العادات السبعة للناس الأكثر فعالية
"لـستيفن كوفي".

الكتاب مش مجرد نصايح عن النجاح، لكنه زي محاولة لإعادة ترتيب الإنسان من الداخل.
فكرته الأساسية إن الفعالية أو الإنجاز مش إنجازات سريعة بس، لكنها مجموعة عادات يومية بتتكوّن مع الوقت، وبتغيّر طريقة تفكيرنا، وقراراتنا، وتعاملنا مع نفسنا واللي حوالينا.

الكاتب قسملنا العادات دي لـمرحلتين:
المرحلة الأولى: عادات بتخلصك من الاعتماد على غيرك.
المرحلة الثانية: عادات بتعلمك إزاي تتعامل مع الناس بشكل احسن و متوازن اكتر.
و بعدين بيديني عادة تساعدنا على الإستمرار و التجديد.

من أهم العادات:

كن مبادرًا:

يعني ما أستناش الظروف تتحكم فيا، ولا أعلّق فشلي على حد أو حاجة. أنا مسؤولة عن ردود أفعالي، وحتى لو مش قادرة أغيّر الواقع، أقدر أغيّر طريقة تعاملي معاه.

ابدأ و النهاية في ذهنك:

أي خطوة لازم يبقى وراها رؤية. أفهم أنا عايزة إيه، وإمتى، وليه. لما الهدف يبقى واضح، الاختيارات بتبقى أسهل،و التشتت بيقل.

ضع الأهم قبل المهم:

مش كل حاجة مستعجلة تبقى مهمة. الكتاب بيعلّمك تفرّق بين اللي بيضغط عليك، واللي فعلًا له قيمة على المدى البعيد، سواء في شغلك أو حياتك الشخصية.

فِكر مكسب/مكسب:

ممكن ننجح سوا، من غير ما حد يخسر، ومن غير ما أضطر أتنازل عن نفسي و أولوياتي.

اسعَ أولًا إلى أن تفهم، ثم أن تُفهم:

الإنصات الحقيقي بيغيّر كل حاجة. لما أسمع بصدق، مش يكون همي أرد و خلاص، الخلافات بتقل، والعلاقات بتبقى أعمق و أريح.

التآزر (العمل الجماعي):

اختلافنا ممكن يخلق حلول أحسن من أي مجهود فردي.

اشحذ المنشار:

يعني التطوير المستمر للنفس "نفسيًا، وعقليًا، وجسديًا". لأن الإنسان لو وقف مكانه، بيستهلك نفسه من غير ما يحس.

الكتاب خلاني اخد بالي ان لازم اكون مسؤولة اكتر عن اختياراتي بدل ما أهرب منها، وأرتّب أولوياتي، وأتعامل مع الناس بوعي أكتر، من غير اندفاع و في نفس الوقت من غير ما  استنزف نفسي.
حسّسني إن الفعالية الحقيقية إن أكون متصالحة مع نفسي، وعارفة أنا رايحة فين، حتى لو طريقي لسه طويل.

- الإدارية: الزَهراء.

خُطوَّة واحِدة قادرة تقربك لحلمك
أكثر مما تتخيل!🧡🧡🪄