Ko‘z tikib yo‘lingga umidim yig‘lar,
Baxtiqaro baxtni kutar intizor.
Yuragim tubida bitta g‘am uxlar,
Meni kutib turgan bitta najot bor.

Bir nur bor zulmatni aylaydi pora,
So‘ngra singib ketar borliq qa‘riga.
Baxtga yetmoq uchun topilmas chora ,
G‘amdan ketolmayman bir zum nariga.

Bir obi hayot bor, sahrolarga jon
Baxsh etib yo‘qlikka ravona bo‘lar.
Sahroday qurisam munis mehribon
Onam boshim uzra parvona bo‘lar.

Qo‘rqaman bag‘riga bosh qo‘ysam bir kun,
Uyg‘onib qoladi yuragimda g‘am.
Mehrining taftida isinmoq uchun,
Onamning ko‘ngliga kiradi shu dam.

Nigohimdan yulqib tashlab barini,
Sog‘inchimdan yoqay tonggacha gulxan.
Quvonchlar to‘ldirsin Onam bag‘rini,
Mening yuragimda uxlay qolsin G‘am.

Mahzuna Bobomurodova