" غيب ياقمر مالك ومال الطله ،
القيت نور يسوا نور ضيك كله !! "

القيت ونيسي ..
والقيت من أحتل العقل واحاسيسي !!
ملك طوع قلبى وين شق رميسي ..
حلال حر ماله يقفله ويحله .
اهلال هلتا جلت ظلام حبيسي ..
إللي بالحيا مدفون يغلي غلّه .
امذعر وشاعف من تجارب كيسي ..
اللى مايصون غلاي ما ننزله .
ولا يذوق بري لا ايطول نفيسي ..
الجوهر الخالص في مايوصله .
ولاعد انكرر غلطتي و رفيسي ..
ولا ايغربي سمسار صوب امبله .
ايطير مالعوج والدوج طيرت نيسي ..
عندى العشق عذري يستحى من ظله .
غيب ياقمر عن جو مغناطيسي ..
القيت من عليه ابغايتي انتغلى .
اوجميع ما انريد ايدير عارف قيسي ..
وكان غير عقلي فيه ما انعزله .

ياما غمرني نورك ..
وياما سرحبي منظرك وسرورك !!
وامعاك تنشرح الافاق وان اظهورك ..
ويزيدن رحابه وين ما اتعلى .
امعا سحر ليلك فى سكون ابحورك ..
وانجوم السما فى حسنها تدلى .
وغشاني هوا هبّة نسيم اعطورك ..
فوحة ربيع اقبال نازل طله .
وعبير النفس لامس عبيق بخورك ..
ونشوة شذاك الشافيه مالعله .
اوترانيم شعرى من اوتار اشعورك ..
اتقول ميسترو بلحانها نسلى .
والكون في اعيوني يبتسم لحضورك ..
مع كل كاين هامبا احتفله .
واليوم من ضحايا هالتك وغرورك ..
وجوك اللي كمين عاشق ظله !!
سبحان كيف تنهي من حياتى دورك ..
وتنهي انسان اتقدرا وتجله .
فجعنى خسوفك وانفضح مستورك ..
اغتال الوفا والحن مني سلّا .
مجروح ياقمر ماعد انبحت شورك ..
ولا شعر جابك من جديد انعله .
والقيت من شفاني من سطير اكسورك ..
ونظف مكانك طهرا واحتله .

- الشاعر : علي الساعدي الفاخري