Шерзод Комил Халил

Қўрқоқ

Мен сизни кўп вақтлар унутдим нечук,
Йиллардан олисда, ойлардан узоқ?!
Ўйлаб кўрмай туриб сақладингиз кек,
Йўлимга қўйдилар қанчалар тузоқ.

Далаларим бўлди янтоқзор буткул,
Боғларимни босди чақиртиканак.
Ҳамон сизни деса симмиллар кўнгил,
Ҳамон сизни деса уради юрак.

Мен озод қушлардай кўкка интилиб,
Учсам кутди мени кимлар қафасда;
Самолар кўксидан ўтдим умтилиб,
Фақат сизни ўйлаб ҳар бир нафасда.

Севдимми-севмадим, билмадим - не ғам,
Ҳаққу-ҳақиқатдан кўра бу - жумбоқ.
Фақат ўйладимки, сизга дил очсам,
Йўқотиб қўяман, мен сизни кўпроқ.

Билмадим, нимадан қўрқдим мен бунча?
Розиман, айбланг, сиз мени қўрқоқ.
...Мени ҳамма кўпроқ таниб олгунча,
Сизни керак эди, кўпроқ асрамоқ...
21.12.2024.
Тошкент.

@Sherzodkomilkhalil