الشاعر علي محسن الفرطوسي

قصيده لستشهاد الامام الكاضم عليه السلام
...

بألم لفراك وهمومه
يبويه انه معصومه
تبده الماي شيلمه
تبده الماي  تبده الماي

@@@@@@@@@

بألم وبنوح   وكلب مجروح
حمام الدوح  يبويه مايون وني
عله الاهات     عله الونات
بعد هيهات    افارك جرحي وحزني

اجلبنك يليلي والجفن ساهر
وكل اليوم اليمرني انتضر باجر
ولا ادري ببويه اشجره وصاير
عليه دمعاتي تجري والفكر حاير

اهيم بعالم اوجاعي
وحس تتكسر اضلاعي
بشفاهي تعثر الكلمه
تبده الماي  تبده الماي

@@@@@@@@@

بسجن محبوس   ضوه الفردوس
الگلب متروس     شوك وكل نبص ونه
يبويه شلون         متى تعودون
يهل المسجون      سجنك اخرك ﭼـنه

اكابر والدمع صاير الي سلوه
هجركم جمره وبيه كلبي تجوه
تره الفاكد عزيز بليله يتلوه
الاسمها فاطمه ليش بدمع تروه

الحزن والهم لوه شراعي
منك مااجه الساعي
الليالي موحشه وضلمه
تبده الماي  تبده الماي


@@@@@@@@@

عليك شلون      اغمض عيون
يضل مرهون     گلبي بالسجن وياك
اون بهداي        بدمع عيناي
سمعت اهواي    السجن قاسي ولا رحماك

اجلبنك يليلي ومانمت لحضه
انه معصومه بويه لحالي ماترضه
لصلاتي بمدمعي يالغالي اتوضه
لان ادري الحديد لجفك يرضه

بسجن هارون متغيب
گلبي وراسي مشيب
سجانك بلا رحمه
تبده الماي  تبده الماي

@@@@@@@@@

گلب مجروح      حلم مذبوح
عذاب ونوح       على موسى ابن جعفر
دمع منثور          يغرك بحور
جنح مكسور      على بتك تضل تسهر

بالحسره اهدنه جبل حمرين
وغرك بالدمع بويه بحر قزوين
يشهد الله ماتنشف دموع العين
غريب وعالجسر ومقيد الجفين

ياراهب بني هاشم
اون اعليك يالكاضم
بدر ومنور الضلمه
تبده الماي  تبده الماي


@@@@@@@@@

يهل المسموم         يهل المضلوم
يهل مهموم           شعوري فاگده وثكلى
حسبت حساب       يهل الغياب
الجرح ماطاب        وتنوح اهل السمه لجله

 عليك ابلا شعور دموعي هماله
وناشد نعش ابويه ياهو الشاله
اريدن راعي ثاره يداعي كتاله
مات بغربته وماشافته عياله

غريبه ودمعتي بخدي
عشة مهمومه بوحدي
اعله گلبي جروحي مزدحمه
تبده الماي  تبده الماي


@@@@@@@@@

علي محسن الفرطوسي
  

لستشهاد السيده زينب عليها السلام
...

ياهلي . المثلي ينهد حيله
ياهلي . موتي حان الليله
ياهلي.  نعشي ياهو يشيله
      ياهلي  ياهلي

...

الاخت مهيوبه تبقه لوتمرهه ٳعزازهه
وبين الاخوه جنهه شجره كل بشر ماهازهه
وقبل لاتثمر زهرتي  الشمر بالطف حازهه
ماتت وراحت ضحيه وسوطهه جنازهه

ياهلي.  ليش ماجيتوني
ياهلي  . وغمضيتو عيوني
ياهلي . ليلة الفرگه ٳطويله
ياهلي.  نعشي ياهو يشيله
      ياهلي ياهلي

...

اثر الآم السبايه جفوفي باقي اعليهه
ماشفت راحه بحياتي وغربتي تاليهه
عشت مابين المدامع وروحي آنه انعيهه
السؤال الي هضمني ياهو اليورايهه

هالسؤال  . مااعرف ٲجوابه
هالسؤال  . المثلي وين احبابه
هالسؤال  .  عباسي ارد اشكيله
ياهلي.  نعشي ياهو يشيله
      ياهلي ياهلي

...

