سنسيز دونيام

قورخما، بو ماوی گؤی آلتیندا یانان آل گونشین،
و افق‌لرده گولن آل شفقین سؤنمه‌یه‌جک.
ایلک باهارین آچاجاق گؤیلو
اؤته‌جک بولبول‌لر...
دونیامیز بیرده بو عالمده خزان گؤرمه‌یه‌جک.
دونیا دوردوقدا سهندین اوجا بورجوندا یانان
اول گوموش رنگ‌لی آی یول‌لاری آیدین‌لاداجاق
آخاجاق نهرلرین،
هم آچاجاق لاله‌لرین.
بیرده ائولرده اینان سؤنمه‌یه‌جک اودلا- اوجاق
ای منیم شانلی ائلیم، حور وطنیم آل گونشیم.
آینا تک پارلاق افق، دریا تکین چرخه اسیر
آی قادین‌لار- آنالار بیرجه آچین پنجره‌نی!؟
صوبح آچیلماقدادیر
صوبحون یئلی داغلاردان اسیر...

#حبیب_ساهر
https://t.me/SANSIZDUNYAM‎‌‌‎‌

«سنین گؤزلرین» غزلی

هر آخشام قدحه تؤکوب ایچدیییم، سنین گؤزلرین‌دی، سنین گؤزلرین...
کئفله‌نیب گئرچه‌یی آشیب گئچدیییم، سنین گؤزلرین‌دی، سنین گؤزلرین...

گؤزیاشیم یاغیش‌دی، نیسگیلیم بولود..، شعریم یاشانتیم‌دی سونسوز، اؤلومسوز..،
اومود تارلاسیندان دیلک بیچدیییم، سنین گؤزلرین‌دیر، سنین گؤزلرین...

گؤزووه گلدیم‌سه بهشتیم اولور؛ گؤزوندن دوشدوم‌سه جهنّم منه!
صراط کؤرپوسودور هر آن گئچدیییم، سنین گؤزلرین‌دی، سنین گؤزلرین...

آیدینلیق گیزلی‌دیر باخیشلاریندا؛تانرینی گؤیده یوخ، اوردا تاپیرام!
گؤیونده چیرپینیب قوش تک اوچدوغوم سنین گؤزلرین‌دی، سنین گؤزلرین...

شعریم بیر دلی‌دی، زنجیرین قیریب! سئوگی آزادلیق‌دیر، روحوم یولجوسو؛
اونا وارماق اوچون منیم سئچدیییم، سنین گؤزلرین‌دی، سنین گؤزلرین...

اؤزومو اؤلدوردوم سنی گؤرونجه؛ باخیشین ویجدان تک روحومو ایزلر؛
بوشونا الیندن هر آن قاچدیغیم، سنین گؤزلرین‌دی، سنین گؤزلرین...

خیالین گمی‌دیر، مینمیشم اونا، گئجه نین سوکوتلو دالغاریندا،
دانلی یارین‌لارا یئلکن آچدیغیم، سنین گؤزلرین‌دی، سنین گؤزلرین...

شاعیر: خسرو باریشان
قادین گونو موناسیبتینده
https://t.me/SANSIZDUNYAM‎‌‌‎‌

سالام، یارالارین نئجه دیر آنا؟
یارالارین سیرتیما اوتوروب بوکور بئلیمی
یارالارین یاریم ،یارالارین یارادانیم ، یارالارین لااله‌الا‌الله-یم
یارالارینی بیره‌ر – بیره‌ر یاپیشدیریرام کاغیذلارا
یارالاریندان بیری ده من، بیلیرم آنا بیلیرم
ساچلارین گئجه‌لریمی سؤکور آرتیق
دونن نیاگارا ساچلارینی جالادی اوستومه
اوره‌ییم سرینله‌دی آنا

آرتیق سورما نده‌نینی بو آیریلیغین
" پوخ ائده‌جه‌ییک، یوخ ائده‌جه‌ییک" لر باشلاندی
یارالارینی سؤکمه‌یه باشلادیلار
من ده یارالاریندان بیری...

من یارالارینلا، یالنیزلیغینلا بیرگه یاشادیم همیشه
دوغدوغوم شه‌هه‌رده یالنیزلیق ایکی مین ائودیر
یاشادیغیم شه‌هه‌رده بلکه نئچه میلیون ائو...
یالنیزلیغین سایی یوخ کی آنا...

سن ممد آرازین بوغازینا دویومله‌نن داغسان
آنا سالامت قال داغ سالامات قال
منسه هله ده بیلمیرم ،
ممد آراز آرازدیر یا آراز ممد آراز؟
هله ده بیلمیرم امانی هاچانادک ایچیمده آغلایاجاق
داغیم قارا، باغیم قارا، قانیم قارا...

