ريض يحادي الضعن يمسيّر الركبان
يل حادي گبل اليسر مُر بينه عل وليان
--------
يل حادي رد لهفتي ولحسرتي ردهه
عندي حرم بالحزن شبّت مُواجدهه
وچم حرّه بين الجثث مفگود واحدهه
وچم طفله منها انفگد بالحومه والدهه
وشچم يتيمٍ يدير العين عل ميدان
-------
مُر بالحراير على الوليان مُر بيهه
چاسات الفراگ نجرع دوم مُر بيهه
هاي اعلى ابوهه تصد بلكن يحاجيهه
وذيچ اعلى ابنهه تون والدمعه تجريهه
وصوت السلاسل يحرّك غيرة الأبدان
-------
اوسكنه اعلى ابوهه هوت بالونّه والحسره
وتصرخ يبويه الضعن عازم على المسره
حاشاك ترضه نسير اويه العده يسره
وكافلنه عالمشرعه لا يمنه لا يسره
وهذا انت دامي النحر متوسّد التربان
-------
وام جاسم اعلى الهزل وتصيح يا جاسم
بلا راس جثّه تظل واعلى الترب نايم
وآنه انظر اعلى النهر واندب گمر هاشم
ترضاهه امشي يسيره لديرة الظالم
ما چان هذا الأمل لا يخوتي ما چان
--------
يل حادي لا لا تعجّل بالركب ونّه
خليني يم جسم اخويه حسين اجر ونّه
وانخاه وين اليردنه للوطن ونّه
چي لنّه كافل ضعنّه اعلى النهر ونّه
مطروح وانت ذبيح اعلى الترب عطشان
------
عقيل الكاظمي / الكاظمية المقدسة