ياعباتي وذكرياتي الباقيه اويه جروحي
ميته وﭼـني بخرابه روحي تهجر روحي
ردت عباس اشتكيله ورد اكثر نوحي
لويجيني حسين اخويه حسين يامذبوحي

لويجون  . اخوتي اهل الغيره
لويجون  . ماتضل كل حيره
لويجون  . شامتي ياويله
ياهلي.  نعشي ياهو يشيله
      ياهلي ياهلي

...

نعشي من ينشال خويه حاضر تمنيتك
وبالعزيه انته واكف تبجي بتعزيتك
لاكن ابلا جف يخويه عالنهر تركيتك
ورغم هذه يابوفاضل يالكمر ناديتك

يااخوي  . انته اغله احبابي
يااخوي  . تهيل انته ترابي
يااخوي . والحزن ترتيله
ياهلي.  نعشي ياهو يشيله
      ياهلي ياهلي

...

بالغرب والغربه زينب ابد مامعتاده
اني ام الشرف كله اني عمة الساده
هالجنازه هايه المن شامتي لوناده
جرحي ياعباس بعدك مايصح ضماده

بالجروح  . شيعوني بغربه
بالجروح  . نعشي يطلع صعبه
بالجروح  .  بضلعي شمر وي خيله
ياهلي.  نعشي ياهو يشيله
      ياهلي ياهلي


علي محسن الفرطوسي

قصيده لم البنين
....

يعرف شنو الليل كلمن فاكد احبابه
مهدومة الحيل اجيله واكعد ابابه
عباس  ـ  وحسين  ـ ذوله اغله الغوالي

......

الليل ماهو الليل من بعد الغوالي
من حنيني الطير أيحن اعله حالي
افز مرعوبه وصوركم ترس بالي
عانداني الزمن كلشي مابقالي

اكتب عله الباب ابني طول غيابه
مهدومة الحيل اجيله واكعد ابابه
عباس  ـ  وحسين  ـ ذوله اغله الغوالي

......

علي علمني الصبر من جان موجود
الصبر وكت المصيبه كال مريود
لجن من راحو اولادي صبري مفكود
تغرك الدار بدمعتي وكلبي ممرود

كل لحضه باليوم  دمعة عيني سجابه
مهدومة الحيل اجيله واكعد ابابه
عباس  ـ  وحسين  ـ ذوله اغله الغوالي

......

تغفه كل عين وتضل سهرانه عيني
يبني حال الموت مابينك وبيني
شلي بعمري وردت موتي يجيني
الخنسه ياهو الكال اكثر من ونيني

امصابي ياناس ياهو المثلي مصابه
مهدومة الحيل اجيله واكعد ابابه
عباس  ـ  وحسين  ـ ذوله اغله الغوالي

......

حسين عايش بالكلب هذه مكانه
لو ادور الدنيه ماكو من حنانه
عيني لوماتبجي اله اعميهه انه
من رحل حنيت لعيونه وجنانه

ياخذني الشوك وركض اشتم ثيابه
مهدومة الحيل اجيله واكعد ابابه
عباس  ـ  وحسين  ـ ذوله اغله الغوالي


......
اخر ايام العمر حسره اعله حسره
نعشي العباس الغالي يحضره
بلا جفوفه يعتني والرايه حمره
السهم موجود حد هسه اعله صدره

بالغيره معروف  ابني والوفه جابه
مهدومة الحيل اجيله واكعد ابابه
عباس  ـ  وحسين  ـ ذوله اغله الغوالي

......

علي محسن الفرطوسي

لوينجمع ضيم الدهر كله إعليك
وتهيم ابعالم الحسره
ولويعصف عليك الهم
اندعي ام عصابت الخضره
تجي ليك ابوفه ثق اسرع امن الصوت
تجيك وضيمك اتوخره.......
السلام على باب الله الواسعه
....ام البنين...

            قصيده لم البنين

               ................