او قدر ده قارا سانما منی
تبریزده بیر گؤیرچینیم وار آدی ائل‌گؤلو
باکیدا بیرباجیم وار آدی قیزقالاسی
و بوردا بیر سئوگیلیم وار آدی آتلانتیک
من بئله بیر ده‌لی‌یم
تاریخین گؤزلرینه وورولان بیری
سانیرام العسگرین سازینداکی دنیز بتهوون دیر
یا رشید بهبودوون بوغازینداکی آدام مایکل جکسون
سانیرام ژاندارک تومروسون گؤزیاشی دیر
سانیرام ناظیم حئکمتین قلمینده گیزله‌نن آدام کامینگئز دیر
و البته بونلارین هامیسی سنین یارالاریندا گیزله‌نیب
سنین آغری‌لاریندا
هاچان یول لار اوزومه باغلانسا آیاقلارینین آغریسینی دویارام
هاچان اوزومه بیر قاپی آچیلسا گولوشونو دویارام
سنین غضبین زینب پاشادیر
سنین سوکوتون سارای
حیاتیمین دیوارینداکی ان گؤزه ل تابلومسان آنا
ایندی یا سن ژوکوندون گولوشو اول یا ژوکوند سنین گولوشون
منجه آنالارین هامیسی سنسن
و اوشاقلارین هامیسی من...

یارالارین یاریم، یارالارین یارادانیم، یارالارین لااله‌الا‌الله‌یم
یارالارین نئجه دیر آنا؟

#محمدرضا_لوایی

https://t.me/SANSIZDUNYAM‎‌‌‎‌
https://t.me/adabiiyatfenomenlari
https://t.me/secilmiseirler

ساچلارینین هر تئلینده بیر یالواج،
کیپریک‌لرینین هر بیر اوخو بالاجا بیر ملک،
باخیشینین هر آلووو گؤیدن گلن بیر مؤعجوزه،
بئله‌سینه اینانماق ایسته‌ییرم سنه.

هاردادیر سارایین؟
سنین تانرینا تاپینماق ایسته‌ییرم.
سنین تانرینین اؤلومو یوخدور، باشدان-باشا حیات‌دیر،
جهنّمی یوخدور، باشدان-باشا جنّت‌دیر،
شیطانی یوخدور، باشدان‌-باشا ملک‌دیر.

سنین دینینده سرخوشلوق قورتولوش یولو،
سئوگی اینانجین ذیروه‌سی،
اویاقلیق شرع واجیبی،
یوخو حارامدان حارام.

سنین تانرینا تاپینماق ایسته‌ییرم.
سنین تانرینین ساواشلاری چیچک‌له، اؤپوش‌له‌،
پیغمبرلری سنه بنزه‌ییر،
عذابی سنین آیریلیغین، سنین اوزاقلیغین‌،
دینلرینه تابع اولانلار، عاشقانه ناغیل‌لارین قهرمانلاری‌دیر.

سنین تانرینا آند اولسون،
اینانمیشام بو گؤزل تانرییا.
#زاهي_وهبي
https://t.me/SANSIZDUNYAM‎‌‌‎‌

آت منی

دیلیم دینمز، کیرپیکلریم سس ائلر،
نئجه خوشدور-اورگیمی کس ائله...
قالان عؤمره ياريم اورک بس ائلر،
اونوت منی، آلدات منی، آت منی.

ائنیشی قار، یوخوشو قار بو یولون،
یاد نفسدن بوز قایاسی سو اولو...
یالان یولو بئش آددیملیق سو یولو،
آلدات منی، اونوت منی، آت منی.

سن عؤمرونون آتشينده ياناندا،
کؤلگه کیمی گرکسیزم یانیندا،
قیمتلی بیر ایتیک ساخلا یادیندا،
اونوت منی، آلدات منی، آت منی.

گؤزدن-گؤزه کؤرپو سالماق نر ایشدی،
باخیشلارین مئیلینی تئز دییشدی.
تزه آددیم اؤزو تزه دؤيوشدو،
آلدات منی، اونوت منی، آت منی.

بو سئودادان نه یئتیردیک، نه اوزدوک؟
دالغاسیندان نه غرق اولدوق، نه اوزدوک.
آخیر سنی دوزده قویدو بو دوزلوک...
اونوت منی، آلدات منی، آت منی.


#ممد_آراز
https://t.me/SANSIZDUNYAM‎‌‌‎‌

بو شهرده ان گؤزل ایش

بو شهرده ان گؤزل ایش،
سنی سئومکدی، سئومک.
سنی بو شهرین هر قاریشیندا،
یازین‌دا، یایین‌دا، قیشین‌دا سئومک.
سنی قارانلیق‌دا، ایشیق‌دا سئومک.

