسمع صوت الهواء مرة كأنه يحمل صوت اهلها ومرة تخاف منه لانه يصدر صوت بالبيت الفارغ

===================
يهب عالي الهوة وصوتك بذاني
اظن اهلي اجوا والهم جزاني
اگوم اركاظ واعثر وابقى اعاني
افك الباب شو محد اجاني
===============
اصفن وحدي وحسرة اجرها
روحي اعله الاهل خلص صبرها
وحشة الدار ما واحد يمرها
يخوفني الهوة يدوي بحجرها
===================
مرعوبة افز من نومي يهلي
اسم الله من افز محد يگلي
الحزن يهلي چبير وموش حلي
چتال الحزن بية شيخلي
===================

أسالكم الدعاء رائد الاسدي

نعي جديد.. عندما وقع ابا الفضل العباس عليه السلام نادا ادركني اخي يا حسين وكأني بالامام الحسين عليه السلام خرج محني الضهر من الخيام وهو ينادي الآن انكسر ظهري وقلت حيلتي وشمت بي عدوي

الحسين عليه السلام
===============
اجاه الصوت يندب خوية يحسين
طلع محني الظهر من الصواوين
ما يدري بطريجة وين ما وين
يصيح بصوت اشرلي باليدين
====================
إذا تسمعني خوية ارفعلي ايدك
يبو الغيرة انكسر ظهرة عضيدك
اسمعك من صحت بس ما افيدك
وحيد ابگيت من گطعوا وريدك
====================
من صوب الشريعة الصوت اجاني
اعله شاطي الماي ناداني مچاني
مذهول الفكر عباس ماني
كسر ظهري الدهر خوية وعماني
======================

كاني بالعباس عليه السلام يجيب اخاه الحسين عليه السلام
================
العذر لله والك چفيني ماهن
أأشر بيش يحسين وتراهن
وعيوني السهم خوية طفاهن
اخذ من النضر وسفة وعماهن
=====================
علامة اطيك جثة ابلاية چفين
والراس انفلكَ والسهم بالعين
وجربة اعله الصدر وسهام صوبين
وجسمي من الطبر صاير نياشين
====================

الحسين عليه السلام
================
دليني على چفوفك يعباس
وين بيا كتر گطعوهن الناس
اويلي عليك خوية شصار بالراس
تلاگف بالهوة وتجر بالانفاس
===================
راسك ارد احطة بحجري وانعاك
ودمك ارد امسحة بطارف لواك
عد راسك اخيك فكلي عيناك
نويت تروح عني الله وياك
===================
عمت عيني يخوية تلوج عطشان
يحزام الظهر يا تالي الاخوان
راح ابقى وحيد ابين عدوان
حرمنة اتظل يخوية بغير وليان
=====================

عندما وصل الحسين عليه السلام و وقف عند رأس ابي الفضل والعباس عليه السلام ولم يعرفه وكأني به

يمن گاصد علية الصوت اسمعة
احلفك راسي خلة ولا تگطعة
تمهلني اريد وحالي ترعة
لما اخيي يجيني وارد اودعة
==================
اخير وداع هذا ابين الاخوان
عزيز الروح گلبة اعلية لهفان
ما اشوفة اخاف وعمري خلصان
يبو اليمة اخوك عليك عطشان
===================

جواب الحسين عليه السلام
===============
عد راسك اخيك انة الحسين
اشوفك لا عيون ولا الچفين
لواك بيا كتر طايح والايدين
تتانيك الاطفال وتربي العين
=================
متانينك يبو الغيرة على الماي
وسكنة تصيح ها عمي يوفاي
حاضن جربتك وسهامها هواي
مثلك ما حصل عباس سگاي
==================
امدد والسهم طفاها العيون
احط ايدي وشيلك مدري شلون
مطبر من أشوفك موش بالهون
حرم واطفال بالخيمة يتانون
==================

أسالكم الدعاء رائد

نعي عند وقوع علي الأكبر وسماع الحسين عليهما السلام صوته وهو ينادي عليك مني السلام ابا يا حسين