        يامـوت  وعـدي حـان اللـيله
        لحسين مشتاگه ارد امشيله
            غسلوني من العلكمي
            والرايه راية  هاشمي
               ياموت       ياموت
              ********
عمري ناذرته وحياتي الك ياروح الزجيه
الموت من اول غيابك والله اتمنيته اليه
كـون انـدلك يـغـالي ﭼـا ٳجـيـتـك لـو بـديه
رحت يحسين وعفتني روحتك شو هاي هيه

            تمنيت  امهم اني وياهم
           وتموت روحي وي موتاهم
              ٳشكف سهام التنرمي
             والرايه راية هاشمي
             ياموت        ياموت
              ********


الوعد والمكتوب اريده يحدد وياكم لقانه
وستراح امن العذاب بلحظه لو المس حنانه
باليل افز مرعوبه وركض ليه بس خالي مكانه
عودتني اعله المحنه والحنين بدمي انه

               اشتاگ وماتسلهم عيني
                يحسين المن مخليني
               امن الدمعه عيني تنعمي
                والرايه راية  هاشمي
               ياموت          ياموت
              ********

الفاتحه اقراها اعله روحي رايده تسهيل امري
انه ام اربع كواكب ودعتهم والله يدري
فدوه الك  يحسين كلهم والمهم انته يعمري
من سمعت بخبر موتك كلشي ضاع ونفذ صبري

                مذبوح  يبني ويدوسونك
                ضلام   يمه يرامونك
                 وتومي لزينب ومي
                 والرايه راية هاشمي
                 ياموت        ياموت
              ********

ابن حذلم من سمعته يصيح ياٲهل المدينه
لامقام الكم برضها حسين بالطف ذابحينه
جيته مذعوره بدمعتي كال ولدج يالحزينه
كتله فدوه لبو الاكبر  المهم عندي الضعينه

              عباس  مگطعات  زنوده
               عباس  وفه كل وعوده
              و عالشاطي يمه تبسمي
               والرايه راية  هاشمي
                ياموت       ياموت
              ********

اتمنه لوعدي بنات يروحن اويه الهاشميه
بمجلس ابن زياد كلهن ستر البنت الزجيه
امنيه ومحرومه منها ردت لو اني سبيه
امشي وي زينب الحره خادمتها بكل مسيه

           بالروح  زينب انه افديها
          وجفوف مثل ابني انطيها
           المهم زينب تِسلَمي 
            والرايه راية   هاشمي
              ياموت         ياموت
              ********

علي محسن الفرطوسي

قصيده لستشهاد الزهراء
..............

وين صبرك ياعلي يابو الصبر
من دفنت الزهره راجع منكسر
طير وبلايه جنح   ليل ومفارك صبح
        
             
              ـ ـ ـ ـ ـ ـ ـ ـ

منكسر راجع بوحدك والدمع بعيونك
مثل نخله منحني ياحيدر يشوفونك
ليش ساكت وبسكوتك خوفي يشيعونك
يلي كاسر إقوه جيش وتالي يكسرونك

يبوحسين وهذه وعد الباري
صوت بـﭼـيّك دره الماداري
جرحك تشبع ملح   ليل ومفارك صبح

 
               ـ ـ ـ ـ ـ ـ ـ ـ     
    
ٳغله من روحك الزهره وتبقه اغله انسانه
وزهرتك ياحامي جارك ماتت وذبلانه
الراضيه المرضيه من الي هجم زعلانه
ياعلي جروحك بعدهه زايده وكثرانه

مضلمه بعدج تره  ايام العمر
فاطمه ومن دونج بكلبي كسر
غيابج بكلبي جرح   ليل ومفارك صبح



                 ـ ـ ـ ـ ـ ـ ـ ـ

صبرك وقوتك يحيدر جانت اعظم ايه
يلي قالع باب خيبر وين قوتك هايه
علي دمعك جان ينزل بس  عالمصلايه
وهسه بكل وكت عينك ياعلي بجايه

دمعك مغيرك هوايه ياعلي
همك وحزنك الماضن ينجلي
آويه الحزن مالك صلح     ليل ومفارك صبح


                ـ ـ ـ ـ ـ ـ ـ ـ

بالنعش كلبك يحيدر شلته أعله جتافك
ميت وشيعها روحه يكول كلمن شافك
الحيل من اوصافك انته هاي ماهي اوصافك
الحبيب بليل مضلم ودعاك وعافك