تئل‌لرینی توک‌ به‌ توک،
ال‌لرینی بارماق- بارماق سئومک.
هر گون سنه شئعر یازیب
سنی واراق- واراق سئومک.

واراغا هوپان مرکّب کیمی،
سنه هوپماق.
هر گئجه اؤزومو سنده ایتیریب
هر سحر یئنه تاپماق.

دَییشدیم من سنی گؤرندن بری،
منه نه ائتدینسه، تکجه سن ائتدین
سن‌سیز بو شَهَرده غریبدیم، غریب،
منه بو شَهَری سن وطن ائتدین.

بوردا تکجه سنی قازانمیشام من،
بختیم اؤز ایشینی بیلیرمیش دئمه.
یوز یول بو شهرده یول آزمیشام من،
بوتون یول‌لار سنه گلیرمیش دئمه.

...قیرمیزی یایلیق‌دا
یولدان اؤتوردون،
قانیم داماریم‌دا دوندو، دایاندیم.
دلی‌ تک سوردویوم بو جاوان عؤمرون-
قیرمیزی ایشیغی یاندی، دایاندیم...

#رامیز_رووشن
https://t.me/SANSIZDUNYAM‎‌‌‎‌

گؤره سن خیالا دالؽب بیر دفعه‌،
"دارؽخدیم" دئییرلر یادا دۆشنلر؟!
حئییف کی قاپؽنین زنگینی دئییل،
اۆره‌یی دؤیورلر یادا دۆشنلر...

درد الیندن قدح-قدح اۆزولوب،
دوداقلارا سطیر-سطیر دۆزولوب،
آلا گؤزدن دامجؽ-دامجی سۆزولوب،
یاناغا دَییرلر یادا دۆشنلر ...

هردن محو ائله ییر، سانکی "عجلدیر"
هردن گۆلومسه‌ییب گؤیه اۇجالدیر
ساچلارا دن سالؽر، واختسؽز قوْجالدیر
قامتی اَییرلر یادا دۆشنلر....

سن سؤزدن گۆلله آت! تۇش اوْلسون شاعر...
آدؽن اؤزون کیمی قؽش اوْلسون شاعر!
بۇ جاوان عمرۆنو نۇش اوْلسون شاعر
یاوانجا یئییرلر، "یادا دۆشنلر"...

#آیاز_هیدایت_اوغلو
https://t.me/SANSIZDUNYAM‎‌‌‎‌

داغلارین باشیندا بیتن چیچه‌یم،
هر اَسَن کوله‌یه باش اَیمَرَم من.
شیرین آرزولارلا چارپان اوره‌یم،
اؤلرم، دؤنمرم بو عملیمدن.

وطن تورپاغیندا قاینار بولاغام،
آرخام اوجا داغلار، اؤنوم گؤی مئشه
کیم دئییر دونیادا من بیر قوناغام؟
گله‌جک نغمه‌لی سسم همه شه.

تزه دنه دولموش ساری سونبولم،
اَیَرَم باشیمی آنا تورپاغا
سئویلندیر کؤنلوم، سئوندیر کؤنلوم،
سئوگی‌دن اوره‌ییم دؤنوبدور داغا.

شیرین بیر لایلایام، دوغما بیر سسم
ایستی بئشیک‌لردن اوجالاجاغام
من نغمه دئمه‌سم، اؤته بیلمه‌سم
او زامان، او زامان قوجالاجاغام

بیر ائوین گلینی، آناسی‌یام من
بیر ائوین اوجاغی، اودویام دئمک
همه شه، همه شه یاناسی‌یام من
همه شه چیراغیم شُعله‌لنه‌جک

اینانما سوسدورا زامان قلبیمی
اینانما دئسه‌لر اؤله‌جه‌یم من!
بو ائله، بو یوردا کؤرپه قوش کیمی
همه شه باهارلا گله‌جه‌یم من!

#مدینه_گولگون
https://t.me/SANSIZDUNYAM‎‌‌‎‌

یئنه کوسوب نه گزیرسن هاوالی؟!
گل بو یولو قوشا گئدک عزیزیم!
داغدا داغا سؤیکه‌ننده اَییلمز‌
گل بو یولو قوشا گئدک عزیزیم!

اوجا قایا عظمتلی، ووقارلی
ایکی زیروه او دومانلی، بو قارلی
آیریلیقدان قلبیم یامان غوبارلی
گل بو یولو قوشا گئدک عزیزیم!

تنها گئتمه او یوللاردا خزان وار
عشق عذاب‌دی باش ایتیرن، آزان وار
سنی منیم طالعیمه یازان وار
گل بو یولو قوشا گئدک عزیزیم!

