گِلّي شعمل بيك البين
عبدالله يانور العين
رحت وتلوج من الضِمَه
رديت الي بفيض الدمه
سهم الحقد جاك منين
عبدالله يانور العين
......... المستهل........ .............
يوليدي ياظي النظر المن اقدم شكواي
منهو ال يقدر حالتي بعد الاهل بين اعداي
جيت بسروري الكربلا يالغالي چي انت وياي
لجلك عشت يبني العمر يامهجتي و ياسلواي
من نحرك اشتم الهوَه
وبعيوني چنت انت الضوه
فگدك طفالي العينين عبدالله يانور العين
...................................................
لمن اجيت ال دنيتي جاني الأمل وي جيتك
لو شفتك تريد تغفه بگليبي چانت نومتك
مو تدري صدري ينفتح من چنت اشماً ريحتك
وضلوعي چانتلك مهد تتسله روحي بهزتك
ريتك چنت بين احشاي
من چبدتك رادت ماي
ولا انچوي بالنارين عبد اللّٰه يانور العين
.................................................
ياريته عمري مابگه ال طف كربلا وگبله رحل
لن گلبي بيها من العطش يوليدي نيران اشتعل
وما گمت اشوف من الضمه چا انت بحشاك إشعمل
لا صدري در و ترتوي ولا ماي ابو فاضل وصل
حرت انه بأمرك يالولد
لجلك بچه وياي المهد
صحنه الحگ ابنك يحسين
عبد اللّٰه يانور العين
....................................................
زينب اجيتك بالعجل شالتك يبني بحسره
ودتك لحسين واحس وجّر دليلي بجمره
شالك لعد اهل الرده ماين اديه وصدره
گال الهم اسگوه العذب إخذو ولو بس گطره
يامن تبعتو إل سفيان
شنهو ذنب هالرضعان
هم عدكم وياهم دَين عبد اللّٰه يانور العين
................................................
ردو على ضماك بسهم يكشف حقد هالمله
اتمنه صابت چبدتي ولا صابتك هالنبله
عگبك شسوي بدنيتي عبد اللّٰه يا عبد اللّٰه
جرحك چبير ومو سهل تگدر رباب إتشله
من هيّست حر دماك
حسّبته ماي تعناك
بلهفه إطلعتله الچفين عبد اللّٰه يانور العين
......................................................
جابك ابوك المنفجع دمعه يفسر احزانه
وزينب تجرعني الصبر وتگلي انه خجلانه
ماظني عبد اللّٰه بوكت عمره إيخلص ميحانه
گلتلها مو ميت عدل خاف بحلم حلمانه
لمّن صحيت من الحلم
گلت الطفل ماينفطم
من گبل عمر ال سنتين عبد اللّٰه يانور العين
.................................................
..................................................
#تم_بعون_الله_محرم_2021

كلمات خادم الحسين
حسن الجحيشي