Шерзод Комил Халил

Оқим

Дунё ўтиб борар шамолдай шошиб,
Билдирмай олдинга ғизиллайди вақт.
Кечагина сенга кўнглимни очиб,
Тургандим мен билан бўлади, деб бахт.

Соат чиққиллайди, лаҳзалар тиғиз,
Ортга қарамайди бетўхтов оқим.
Бизни алдаб қўяр замон - ялмоғиз,
Абадият оша мўралайди ким?!

Чангига беланиб йиллар захига,
Унутилиб кетар ўтилган йўллар.
Санъат бор яхшиям одам бахтига,
Яшаш саодатин мангуга қўллар.

Ким ҳайкал ясайди, ким чизар сурат,
Мусиқани қалбга ким қилади жо?!
Поэзия абад ўлмас бир ҳайрат -
Кўнгил ўлкасини қилар истило.

Адабиёт агар бўлмаса асти,
Шаккоклик бўлса-да, айтаман ҳарса;
Мени бу дунёда кўндиролмасди,
Яшаб қолиш учун бошқа ҳеч нарса...
25.12.2024.
Тошкент.

@Sherzodkomilkhalil