من جاب الهوة صوتك لذاني
چن سهم ابوسط گلبي رماني
بفراگك علي مدري شدهاني
گمت اركض وجدمي عثراني
=================
ركضت بغير دربك تاه فكري
تيهت الدرب يا ناس مدري
يا ناس الولد بالروح يسري
علي ابفرگاك بوية انكسر ظهري
=================
جرحك يالولد ظل يدي ما طاب
شباب وما تهنه من الهوة الهاب
راح ابعز شبابة وچالنجم غاب
خذاك البين مني وگلبي انصاب
====================

عندما وصل الحسين عليه السلام الى جسد علي الاكبر ورآه مقطع بالسيوف كأني به

ذب روحة ويصيح بصوت عالي
على الدنيا العفا بعدك يغالي
بعد طولك يبوية كلشي مالي
عليك النوح والمدمع حلالي
===================
طول ابطول نام وياه بالبر
لگاه من العطش لونة تغير
حاچيني يماي العين ياكبر
اگل لمك عليك شلون مگدر
====================

كأني بعلي الاكبر عليه السلام
===================
تبسم من اجت عينة اعله ابية
ونوبة دموعة سالت بالمنية
سگاني المصطفى شربت امية
وتنوح اعليك يا بوية الزچية
====================

اراد الحسين عليه السلام ان يحمل ولده لكنه لم يستطيع من عظم الفاجعة فأمر بني هاشم ان يحملوه

علي يبني يهد الحيل فرگاك
تراهي العيشة ما تحلى بلاياك
اريد اگعد يبوية وياك وانعاك
حاچيني يبوية وفكلي عيناك
===================
تعالوا يالهواشم كلكم وياي
شيلوه الولد بهداي بهداي
مهو فراكَ الولد صوبني بحشاي
مات وما تهنة بشربت الماي
==================

أسالكم الدعاء رائد الاسدي

نعي محاورة بين علي الأكبر وبين الحسين عليها السلام عندما رجع علي الأكبر برأس ابن غانم وهَو يطلب الجائزة


اجيت براس ابن غانم بدية
اريد الجائزة منك جزية
هلبت تصح شربت امية
وحگك ما بعد ضل حيل بية
==================
حط ايدك على گلبي تفسر
يلهب نار بوية ونارة نسعر
شربت ماي ماكو الله واكبر
تولونة وعلينة ترسَوا البر
===================

جواب الحسين عليه السلام
================
يبوية الماي ما يحصل يغالي
تعال اگرب يبوية وشوف حالي
شوف من العطش يبني شجرال
يبس گلبي ولساني يبس تالي
===================
چن مثل الخشب صاير لساني
يالاكبر هذا حچيك دوهناني
اعذرني العطش خلاني اعاني
وفوكَ صواب گلبي صوباني
===================

علي الاكبر عليه السلام
=================
اعذرني يبوية العطش چتال
تعبني وعماني وغير الحال
الماي ادري نشف بس چلمة تنگال
عمت عيني يبوية همومك ثگال
====================
زيدت الهموم اعليك ادري
ارخصني ارد اروح اقبلي عذري
اصبر بس لچن شيفيد صبربي
الله وياك بوية انطيك عمري
===================

أسالكم الدعاء رائد الاسدي

نعي اول ايام محرم


يهل الضعن يحيود يكرام
بوجودكم ما يوم ننضام
يالدايرين اعله النسا حزام
ما ندري الدهر يخواني شضام
خاف تعيل بينا الگوم ظلام
=================
عزيزة ابين الاخوان العقيلة
تحامي ضعونها حيود الجبيلة
عليها صارت السفرة طويلة
شوفتها لهلها الهم تزيلة
عليهم تنتچي حمول الثجيلة
==================
الاخت بخوانها مرفوعة هامة
من كل صوب حاطتها النشامة
ما تدري الدهر سدد اسهامة
وبعد هاليوم ما تحصل سلامة
تفاركَ وين ابو الغيرة وشهامة
===================
يطشر ضعنهم بأرض الطفوف
وتتحزم عليها الناس بسيوف
ومن عزها وخدرها اتعيش بالخوف
وطول ام الخدر العسكر تشوف
وبيهم ديرة ديرة الوادم اتطوف
====================
أسألكم الدعاء رائد الاسدي

