الجرح ينزف سهر ** شهر سيفه القدر
--------------
ابگلب فاگد أمانه الخوف بي خضّر
طحت بخيامي وگبالي العطش والحر
صار النوم برموش السهر يعثر
شلون ينام جفنه الحاطته العسكر
لفت ساعة خطر ** شهر سيفه القدر
---------------
ودّعت اخوتي غالي بأثر غالي
كل ما تمضي ساعه اتگرب آجالي
لن دارت معارك دامية ابّالي
اعرفت باچر اظل بحسرة الوالي
جَرِح گلبي انفجر ** شهر سيفه القدر
--------------
بوداع اخوتي اتناثر ضوه عيوني
خوف من الحلم ما اطبگ جفوني
أخافن لو نمت تتحقق ظنوني
بين النوم والصحوة انخطف لوني
غِزَت فِكري الصور ** شهر سيفه القدر
-------------
ملامح للوغه ابسن ذيب تتبسّم
ريحة موت بيهه بكل كتر تنشم
ارتفع صوت الصهيل البالمعاره التم
وخِفَت صوت الصليل بسبب كثر الدم
جره امن الدم نهر ** شهر سيفه القدر
---------------
شفت انحور صارت للسيوف احضان
شفت امن البعد خيمه بوسط نيران
ودخان المصيبة يخنگ الريحان
وجه النهر باهِت، يجري بس عطشان
على جنازة گمر ** شهر سيفه القدر
-------------
الگمر ميّت وميت كل أمل يَمّه
وملامح للعطش بجروح ابو اليمّه
ونحر جاري اعلى رمحه وما يجف دمّه
عرفت أصبح مصيري للسبي وهَمّه
نَبَض گلبي احتضر ** شهر سيفه القدر
--------------
عقيل الكاظمي