مشتاكلك يمته تمر عليه
مشتاكلك كل حيل ما ضل بيه
حنيتلك تدري اهواي ردتك تسولف وياي
مشتاكلك خويه
*
مو كل اخو يفكد اخو الفاكد اخو شيصبره
ينطيك كلبك يالحسن ضهر الحسين تكسره
كلشي يروح وينسي بس تبقه خويه الذكره
ضليت انوح بغربتي وابجي اعله ذيج العشره

محتاجلك لا تمشي وتفاركني
محتاجلك شبكت اخو تشبكني
من تمشي اضل ابلا راي ردتك تسولف وياي
**
بالكوه اجر كمت النفس ضاع الهوه وشميتك
ضاكت بعيني دنيتي ياخويه وحتاجيتك
روحي ادفنتها بالكبر بالكبر من خليتك
والبيت ما ينطب بعد يمته ترد البيتك

لتعوفني بداعت هذيج الخوه
لتعوفني يالفركتك مو حلوه
كل لحضه تهمل عيناي ردتك تسولف وياي
*


من تمشي عني يالحسن كلي اشيضل بجروحي
مو روحك الطلعت تره وياك طلعت روحي
يمك نحت خويه وكلت هلبت يكعدك نوحي
حيلي هدمته من رحت وهديت خويه اصروحي

ونيتلك يالموتتني بموتك
ونيتلك خويه وشلت تابوتك
ظلمه بغيابك دنياي ردتك تسولف وياي
**
زينب شكلها يالحسن لو ناشدت حاجيني
زينب حنينه ولو بجت يم راسك تبجيني
اعله دموعي ما لحك كمت وانه الدمع يجويني
وتكلي معقوله الحسن ما راح اشوفه بعيني

حاجيتها وكلتلها ارحمي بحالي
حاجيتها ياخويه راح الغالي
خويه ويروحج بهداي ردتك تسولف وياي
*







افراك الاخو ما ينحمل والله يعين الفاكد
وياخويه تدري بدنيتي غيرك اخو ماريد
اتفاركنه وندار الزمن واحد مضيع واحد
وحسين اخوك بحيرته يبجي اعله كبرك كاعد

بجيتني اوسد الكبر بيبانه
بجيتني وصعبه التروح اخوانه
طال الهجر يا رجواي ردتك تسولف وياي
*
احزام ضهري الكربله ياخويه اريدك تدري
بعباس باجر عالنهر ينكسر رايح ضهري
باجر يجي يمي الشمر وبسيفه يكطع نحري
وذيج الحوافر لو متت كل ساع تسحك صدري

بالعاشر مارايح ايرحموني
بالعاشر راح العده ايسلبوني
وانه انحرم من الماي ردتك تسولف وياي
*
تمت
تحسين الخفاجي