#دا_السودان_العايزنو

شباب فرشوا علم السودان و بنادوا شير للاكل و الموية في دقايق لموا اكتر من خمسه الف
اربعه منهم شالوا القروش و ركبوا عربيه
مافي زول بعرفهم هم ذاتهم ما بعرفوا بعض
واحد فيهم صاحب العلم
واحد سيد العربيه اتطوع يوديهم
اتنين منطوعين
غابوا نص ساعه و جو محملين العربيه بحاجات اكتر من القروش الجمعوها
لانهم ما كيزان و لا شباب المؤتمر الوطني ما زاغوا و لا اخدو كموشن و لا اتقاسموها مع انو مافي زول بعرفهم
دا السودان العايزينو
حاجه تانيه
رغم انو الناس قاعده من الصباح بدون اكل لمن الاكل جا ما شوفتهم اتخاطفوا ذي ما بحصل في مسيرات الكيزان في الساحه الخضراء بالعكس شوفته شباب بدوهم ساندوتش بقولوا كدي كفوا البنات اول
و شوفنا البت بدوها ساندوتش بتقسموا مع صاحبته و برفضوا يشيلوا ساندوتشين عشان يكفي
و شوفنا قارورة الموية بتمر علي سبعه انفار لانو برغم العطش البمسكه بشيل جغمه و بمرره للتاني مع انهم ما بعرفوا بعض
و لمن تفضل اخر جرعه تلقي اتنين كل واحد بحلف علي التاني يشربه
دا الشعب السوداني
و دي اخلاقنا الحقيقه