Bayon.uz

Нега айнан афвни сўраш керак?!
Чунки, Росулуллоҳ соллаллоҳу алайҳи васаллам Оиша онамиз розияллоҳу анҳога Қадр кечаси Аллоҳ таолодан айнан афвини сўрашни таълим бердилар. Икковилари ўрталарида бўлган ушбу савол жавобни Оиша онамиз сизу бизга ҳам илиниб ривоят қилдилар:
عن ﻋﺎﺋﺸﺔ رضي الله عنها ﻗﺎﻟﺖ: ﻗﻠﺖ: ﻳﺎ ﺭﺳﻮﻝ اﻟﻠﻪ، ﺃﺭﺃﻳﺖ ﺇﻥ ﻋﻠﻤﺖُ ﺃﻱُّ ﻟﻴﻠﺔٍ ﻟﻴﻠﺔُ اﻟﻘﺪْﺭِ، ﻣﺎ ﺃﻗﻮﻝ ﻓﻴﻬﺎ؟ ﻗﺎﻝ: ﻗﻮﻟﻲ: اﻟﻠﻬﻢ ﺇﻧﻚ ﻋﻔﻮٌّ ﺗﺤﺐ اﻟﻌﻔﻮَ ﻓﺎﻋﻒُ ﻋﻨﻲ. رَوَاهُ التِّرْمِذِيُّ
Оиша розияллоҳу анҳодан ривоят қилинади:
«Эй Аллоҳнинг Расули! Айтинг-чи, агар Лайлатул Қадр кечаси қайси кеча эканлигини билсам, унда нима дейман?» дедим.
«Аллоҳим, албатта, Сен афв қилувчисан. Афв қилишни яхши кўрасан. Бас, мени афв қилгин», дегин», дедилар».
Термизий ривоят қилган.
Чунки афвда яхшиликни кўпайтириб зиёда қилиш, ёмонликни таг туги билан ўчириб йўқ қилиш маъноси бор.
Агар сизни Аллоҳ афв қилса нажот топасиз, ютуққа эга бўласиз, саодатга эришасиз. Агар сиз дуо қилиб ҳожатларингизни сўрамоқчи бўлсангизу, қалбингизни ўртаб, ўйлантириб турган ҳожатларингиз, муаммоларингиз жудаям кўп бўлса, Аллоҳ таолодан такрор ва такрор афв қилишини сўрайверинг. Ана шунда барча муаммоларингиз сўрамасингиздан ўз ўзидан ҳал бўлади.
Чунки, агар Аллоҳ сизни афв қилса, баданингизда бирор бир дард қолмайди.
Агар Аллоҳ сизни афв қилса, яхшиликларга, тоату ибодатларга, охират амалларига сизга тавфиқ бериб қўяди.
Агар Аллоҳ сизни афв қилса, қилган гуноҳларингиз кечириб, номангиздан ўчириб, унинг жазосини ҳам бекор қилиб, гуноҳдан халос қилади.
Шундай экан охирги ўн кунларнинг тоқ кечаларида қадр кечани умид қилиб, Аллоҳ таолодан такрор-такрор афвини сўрашдан эринманг!

Дўст истаётган бўлсанг, Аллоҳ етар.
Ёр истаётган бўлсанг, Муҳаммад етар.
Далил истаётган бўлсанг, Қуръон етар.
Ҳузур истаётган бўлсанг, Намоз етар.
Бойлик истаётган бўлсанг, Қаноат етар.
Душман истаётган бўлсанг, Нафсинг етар.
Азизлик истаётган бўлсанг, Ислом етар.
Насиҳат истаётган бўлсанг, Ўлим етар.

Ҳазрати Мавлоно Жалолиддин Румий.