#Maqtanish_time
Xushijonga*¹Sheʼrlaringiz barokatli yomgʻirlarga oʻxshaydi,
Tomchilagan qalblarda bogʻu rogʻlar yashnaydi,
Sheʼrlaringiz xushyoqar shamollarga oʻxshaydi,
Tuygʻularni eng toza kengliklarga boshlaydi.
Tashbehingiz anglasam maʼno olgum bir jahon,
Assalomu alaykum va rohmatulloh, Xushijon!
Suhbat chogʻi siz attor, soʻzlaringiz xushboʻylik,
Xaridor - tinglaguvchi mast boʻladi isidan.
Yusuf Yaʼqub oʻgʻlidan merosmi bu xushroʻylik,
Boqqan koʻzlar porlaydi baxtiyorlik hissidan.
Yuzingizday chiroyli boʻlsin qalbdagi iymon,
Biz tomonga yuz burib, bitta soʻzlang, Xushijon!
Buxoro - ulugʻ maskan. Ulugʻlik - bu Buxoro,
Buxorolik degani, bir maqom jahon aro.
Har farzandiga oʻzi berib chiqqaydir oro,
Al-Buxoriy bundadir, bundadir Ibn Sino.
Buxoriy boʻlmoq asli yuksak burch va sharaf-shon,
Sharafingizga loyiq yashang doim, Xushijon!
Koʻzlaringiz ziyosi kitoblarga sochilar,
Kitoblar bilan qalbda yangi ufqlar ochilar.
Ilm qadrin bilganlar - misli mohir ovchilar,
Bilim olami aro zoʻr kitob izlovchilar.
Sizga loyiq rutba - bu eng yaxshi kitobxon,
Kitobingizga dastxat berasizmi, Xushijon?
Ikki azizingizning dunyoda tayanchisiz,
Ikki qaldirgʻochingiz ishongan suyanchisiz.
Oilangiz bir vatan, siz sergak jangchisiz,
Doʻstlarning yelkadoshi va koʻngil quvonchisiz.
Irodangiz, shahdingiz hayotda boʻlsin qalqon,
Yovuzlarga yengilmay adl yashang, Xushijon.
Kasbingiz koʻp savobli, sababchisiz shifoga,
To abad noil boʻling el-yurt qilgan duoga.
Yaqin kelmang taʼmagirlik, manmanligu zinoga,
Chin ixlosu halol kasb yetishtirgay Xudoga.
Ikki olam bagʻrida baxt bersin sizga Rahmon,
Baxt ulashib yashashdan hormang sira, Xushijon.
Yozsam sheʼrim uzayib kichik dostonga oʻxshar,
Taʼrifingiz keltirmoq sirtdan osonga oʻxshar.
Qalamim bukilgaydir, boqsam kamonga oʻxshar,
Taʼrifingiz bir ummon, birda osmonga oʻxshar.
Alloh uchun birodar boʻlganim, ey qadrdon,
Vaalaykum assalom va rohmatulloh, Xushijon!
©Angrenlik muxlisingizdan
____
P/s. She'r menga atalmagan. Shunchaki ismimizga atalgan ekan. Shunga oldim😊. Meni ham Xushijon deyishadi-da ...
@Xushnora_uz