نعي للاخو عن الامام زين العابدين بحق علي الاكبر عليهما السلام
……………………
اخوي حزام ظهري غرب وشال
يفـــراك الاخــــو للروح چتال
على ابن امي الحنين الآه تنگال
بعد عينك يغالي اتغير الحال
انحنه ظهري يخوية والحمل مال
----------------------------------------
حنين ويالاخو ماكو بحنانة
سكن بارض الغرب يمكن نسانة
اذا راح الاخو محد مچانة
شما طال الزمن لجلك عزانة
اظل اصفج بدية اعله الجفانة
---------------------------------------
كل ساعة وشوفك چنك تعود
هسة ايرد عزيزي ونگعد اردود
صوتك دوم اسمعة اه يمفگود
واشوفن صورتك بالبال موجود
ما ابدل عليك اهدومي السود
وانه ادري علية بهاي منگود
-----------------------------------
الدار اعليك وحشة من عفتها
غاطيها الحزن من فارگتها
يسباح الگلب روحي خذتها
اموت وياك لو يحصل بدية
-----------------------------------
المصايب من رحت بعدك خونه (تعبنه)
جسمي والهظم والهم خونه (خاونه)
يالاكبر وين اكو مثلك خونه. (اخو النه)
اظل انعاك كل صبح ومسية
--------------------------------------
اسالكم الدعاء رائد الاسدي

نعي عن السيدة زينب عندما ترى هلال محرم)
---------------------------------------
بين بالـــــسمة هلالك يعاشور
بيك اخواني ناموا حدر الكبور
او وحشة ديارهم ظلت بلا نور
عسة هلالــك يغيب وطفة ظية
---------------------------------
مـن تهل بعد ماتسكت العين
اكابل دوركم وانحب يطيبين
ما بطل ونيني طول السنين
جنـــي بكربلة شما هل علية
--------------------------------
اطـــــب للدار وانشد بيتك اعليك
بــــــس الدار وحشة وما اللاكيك
واصيح بصوت يبن امي وحاجيك
اصيح وماتـــــــرد جواب ليـــــة
=====================
اطــــب للدار بس الدار ظلمة
مرة افرش فراشك مرة المة
وصيـــحن شوفي ابنيتج ييمة
وشوفــي هالهلال اشسوة بية
====================
اسالكم الدعاء رائد الاسدي

نعي في خروج الحسين عليه السلام للطف على طور سيد جاسم الله يرحمه
-----------------------------------------------
صاح حســــــين ياعــباس زيـــــنب انتة تكفلها
يخوية بزودك ويمــــــناك اختنـا ياهو يوصلها
دك صدرة ونهض عباس انة الـــــــكافل ايكَلها
كومي بشاربــــــي زينب اخوچ وسيفي مجرب
امانة عدي اتظلين يخوية انتم تعرفوني
-----------------------------------------------
عباس اليباري اخــــــتة شد المحمـــــــــل ابيدة
يخوية افدي العمر لجلچ فدوة العــــــمر ماريدة
ابشري وكَولي شتردين كل ساعة الحچي يعيدة
ثلث تنعام ياعبـــــــاس كـــفو منك يتاج الراس
يخوية لو وصلنة الطف وحيدة لاتخلوني
--------------------------------------------------
زينب من على الـــناكَة تتـــــنوع لهـــــــاليها
تشوف حسين والعباس واهلها دايرة عليهـا
تمشــي مخدرة وتنهاب واخوتها التباريهــا
ياعــــباس يعيونـــــي يخوية فدوة حاچوني
يوم العاشر بعاشور اريدن خوية تحموني
------------------------------------------
أسألكم الدعاء رائد الاسدي