راحت وماراحت بكلبك تره
ادفنتها بروحك ومو بالثره
يزيد حبها مايشح    ليل ومفارك صبح

               ـ ـ ـ ـ ـ ـ ـ ـ

يِلجمك وياذيك يبقه ياعلي باب الخشب
والجذوع ثكال جانت بيها يطول العتب
ياعلي البسمار تدري ياصدر طاهر ضرب
الجنت راعبهم  انته تمرجلو نكلو حطب

كشرو انيابهم يم عتبتك
وذبحو الدنيه وسطرو زهرتك
والجرح اه الجرح    ليل ومفارك صبح

                 ـ ـ ـ ـ ـ ــ
              علي محسن الفرطوسي

ودعتها .. ودعت ڰلبي وضحكتي
ودعتها .. وبتده موسم دمعتي
ودعتها  .. وتخنك بروحي حسرتي
           ودعتها  ودعتها
....
اي وحق عرش الله وسود الليالي
يعيش بالحسرات كلمن فكد غالي
من بعد عين المشوا و شلون حالي
العشنة وياهم عمر تالي متالي

فاركوني .. والمفارك موت سكته
فاركوني .. ماي ويفاركله نبته
فاركوني .. ومضلمه الدنيه بنضرتي
....
اكرهت باب الخشب خلتلي حسره
امي قران وفقط حيدر يفسره
ينقره بصوت الترافه ليش صطره
راحت امي الغاليه والعين حمره

اعله بابج .. اثر اجدام النبوه
اعله بابج .. بياذنب محسن تجوه
اعله بابج .. شمعه ومن النار ذبتي
....
ربي امي نعمتي وتعرف قدرها
ياالاهي وتعلم بروحي شكبرها
ماتت امي وروحي مايحصل صبرها
الله لاينطي الهضمها والكسرها

راحت امي .. الجانت تسولف محنه
راحت امي .. بعد حضنج من يلمنه
راحت امي .. في امان الله صحتي
...
عيني عالباب واشوفن اثر دخان
بعده اثر دمج عله البسمار نيشان
صغير خدي وبالدمع يايمه غركان
ويه امي ادفني ارحمني يدفان

من بعدها .. ضايع بعيني ضواها
من بعدها .. بس نضر عيني وراها
من بعدها .. اني لو انتي انكسرتي
......
..
نار شفت اباب امي ياهضيمه
من بعد عينج صرت ثكله ويتيمه
ليش جازوج بكسر ونتي الكريمه
حسره تتبع حسره والونه اليمه

من عصرها .. ونت ٳواني  اسمعتها
من عصرها .. روحي ذابت من بعدها
من عصرها ..  للسمه ارفع شكوتي


....
للشاعر علي محسن الفرطوسي

يمه تعبانه روحي ... دهري زود جِروحي
بلايه امي كلشي خنگه  .. يمه مثلج وين الگه
           دهري زود جروحي

      ⓪⓪⓪⓪⓪⓪⓪⓪

كافي يادنيانه  كافي رحمي بينه
ٳشكثر  أعزاز  راحو من ادينه
راحة امنه وبيتنه حركوه علينه
صغار ﭼـنه وصحنه ادرك ياعلينه

ياابو الغوث اغثنه  .. ياعلي صطرو امنه
الزهره شهگة فرد شهگه .. يمه مثلج وين الگه
 
     ⓪⓪⓪⓪⓪⓪⓪⓪

جنت من اشتم عطرها انسه كلشي
وهسه من ٳشتاگ الهه المن امشي
نعشج الشالوج بيه اتمنه نعشي
ٳمي ياحضن المحنه وهيه عشي

عشنه ٳلي يلمنه  ...  طاح وي طيحت امنه
الفاگد امه الحسره حگه .. يمه مثلج وين الگه

      ⓪⓪⓪⓪⓪⓪⓪⓪

كلمة اليمه شكثر حلوه وحنينه
وكلمة امي الدافيه والتدفينه
الله لاينطي الهجم حاقد علينه
ٳمن اغله انسانه حرمنه تيتمينه

