وجودمي ترې قربان دی صدقه مي ترېنه سردی
زړګی زَما جانان زَما ساقي د خوږ کوثر دی

پرې ښکلې مدینه ده او پرې ښکلی ګل حرم دی
عیان ټوله جهان کي ښار زَما د خوږ دلبر دی

منم پروردګاره ستامحبوب دی تاته ګران دی
منم یٰس طٰهٰ کي مو پټ راز دی پټ نظر دی

په څنګ کي یې اوسېږي څلور ستوري نازولي
صدیق دی او عمر دی بل عثمان علي حیدر دی

نه دارنګه وجود شته او نه دارنګه بل حُسَن
ښایست ته یې حیران دي واړه شمس دی که قمردی

بېحده راته ګران دی زړه زَما دی روح زَما دی
ماشپون ته محترم دی او زَما د زړګي سر دی
ﷺ