احنه منتظرينك لحضه ما ناسينك
ــــــــــــــــــــــــــــــــــــــــــــــــــ
ضاكت الدنيا يمهدي وكل عدل ما بيها
بيها ضل يحكم الباطل بالضلم يمليها
راية الحگ نكّساها ورايته ايــعليها
ننتظر جيتك يمهدي وانته التصفيها

سيدي متانيـــــنك
لحضه ما ناسينك
ـــــــــــــــــــــــــــــــــــــــــــــــــــــــــــ
نحلفك ابضلع الزجيه عجّل ورد لينه
تدري بغيابك يمهدي ســيدي اتأذينه
الفتن كثرت علينه انهـض ونــــجّينه
يمته يا ساعه النشوفك بيها يا مهدينه

طوّليت اسنينك
لحضه ما ناسينك
ـــــــــــــــــــــــــــــــــــــــــــــــــــــــــــ
والله يالمهدي غيابك جمره تجوي ابروحنه
تبقى تلهب نار بينه وما يبطّل نــــــــــوحنه
احنه كل همنه نشوفك حتى تشفه اجروحنه
هايه غايتنه يمهدي وهذا كل اطموحنه

فدوه كلنه العينك
لحضه ما ناسينك
ـــــــــــــــــــــــــــــــــــــــــــــــــــــــــــ
لشوفتك مولاي كلنه ننتضر ونتاني
ندري مو بيدك يمهدي والامر ربّاني
لكن الغيبه طويله وتدري بينه انعاني
بجوره ضل يحكم علينه القاصي ويّه والداني

يا ابو صالح وينك
لحضه ما ناسينك
ـــــــــــــــــــــــــــــــــــــــــــــــــــــــــــ
الفتن مولاي كثرت وانته اعلم بيها
نار شبت بينه تدري وانته الطفيها
مثل حيدر صول بيهم بس جثث خليها
مثل هدّة گمر هاشم من يهد عليها

يالثار احسيــــنك
لحضه ما ناسينك

علي كاظم المنصوري