هجموا اعله الحبيبه ... وحنه صرنه بمصيبه
بينه الج حسرات ملگه  .. يمه مثلج وين الگه

      ⓪⓪⓪⓪⓪⓪⓪⓪

بنتج صغيره وﭼـبيرات النوايب
والتموت امهه تغيرها المصايب
يمه كلبي وراسي من عفتيني شايب
عودي الاخضر يبس والدلال  ذايب

زيبنج ماهي زينب    متغيره وهوايه تتعب
ذابله ﭼـني ورگه ... يمه مثلج وين الگه

 ⓪⓪⓪⓪⓪⓪⓪⓪

ضاعت احله سنين وماتت ضحكتي
عايِشَه من بعدج اعله الله ودمعتي
يمه ماشبعانه منج ونتي رحتي
ندفنت بقبرج حياتي وكل فرحتي

خلصة ايام المحنه     من دفن حيدر امنه
بالبواجي الحره تبگه.. يمه مثلج وين الگه

 ⓪⓪⓪⓪⓪⓪⓪⓪

للشاعر  / علي محسن الفرطوسي

رِدت حسن الخاتمه
زيارتج يافاطمه
هالحلم شاغلي بالي
ادعي يارب السمه
******
اسولف ويه روحي وللفجر گاعد
وﭼـانون المصيبه بالگلب واگد
تراهو الليل يجرح كل بشر فاگد
وآني جروحي واحد يلـﭼـم بواحد

جرح مايشبه جرح
وحس بعيوني ملح
اطلب بطول الليالي
ادعي يارب السمه

******

إناجي وادعي ربي بحلمي ليليه
الاهي ياسميع تفضل ٳعليه
طير الروح احسها وجنح مابيه
بليالي الفاطميه وعندي امنيه

حلمي ازور ام الحسن
فاطمه هيه الوطن
وحته المدمع دعالي
ادعي يارب السمه

******

مثل نار بحطب مابين الاضلوع
على الزهره الزجيه گلبي مفجوع
سنيني ابابج ارد اشعلهن شموع
وبسمار بصدر لالامي موضوع

بعتبت الباب شجره
مصاب شيب حيدره
بابج اليشرح سؤالي
ادعي يارب السمه

******

افتراضن لوتحقق حلمي وصار
وزور القبر وانضر وحشة الدار
لازم عالوجه الطم وشب نار
لان بخدهه اصابع خمسه اثار

كون ابخدي وسم
وصدري اجرحه بالطم
مدمعي عالزهره هالي
ادعي يارب السمه

******

قبل لاموت واني بروحي حسره
حسن الخاتمه قبرج احضره
حلم والحلم صار بگلبي جمره
اريد زيارتج يم قبرج اقره

يمته تحقيق الحلم
وقبرج يلوح النجم
ها ﮪُـنا عالم خيالي
ادعي يارب السمه

******

امام لهالعصر ننتضره يضهر
يطالب ثارج ويبني الج منبر
وِيقص القصاص امن الذي قصر
بحقج فاطمه وقيد عضد حيدر

ثارج وثار الضلع
بجفه آينشف الدمع
وتگصد القبرج غوالي
ادعي يارب السمه

******
علي محسن الفرطوسي

يعين الله الذي متكسره اضلاعه
كل جرة نفس تزيد اوجاعه

❁❁❁   ❁❁❁   ❁❁❁

خلونه نسولف عالجره والصار
عن ذاك الهجوم وإقتحام الدار
لاذت فاطمه مابين اسنة نار
وصوبهه بصدره ذاكه البسمار

وبسمار بصدر ياعالم اطباعه
كل جرة نفس تزيد اوجاعه

❁❁❁   ❁❁❁   ❁❁❁

كلشي ينجبر اله كسر لضلوع
يضل المنكسر ضلعه يون ويلوع
الضلع فوك الرئه وفوك الكلب موضوع
وكل دكة نبض هاذه الكسر موجوع

ويطول هالكسر لايوم لاساعه
كل جرة نفس تزيد اوجاعه

❁❁❁   ❁❁❁   ❁❁❁

ياجرح الزجيه الما آله دكتور
والدكتور يجبر الذي منضور
لجن كسر الضلع مااعتقد مجبور
وصدرج موخشب يافاطمه ومسمور

