-
متسألنيش خيرك مش مرتبط !وكأنه أصبح شي غريب في هـ المجتمع انك مش مرتبط !
مش مرتبط لأن مستوى العلاقات والارتباط أصبح في مستوى هابط جداً ! معاش ارتباط ومعاش حب وعلاقة راقية نظيفة لها اسس وحدود! .. تحولت لشئ استغلالي ، مادي .. مبني على الكذب والنفاق والمظاهر ، شئ في منتهى السطحية "الا من رحم ربي"!
الارتباط صعب .. مش بالسهولة اللي يصوّر فيها البعض ..مش شي ساهل انك تفضي وقتك لشخص وتعطيه اهتمام..ديما وتقدّره وتحترمه وتراعيه في غيابه قبل وجوده ..ويكون شي اساسي في حياتك ، نصك الثاني.. مش ساهل والله!
مسؤولية كبيرة ، هادي واجبات فرض عليك تديرها لو ربطت حد بيك..احياناً لما عقلي يفكر بشكل منفصل عن مشاعري.. الحب والعلاقات في عُمر مُبكر ..اللي مافيش ليها اي اساس واضح وهدف مقررين يوصلوله بجديات مش كلام الليل المعسول !.. ف نشوف فيها اضاعة للوقت واهدار للجهد .. وإستنزاف للمشاعر.. شن هي النهاية للعلاقة هذي ! شئ في علم الغيب..ف لنفرض اخترت شخص غلط.. وضيعت معاه سنين عمرك بدون اي سبب..علاش تعلق في بنت الناس معاك من توا وانت قاعد ماتقدرش تفتح حوش!
علاش تهدري في مشاعرك انتِ كـ بنت ..كل علاقة محسوبة عليك وحـ تتسجل عليك .. تقتلي في مشاعرك علاش .. مع كثرة العلاقات الفاشلة..حـ يتكون داخلك انعدام ثقة من كل رجل في الحياة بعد هكي .. حتتعقدي..علاش تقعدوا مع بعض شهور ولا سنين وفي النهاية كل واحد يمشي في حاله.. متكونوش نصيب بعض!..علاش تقوللها نحبك الف مرة وفي النهاية تقوللها انتِ والنصيب..ولا هي تقولك جاني واحد واتي ويبوني نتزوجه!! شن بتدير وقتها انت! .. انت ماعندك شي..علاش تتعب في قلبك وقلبها..
طول مدة العلاقة مرات تسبب ملل! قلّة النضج يا ناس راه مصيبة! تلقاه مزال صغير وهي صغيرة وخاشين ف علاقة!! النضج اهم شي في العلاقة! ادارة العلاقة تحتاج نضج كبير!
نصيحة .. اقتنع انك لازم تحافظ على مشاعرك وكلامك الحلو وغزلك لـ شخص يستحق.. كلمة نحبك لشخص يستاهلها.. خلي الكلمة هادي كبيرة عندك ماتقولهاش بالساهل..اوزن الكلمة هادي كويس هلبا ..قولها بقلبك ولكن فكر فيها بعقلك ولو لمرة واحدة باش لا تظلِم ولاتُظلم..ورد بالك تقنع قلبك بأشياء عقلك رافضها.. متخليش قلبك هو المتحكم لأن القلب يتحرك بعواطفه واحساسيه والمشاعر ديما أضعف ، ونسبة الخطأ فيها أكبر..
مش اي علاقة هي حب ومش اي علاقة حـ تنتهى بـ زواج واُسرة سعيدة..مش اي زواج بالعلاقة ينجح فيه زواج ينجح بدون علاقة..
فيه حب تاني قوى بـ هلبا .. يجي (بالعِشرة والسنين والتعود) .. مرتك ..راجلك.. مع الوقت والعشرة حـ تلقي حُب جديد حسيتيه لأول مرة..هذا حب قوي .. وصعب هلبا ان ينهدم..
خليك ديما متذكر انك انسان وتشارك في صناعة قدرك ونصيبك ، صح كل شي ربي كاتبه ولكن ربي يسبب في الأسباب، في النهاية كل شي بيدك انت وانت المتحكم والمسؤول عن اختياراتك .. (اختار صح) .. لما تختار شريك حياتك ف قلبك ومشاعرك ليهم دور قوي والأبرز في الاخيتار هذا ..لانها وظيفتهم ولـكن ..عقلك أهم.. اي قصة حب ناجحة هي قصة اشترك فيها عقلك وقلبك (الحب العاقل)..هو الحب اللي يقدر يكمل ويستمر ويعيش.
