ملكة حياتي
........
يـمه أنتي احـسج كـل نفـس بي
من اشتم عبيرج روحي اردهه
حياة أنتي إذا من غيرج أنموت
ومثـل مريم نطـت قـيمة ولدهه
يـا ســر الإلـه بخـلـق الأجــيـال
ومـصنـع للـوجـود الله وجـدهه
شفت ليش الجنان تصير جواج
لان عطـر الأرض أنتي وردهه
ولجل أمه يعيش العـايشه وياه
وميـت حـسبه لـو لحظة فكدهه
لمايعرف قدرها تشوفه مخنوك
وما ينجح أكيد الماشي ضدهه
يا طرة الفجر من يخلص الليل
يا رحـمة الهـي المـاكـو كـدهه
يا فــرحـة بـنـات بجـية العـيـد
يا حـزن التـريده تلاكي عـدهه
ويا بسمه برائه تغذي الوجوه
يا دمع اليـتـامى الحفـر خـدهه
يا قـوة شراع يـلاوي بالـريح
يا لوح السفـينة الـروج نـدهه
يا سـورة براءة الـكـل الأحقاد
مـا تـنفع تـوبـته ألـما يـودها
وبرب الفلق من كل هم تعـوذ
ينصـاب بعيـونه إلي حسـدهه
كًلبها الكون أمي وبي مجرات
ويا وحدة قياس أتقيس حدهه
يا هـامة أبوي المـانصت يـوم
وليام المصـايب ظهـر شـدهه
تتكاطر حجـاب وعـفه بالـدين
من زينب خذت درس بمجدهه
ومدرسة الـوفاء بكـل الوعـود
الـفـاطم نطـت كـلـمه بعهـدهه
ما تنسه مصـايب ام الحسـين
وبيبـان المجـالس ما تسدهه
.......
الشاعر
اياد الفرح التميمي