مذياع السمه هذه الخبر ذاعه
كل جرة نفس تزيد اوجاعه

❁❁❁   ❁❁❁   ❁❁❁

تره المهظومه سلوتهه ابواجيهه
وياليل التنامه لو يمر ليهه
نحلانه الزجيه وحيل مابيهه
يحيدر اسئل الزهره شيبجيهه

لمثل ام الحسن موهين اوداعه
كل جرة نفس تزيد اوجاعه

❁❁❁   ❁❁❁   ❁❁❁

عندج طفله وهالطفله يالزهره
عاشت عالونين ولوعة العبره
اسمهه زينب ام الشرف والحره
عليج دموعها يالزهره متوجره

عليها النايبات عتنت فزاعه
كل جرة نفس تزيد اوجاعه

❁❁❁   ❁❁❁   ❁❁❁

ش/ علي محسن الفرطوسي

ابوذيات لمولد نبي الرحمه محمد (ص)
........


محمد بدرك اعله الكون .. منهل
يبحر الوفه وحبك صار .. منهل
نبايع نسمة الريحان .. منهل
عبير الجنه بهاي المسيه
...
الارض ربنه لجل طه .. وطاهه
واله  اهل الكرم ايه  .. وطاهه
صدح صوت الفرح  طه  .. وطاهه
تخلي بمولده نصلي سويه
....
علي محسن الفرطوسي

قصيدة لستشهاد الحسن العسكري
.....

ليش الحبته الروح
منهه بسرعه يروح
عمري خمسة اعوام
وحسبوني امن الايتام

*********

ليش كل غالي النحبه يرحل بساع
غمهه من دنيه التاخذ وين الاسباع
جم عزيز وجم حبيب ندفن بالكاع
الحبيب ابلا حبيبه يعيش بوجاع

دنيه تفرق الاحباب
عمري شمعه وذاب
وياك عندي احلام
وحسبوني امن الايتام

*********

محله احضان الابو ومحله حنانه
لو رحل فارغ يضل منه مكانه
البيت عشنه والابو هوه ضوانه
راح مسموم وبقينه ابلا ابانه

سمك كاسر جناح
بيتك من رحت طاح
بكلبي بيت الآلآم
وحسبوني امن الايتام

*********

انه مهدي الامه وحجة زماني
والدي مسموم وبصغري إتركاني
عمري خمس اعوام حين الودعاني
والابن ابلا ابوه شكد يعاني

مخفي عن الانضار
عجل ادعي بالثار
حجه وكلبي ينضام
وحسبوني امن الايتام

*********

والدي مسموم رايح من اديه
وبغيابه عشت واقع غاضريه
صغير عمري تيتمت مثلج رقيه
واني كل عمري محرم جرح بيه

عايش واقع طفوف
ورسم جربه وجفوف
مرسوم طفله وخيام
وحسبوني امن الايتام

*********

العسكري مسموم صح وبالضلامه
لجن ماسلبوه رداء ولا عمامه
خيام ماعدنه ولا عدنه يتامه
تنسلب والسوط بعبيهن علامه

يومك انته يحسين
شيب حته الاجنين
ذبحوك جدي ضلام
وحسبوني امن الايتام

*********

انه المهدي المعزه بهل المصيبه
كلبي جمره يلسع لفركت حبيبه
ادعوا يمته الغالي يرجع من مغيبه
عندي ثار الضلع والجثه الخضيبه

يومي جنه الحساب
للثار اني طلاب
بالطف ارفع اعلام
وحسبوني امن الايتام

*********
الشاعر / علي محسن الفرطوسي
..................

القصيده لسان حال الامام المهدي .. عجل الله فرجه

شكرن يالتواسوني  انه الزهره اسمعوني
       بمحرم وبصفر  هاي المآتم
     كل واحد حضر سجلته خادم
            شكرن يالتواسوني

         ✹✹✹✹✹✹✹

ياخلگ انه الزﭼـيه ام ابيها
  احضر لكل المآتم واعتنيها
انضر اعله الي تواسيني ابـﭼـيها
بعيني اصد گلوبكم ياجرح بيها