#سیمران_حسن_اوو
https://t.me/SANSIZDUNYAM‎‌‌‎‌

ائله دایانیرسان ائله باخیرسان،
ائله‌بیل قارشیندا قورو بیر داشام.
ایپک ساچلارینی اؤپوب اوخشایان،
ائله‌بیل نه واختسا من اولمامیشام.

سنی دوسلاریم‌لا تانیشلاریم‌لا،
من تانیش ائدردیم نه واختسا بیر-بیر
ایندی اؤزگه‌لری یاد احترام‌لا،
دئییر تانیش اولون...
نه غریبه‌دیر!

یوخونا گیرردیم نه واختسا هر دم،
یولومو گؤزلردین یول‌لاردان اوزاق.
من سنین یوخوندان چیخیب گلمیشم،
بو دا بیر یوخودور گل تانیش اولاق.

قولونا گیرردیم بو یادیندادی؟
گئدردیک آرزیمیز، یولوموز شریک
قولوم قول‌لارینین لاپ یانیندادی،
توخونسا بیز ایندی عوذر ایسته‌یَریک

هایاندا اولدومسا سحر یا آخشام
آرادین سن منی، گؤردون سن منی،
ایندی گؤزلرینین قاباغیندایام
هایاندا دوروم کی گؤره‌سن منی؟!

#نریمان_حسن‌زاده
https://t.me/SANSIZDUNYAM‎‌‌‎‌

یوللارا باخماقدان گؤزوم یورولدو
سنی چاغیرماقدان سؤزوم یورولدو
ایراده یورولدو، دؤزوم یورولدو
ائی منیم عینادیم، سن یورولمادین!

یئرلره، گؤیلره سالدین سس-صدا
اوجا ذیروه‌لری گتیردین یادا
اوفوقلر نه قدر گئنیش اولسا دا،
ائی قولوم-قانادیم، سن یورولمادین!

بوتون عؤمرون بویو یاردین، یاراتدین
آرزویا یئتیشدین، مطلبه چاتدین
روحوما اویوشدون، کؤنلومه یاتدین
زحمتیم، اوستادیم، سن یورولمادین!

دوشمن، بوستانیما خئیلی داش آتدی
گاه مؤحکم توتدوردو، گاه یاواش آتدی
تمیزلیک، حالاللیق سنی یاشاتدی،
مغرور استعدادیم، سن یورولمادین...

#زلیمخان_یعقوب
https://t.me/SANSIZDUNYAM‎‌‌‎‌

چؤله یاغیش،
اوره‌ییمه حسرت،
فیکریمه سن...
نئجه یاغیرسینیز اوچونوز بیردن!
بیر بیلسن...!

#جمال_ثریا
https://t.me/SANSIZDUNYAM‎‌‌‎‌

چیلله دیر، بَزه ییر ماسانین اوستون
جان آتیر گؤرونه هامی دان اوستون
چیخاردیر گؤزونو دوشمانین، دوستون
یا رببیم! وئر شفا گؤرمه میش لره

آل_الوان مئیوه نی، ژله نی دوزور
اولمایان کیمسه نین باغرینی اوزور
سانالدا پایلاشیب، آلقیشلار گَزیر
یا رببیم! وئر شفا گؤرمه میش لره

شکیلده قارپیزلا، قول_بویون اولور
سانکی سئوینجینی میللت له بؤلور
یوخسول بالاسینین گؤزلری دولور
یا رببیم! وئر شفا گؤرمه میش لره

اصیل کیمسه لرین عقده سی اولماز
هر آن خوش گونوندن شکیل لر سالماز
اوره یی، نخوت له، غرورلا دولماز
یا رببیم! وئر شفا گؤرمه میش لره #لیلی_خیاوی
https://t.me/SANSIZDUNYAM‎‌‌‎‌

قارسیز قیش گئجه‌سی
دیلیم سؤزلریمین قوللوغوندا
ماهنی‌سیز بیر ایلنجه، سارالمیش بیر سئوینج
اللریمده دونان چیچکلر
قاپیمیزدا قار آدامی،
بیر فیلیم چک… گولوشلریمدن
گؤزلرین گؤیرسین قاپ باجامیزدا
باخیشین هئیوا قوخوسون
بیر شکیل چک دیلیمدن سؤزلریمین بورنو قاناسین
قیسا بیر شعیر اوخویوم ماشینیمین طالعیندن
اوخویوم کؤلگه‌مین اقتدارینی
نومره‌سیز تئلئفونلاردان،
امنیت: خیرداجا قارا بالیق گؤی اوزو دنیز
شعیریمی باغلا دیلیمه قاپیمیز قاشینسین
هر شئی هر زامان،
دویولا بیلر
امنیت ده!

#مسعود_اسلامی

https://t.me/SANSIZDUNYAM‎‌‌‎‌
@qanadli_duyqular
https://t.me/secilmiseirler