ابـ عمتك العينك عليها ادموم تدّي
عَـظَّـــــمَ اللهُ لكَ الأجرَ يَــــمهدي
وبمصاب ام الخدر
الله ينطيك الـصبر
يابوصالـــــح

...............

علـــ عقيله الشافت الهم والمصايب والمحن
ابخدك اتفيض المدامع ما تجف يَبن الحسن
عَمْتك المسبيه راحت والـــــــچفوف اتگيدن
يابو صالح والمصيبه شمر حدّاي الـــــــضعن

زينب الـ بس تسمع الوادم بسمها
ياوسافه ابـكربله احترگت خيمها
وانسبت تالي العُمُر
الله ينطيك الــصبر
يابوصالـــــح
...............

جرحك لعمتك يَــغايب يختلف عن اي جـــرح
جرح گد عمرك يَـمهدي وذكرياتك بي مــــــلح
ياهي غير الحره شافت دامي اخوها ومنذبح
بالجسم تسحگ حوافر وارتفع راسه ابــــرمح

لعمتك المسبيه عمرك عشته مقتل
علـهـزل دوم ابخيالك لو على التل
حگك ادموعك تدر
الله ينطيك الــصبر
يابوصالـــــح
...............

الليله تتذكر اجاها احسين بس محني الــضهر
وهد عمود الخيمه يعني طاح ابو الغيره الگمر
ابعينه من صدّت يَـ مهدي اعيونهم صبت مطر
وگلها اخوچ ابلا چفوف و لا نواظر ، واعتذر

الحرمه يلـغايب اذا تبقه ابلا كفّال
عرضه تصبح للسياط وجر الحبال
تصبح ابولية زجر
الله ينطيك الصبر
يابوصالـــــح
...............

يمشي وي عمتك خيالك من مشت للمشرعه
كابرت بس هد عزمها ابو الغيره ابـــ مصرعه
شاهدت علـ غبره جوده والـــچفوف امگطعه
وابوصط عين ابو فاضل غافي سهم الفاجعه


نادته اخلافك اذا تسئل علــيـنا
اتسلبينه ابطيحتك واتفرهدينا
يَمّه رادت تحتضر
الله ينطيك الصبر
يابوصالـــــح
...............

للسبي يلــــــــــمهدي تطلع تالي زينب كلفه
والگطع خنصر اخوها بالـــــــشتم يتشفه
عله الناگه اتلوذ بيمن والــــنواظر صلفه
وعلرمح راس الكفلها اتشوفه الف يا وسفه

ابگلبك الــنار وُ دليلك حگه محروگ
عمتك الـ محد نظرها دخلت ابسوگ
شتّمو بيها اشكثر
الله ينطيك الصبر
يابوصالـــــح
...............

من بعد طفها وسبيها ومن بعد بلواها
بالغرب عاشت واجلها بالغرب وافاها
لاچن ابرغم النوايب ما ترد من جاها
وابعلو انجوم الثريه يبقه عالي لواها

بت علي زود وعزم ورّثها عباس
ما تذل حاشاهه ابد وتذل الارجاس
بيها من عطره عطر
الله ينطيك الصبر
يابوصالـــــح
...............
سيد علي عبد الزهرة الناجي