ياغريب وتارس الغُربه عرف
ياحبيب العايش ابلايه ولف
يلحامي روحك بروحك
أينَ استقرت جروحك .... ياغريب
==========================
يا اول غريب اتعرفه كل الناس
يا اول حبيب اچفوفه ماتنجاس
اقيسك بالوطن وانته كفر تنقاس
تعيش ابلا أهل يا وارث العباس

يگلبك عاشر العاشر
ينطرك جم حزن باجر
يمهدينه الوكت كافر
يغرُب وردة البستان

يا وحيد او انته للوادم سند
يا طريد ماسكنت ابراحه ابد
وهاجرت انته صروحك
أينَ استقرت جروحك. .... ياغريب
========================
يأول عاشگ ابضلعه شتل شيبه
يأول زلمه يدفن روحه بگليبه
من شفت البشر ملتهيه بالجيبه!
توزع فرحه انته اوعندك امصيبه

يعمرك للدمع منذور
الوادم ضحكت ابعاشور
تعال ارجع الك منحور
وناگع بالدمه القرآن

يا طبيب وجرحك اشكبره صبح
يا نحيب اليگدر ايداوي الجرح
وهمك يزيد اوي نوحك
أينَ استقرت جروحك ..... ياغريب.
===========================
عابر جم الف يعگوب انته هواي
جرحك ليش يتغير ابطاري الماي ؟
خضارك عابر الستين عوزه افياي
واليعطش حبيبه ايضل يدور رأي

يدور بالعطش مهله
يمهدينه العطش سهله
حسينك فرهدو أهله
اهناك ابديرة العميان

يا أمير الدمعه بعيونك حجت
يا جبير الشيبه من يمك بدت
ليليه شيبك يلوحك
أين استقرت جروحك ... ياغريب
===========================
جم جيل انگظه وجرحك بقه مكشف
وأنه أدري ابجرح ثاني الجرح ينشف
والاجروح الغميجه أتعيش من تلّف !
ويعالج روحه بجروحه البقه مجتف

محد عانك ابضيمك
وضل الناس من غيمك
يمرافگ بقيت اسمك
وعيونك عله البيبان

يا حزين اوشالت اجروفك مزّن
يا حنين الوادم اتريدك وطن
كلشي اعلكلشي ينوحك
أينه استقرت جروحك ..... ياغريب
==============================
يأول واحد اجروحه تعينه اسنين
وضحكنه بلايه طولك مايفرح العين
يمهدي الوحده هدت حيل الامكيفين
والما عاشر حبيبه ايعاشر امتيهين

حمامه گلبي ومغبش
ويدور بالسوالف عش
بديرة ناس كله اتنش
وبس انته البقيت انسان

يا كريم الما مثل جودك كرم
يا رحيم شنهي عمرك تبجي دم
اوصار الدمع يبوحك
أين استقرت جروحك. .... ياغريب
==========================
علي قيس الوريد