Forward from: Xonsuluv Aminova
ГУВАЛАК ФАРЗАНДИМАН...
(Гувалак қишлоғи 600 ёшга тўлди)
Қадимдан бобом суйган,
Момом меҳрини қўйган,
Юракка номин ўйган,
Фахр, ифтихор туйган --
Гувалак фарзандиман,
Неъматига бандиман!
Олимларнинг макони,
Кетган довруғи, шони,
Сухандон, шоир кони,
Қишлоқларнинг хоқони --
Гувалак фарзандиман,
Ҳайратига бандиман!
Гузарларда ободлик,
Хирмони маҳобатлик,
Ширмони улуғ, тотлик,
Чавандозлари отлиқ --
Гувалак фарзандиман,
Шуҳратига бандиман!
Йигит-қиз олар билим,
Ҳатто, хорижий таълим,
Лолдир дунё, лол тилим,
Илмга чанқоқ элим --
Гувалак фарзандиман,
Фикратига бандиман!
Кўплари гимнаст, полвон,
Ҳар бир турда чемпион...
Спорт-- соғлик, шараф ва шон,
Таърифи минг бир достон --
Гувалак фарзандиман,
Журъатига бандиман!
Шоҳ улов ҳар бир уйда,
Меҳрини берар тўйда,
Ифорин сочар жийда
Лапару қўшиқ-куйда --
Гувалак фарзандиман,
Санъатига бандиман!
Тадбиркорлик авжида,
Қурилишлар мавжида,
Истиқлол бахт ганжида
Тинч яшар халқим жуда --.
Гувалак фарзандиман,
Меҳнатига бандиман!
Меҳмоннаввоз, хушкалом,
Қаршилар, бериб салом,
Борини кўрар баҳам,
Ўтказиб турга ҳар дам --
Гувалак фарзандиман,
Ҳимматига бандиман!
Етти уруғ ҳамжиҳат,
Қуда-анда, дўст абад,
Ёр эътиқод, ҳидоят,
Битта мушт мангу албат --
Гувалак фарзандиман,
Хилқатига бандиман!
Ватан уруш муқаддам,
Бўлмасин деб бошим хам,
Фарзанд кетиб, кўзда нам...
Юрагин ўртаган ғам --
Гувалак фарзандиман,
Ҳасратига бандиман!
Устозу буюкларин,
Ёшлару суюкларин,
Ёзмадим исмларин,
Биласизлар барларин --
Гувалак фарзандиман,
Қудратига бандиман!
Абдулла момо юрти,
Номин дилида тутди,
Болалиги хуш ўтди,
Шоирда ҳис уйғотди --
Гувалак фарзандиман,
Юрт мадҳига бандиман!
Бўта ўтаб бурчини,
Чархлаб қалам учини,
Куйлаб эркнинг кучини,
Битди дилдан ушбуни --
Гувалак фарзандиман,
Ҳикматига бандиман!
Бўтабек ЎТКИР,
Қашқадарё вилоят Косон туман Гувалак шаҳарчаси.
30 май 2024 йил.
