УСТОЗ

Устоз дегани улкан қалб дегани, биродар,
Мустаҳкам асаб, нозик таъб дегани, биродар.
Ҳар соҳани томиру ҳаётни юрак, десак,
Ундан бунга қон ҳайдар зарб дегани, биродар.

Устоз дегани сенга мурғак чоғингдан ҳамдам,
Ақлинг пилигига ўт улашгувчи бир шамдай,
Сочларингни тафт ила силагувчи кафт ҳамда
Пешонангдан жим ўпар лаб дегани, биродар.

Устоз дегани, хуллас, ҳурмати ғоят кабир,
Маърифат учун қалқон, жаҳолат учун жабр,
Бу Зотларнинг Аллоҳга яқинлиги бор, ахир,
“Мураббий”нинг ўзаги “Раб” дегани, биродар.

©️Рустам МИРВОҲИД

Яратганга яқинларим, айём муборак!

@Rustam_MIRVOKHID