ماآنسه اليذكروني     وكل الي يندبوني
      عزاكم هذه ادري يبقه دايم
     كل واحد حضر سجلته خادم

        ✹✹✹✹✹✹✹

ٳباب الحسينيه لو يم المنابر
اترس المجلس دمع عيني اليگاطر
عل الحضور الناعي لوينعه اناضر
ياهو صاحب حركه وبحالي انه شاعر

مقرب هذه الروحي      يحس بالآمي وجروحي
             ادعيله وگولن عسن سالم
           كل واحد حضر سجلته خادم

          ✹✹✹✹✹✹✹

حاضره وياكم لجن ماتنضروني
شكرن الكم يمن جيتو تساعدوني
 عله حسين الغالي معميه عيوني
محدبه ٳلطم والضلع زود شجوني

ال متكسره اضلاعه    النفس يزيد اوجاعه
         والبسمار بعده بصدري نايم
        كل واحد حضر سجلته خادم

           ✹✹✹✹✹✹✹

اني كل عمري جرح من ضهر عاشور
گلبي مثل خيام زينب بعده مجمور
لسه ادور  مانسيت اصبع المبتور
وجهي بيه ارماد من ذاكه التنور

بين النهر والخيمه     امهم ركضت بهيمه
       يم كل جثه ابجي اعله الهواشم
      كل واحد حضر سجلته خادم

           ✹✹✹✹✹✹✹

ال ينزل دمعه لجلي مانسيته
بسجل خدامي وبٲيدي سجليته
باجر احضرله وزوره وسط بيته
وبالقبر اول بشر اني النعيته

لكلشي محسبه حساب    حته الوكف عالباب
         سجلته وكتبت اعليه لاطم
         كل واحد حضر هاي الماتم

         ✹✹✹✹✹✹✹
شِ/علي محسن الفرطوسي

قصيدة لستشهاد الرسول
...............


من اول وفاتك          يابويه وغلاتك
نكسر ضلعي . .  ونزل دمعي .. يبويه

                 ########!

انه زهرائك يبويه  بضلعي بين إنكسار
لوتغمض عينك ابني  للحزن يالغالي دار
ٳنصب اعليك العزيه  والبـﭼـي ليل ونهار
وينهدم بيتي عليه وبابي يشعلونه نار

بعدك انكساري      يهجمون اعله داري
نكسر ضلعي . .  ونزل دمعي .. يبويه

                 ########!

بويه ماحفظوا وصيتك  قِرْوا  عالدين السلام
تقاسمو لدوار بعدك  وحل علئ الدنيه الضلام
ونـتـه بـفـراش الـمـنـيـه قـبـل عـيـنـك لاتـنـام
منهم ٳلـي گـال عـنـك  هـذه مُـخـرف بـالـكلام

خانوا  يامحمد            عصر جاهل تجدد
نكسر ضلعي . .  ونزل دمعي .. يبويه

                   ########!

جان يزعجهم بكائي  ومنعو اعليك الدمع
بالسقيفه اهـل الخـيانه ضدي بعدك تندفع
واني ﭼـنت الهم ضحيه وناتجه بكسر الضلع
بـويـه اول مـن يـتـبـعك انـي ويـاك اجـتمع

صرت ثاني شهيده          شيعني الصميده
نكسر ضلعي . .  ونزل دمعي .. يبويه

                   ########!
                   
ربك الي اعطاك كوثر  لـﭼـن هالكوثر يجف
ناسك ختلفو يبويه وضيعو حته العرف
اني ياقوتة محمد وبيه يحتار الوصف
وهايه الياقوته ﭼـانت حامل بدر النجف

ماواحد رعاني         بعد الوالي اني
نكسر ضلعي . .  ونزل دمعي .. يبويه


                   ########!

يامحمد بعد عينك  طلع جم واحد غدور
حاربوني وعذبوني وضنو يطفولي نور
بويه  اشتاق الحنانك وعتني لگبرك ازور
شِرعوا وافتوا يبويه وضدوا الزارو قِبور

مشتاكة ارد ازورك        ورد اشتم عطورك
نكسر ضلعي . .  ونزل دمعي .. يبويه


              ########!

ش/ علي محسن الفرطوسي