နတ်စင်ပေါ်က ဒါးများ သုံးပြီလား.. ?
===============================

2021 တုန်းက ရေးခဲ့ဖူးတဲ့ အကြောင်း အကျဥ်းမျှ ပြန်နွေးပါ့မယ် ။ ကျနော့်အဘက နတ်စင်ပေါ်မှာ အမြဲသွေးထားလို့ အင်မတန်ထက်မြတဲ့ ဒါး တချောင်း ချိတ်ဆွဲထားပါတယ် ။

တနေ့ ကျနော် ထင်းအစိုတွေ ဖြတ်နေတော့ သုံးနေရတဲ့ ဒါးမကြီးက တုံးကတုံး လေးကလေး ဆိုတော့ အဆင်မပြေဘူးလေ ။ ဒါနဲ့ အဘရဲ့ နတ်စင်ပေါ်က ထက်ရှနေတဲ့ ဒါးကိုယူပြီး ထင်းအစိုအသေးတွေ ခုတ်ပါတယ် ။

အရမ်းအဆင်ပြေပြီး လုပ်ငန်းတွင်ကျယ် လူမပန်းပဲ ဖြစ်နေတော့ ကျေနပ်နေတုန်း အဘက တွေ့သွားပြီး ငါ့မြေးရေ ဒီဒါးက ထက်လဲထက်တယ် ပေါ့ပါးပြီး သုံးလို့ကောင်းတာလည်း ဟုတ်တယ် ဒါပေမယ့် သုံးဖို့ မဟုတ်ဖူးကွဲ့ ဆိုပြီး ပြန်သိမ်းသွားပါတယ် ။ ဒါနဲ့ ကျနော်လည်း တုံးနေတဲ့ ဒါးမကြီးနဲ့ အလုပ်မတွင်ပဲ ပင်ပန်းကြီးစွာ ဆက်လုပ်ရတာပေါ့ဗျာ ။

အဲလိုပါပဲ 2021 မှာ ဆူပူမှု ပုန်ကန်မှုတွေကို သတင်းလက်ဦးမှု ရယူနိုင်စွမ်းမရှိတဲ့ စရဖ အစား ယခင်က ထောက်လှမ်းရေးတပ်ဖွဲ့ဝင်ဟောင်းတွေကို ပြန်လည်ပြီး တိုင်းပြည်အတွက် ပူးတွဲ အသုံးချဖို့ တိုက်တွန်း ရေးသားခဲ့ဖူးပါတယ် ။

ကျနော်တို့ကတော့ မိမိအမြင်လေးတွေကို ဆိုရှယ်မီဒီယာကတဆင့် တင်ပြနေရတဲ့ သာမန်ပြည်သူအဆင့်ဆိုတော့ လူကြီးမင်းတွေ သတိထားမိချင်မှလည်း ထားမိကြမှာပေါ့လေ ။

နတ်စင်ပေါ်က ဒါးတွေနဲ့ပတ်သပ်ပြီး အခုတလောကျတော့မှ အသံလေးတွေ ပြန်ကြားလာရပါတယ် ။ 29-10-2024 နေ့တုန်းက တရုတ်ပြည်ကို မြန်မာအဖွဲ့တဖွဲ့ သွားရောက်တွေ့ဆုံခဲ့ကြပါတယ် ။

ဗိုလ်ချုပ်ကြီးခင်ညွှန့်ရဲ့ တပည့်ဟောင်းတွေ ဖြစ်တဲ့ ဗိုလ်မှူးချုပ်သိန်းဆွေ ၊ ဗိုလ်မှူးကြီး လှမင်းတို့ ဦးဆောင်တဲ့ အဖွဲ့ ဖြစ်ပါတယ် ။ ဒီလိုလူတွေကို တရုတ်ကဖိတ်ခေါ်တာယ် နစက အနေနဲ့ အလွယ်တကူ သွားလာကြဖို့ စီမံခွင့်ပြုပေးခဲ့ကြတာကတော့ တပ်မတော် ထောက်လှမ်းရေးအတွက် အချိုးအကွေ့ တခုဖြစ်လာမလား တွေးတောစရာပေါ့ဗျာ ။

တခေတ်တခါတုန်းက လာဘ်စားတဲ့ တိုင်းမှူးကြီးတွေ သူတို့ကြောင့် ပြုတ်ခဲ့ကြတာ အများကြီးပါပဲ ။ နတ်စင်ပေါ်က ဒါးတွေမှာလည်း လူသားပီပီ ချို့ယွင်းချက်တွေရှိကြမှာပါပဲ ။ သို့သော် သူတို့ထဲက 99.5 % သည် တိုင်းပြည်နဲ့ လူမျိုးအပေါ်သာမက တပ်မတော်အပေါ်မှာပါ ယနေ့ထိ သစ္စာကြီးစွာနဲ့ တည်ရှိနေဆဲဖြစ်ပါတယ် ။

ယနေ့ ကျနော်တို့တိုင်းပြည်အတွက် အရေးတကြီးလိုအပ်နေတဲ့
- နိုင်ငံတကာဆက်ဆံရေးထူထောင်မှုပညာ ၊ ( အမေရိကန် နဲ့ အနောက်အုပ်စု ၊ UN ကိုပါ ကစားပြသွားတာ နမူနာကြည့်ပါ)

- ပြည်တွင်းတည်ငြိမ်ရေးအတွက် အပျော့ အမာ မျှတထိရောက်စွာ အသုံးချနိုင်မှူ
( နဝတ ၊ နအဖ ခေတ် ၁၉၈၈ မှ ၂၀၀၄ ထိ ပြည်ဖျက်အုပ်စု နားရွက်ခတ်မရအောင် ဆော်ပစ်နိုင်ခဲ့ကြတာ ပုံပြင်မဟုတ်)

- ခြေတံ လက်တံ ခန့်မှန်းမရအောင် ရှည်လျှားစွာ ဖြန့်ကျက်နိုင်မှု
( ဗသိန်းတင် နဲ့ ပေါ်လစ်ဗျူရို တံခါးပိတ်အစည်းအဝေးအား video ဖိုင် ရအောင်ယူနိုင်မှု ၊ ခွန်ဆာလက်နက်ချဖို့ CIA မသိအောင် ဆောင်ရွက်နိုင်မှု ဒါမျိုးတွေ ရေတွက်မရအောင် လုပ်နိုင်ခဲ့ပါတယ်)

- မဟာဗျူဟာကျတဲ့ ကစားကွက်တွေနဲ့ ပြည်တွင်း ပြည်ပ အဖျက်သမားတွေ လှုပ်မရအောင် လုပ်ပြနိုင်ခဲ့မှု

အစရှိတဲ့ စွမ်းဆောင်ရည်တွေကြောင့် နတ်စင်ပေါ်က ဒါးတွေကို ပြန်လည်အသုံးချနေပြီ ဆိုတဲ့ သတင်းစကားကို ဝမ်းသာအားရ ကြိုဆိုမိပါတယ် ။

ကိုရွှေမျိုးဝင်း