QO‘LSOAT
O‘spirin qiz Zamiraga ertaga javob beradigan bo‘lishdi. U o‘zini davolagan vrach Beknazir Ahtamovichdan o‘la o‘lguncha minnatdor. Axir oshqozonini operatsiya qildi-ya...
Bugun shu vrachning tug‘ilgan kuni. Zamira kecha onasi bilan sovg‘a borasida uzoq maslahatlashib, oxiri qo‘lsoat tuhfa qilishga qaror qilishdi.
– Beknazir Ahtamovichning qo‘llari dard ko‘rmasin. Yaxshisi, u kishiga qo‘lsoat sovg‘a qila qol. Shunday chaqqon bilakka qo‘lsoat yarashmasinmi axir? – dedi Zamiraning onasi. Zamira bu gapni ma’qulladi.
Zamira chiroyli, bezatilgan qutiga solingan qo‘lsoatni olib Beknazir Ahtamovich bo‘lmasi tomon yurdi. Bo‘lma eshigi berk ekan. Bir-ikki chertib, uning nomini aytib chaqirgandi, ichkaridan «kiravering» degan ovoz keldi.
Zamira ostona hatlab vrachga salom berdi. U orqa o‘girib o‘tirar, nimadir qilayotgandi.
– Sizni tabriklash uchun keldim. Arzimasa ham mana shu sovg‘amni oling, iltimos, – dedi Zamira vrachga yaqinlasharkan va tuyqus rangi dokaday oqarib ketdi.
Beknazir Ahtamovich chap tirsagiga yasama qo‘lni taqib, o‘rnidan turdi.
📕 “IKKI QUTB”, Umid Ali
O‘spirin qiz Zamiraga ertaga javob beradigan bo‘lishdi. U o‘zini davolagan vrach Beknazir Ahtamovichdan o‘la o‘lguncha minnatdor. Axir oshqozonini operatsiya qildi-ya...
Bugun shu vrachning tug‘ilgan kuni. Zamira kecha onasi bilan sovg‘a borasida uzoq maslahatlashib, oxiri qo‘lsoat tuhfa qilishga qaror qilishdi.
– Beknazir Ahtamovichning qo‘llari dard ko‘rmasin. Yaxshisi, u kishiga qo‘lsoat sovg‘a qila qol. Shunday chaqqon bilakka qo‘lsoat yarashmasinmi axir? – dedi Zamiraning onasi. Zamira bu gapni ma’qulladi.
Zamira chiroyli, bezatilgan qutiga solingan qo‘lsoatni olib Beknazir Ahtamovich bo‘lmasi tomon yurdi. Bo‘lma eshigi berk ekan. Bir-ikki chertib, uning nomini aytib chaqirgandi, ichkaridan «kiravering» degan ovoz keldi.
Zamira ostona hatlab vrachga salom berdi. U orqa o‘girib o‘tirar, nimadir qilayotgandi.
– Sizni tabriklash uchun keldim. Arzimasa ham mana shu sovg‘amni oling, iltimos, – dedi Zamira vrachga yaqinlasharkan va tuyqus rangi dokaday oqarib ketdi.
Beknazir Ahtamovich chap tirsagiga yasama qo‘lni taqib, o‘rnidan turdi.
📕 “IKKI QUTB”, Umid Ali