#12-ishtirokchi
#Oyning eng faol ijodkori
ANQARA JANGI
O'g'limning qo'lida o'yinchoq xanjar,
Deydi baland tutib : - " Men Sohibqiron ",
Daraxtga tig‘ urar : " - O‘lding Boyazid,
Sening ajalingman, joningga qiron ".
- O‘g'lim, shoshma bir oz, axir bu ne hol?
- Bu shunchaki o‘yin - "jang-ku", oyijon !
- Yodingdan chiqdimi, hatto dushmanin
Behurmat qilmagan Temur hech qachon.
- Ha, yodimda bari, so‘ylagansiz ko‘p,
O‘sha voqeani tinglayin bir bor.
-Mayli, kel oppog‘im, o‘tir qarshimga,
Sen uchun hikoya etayin takror...
* * *
Maktub yo'llar Temur Boyazid tomon :
- "Salom ey dindoshim, qardoshim manim,
Sen-la maqsadimiz bir erur asli,
Sening dushmanlaring - menga ham g‘anim!
Qo'lni - qo'lga bersak - biz yengilmas kuch,
Ammo, bir talabim unutma zinhor :
Qanoting ostidan topibdi panoh,
Qora Yusufni tez qaytarib yubor".
Ikki diyor aro chopar sargardon -
Maktublar almashar go'yoki tun-kun.
Boyazid nomasin o‘qir Temurbek :
- "Qora Yusufni men qaytaray nechun ?
Hiylangga uchmasman, bo‘lma ovvora,
So'nggi qarorimni tingla, ey zolim !
Xotini "uch taloq" bo‘lsin o'sha on,
Ajal maydonida gar kelmasa kim!"
Ey voh! Bu qandayin haqorat, uyat,
Shijoat otiga minib shu zamon
Qo'lida or - nomus shamshiri ila,
Temur lashkar tortdi Anqara tomon.
* * *
Yozning jazirama saratonida,
Boshlanar beayov "Anqara jangi" ;
"Stella" titraydi, dunyoni tutar
Son sanoqsiz siloh, qilich jarangi.
Tunu - kun tinim yo'q tog'ning bag‘rida,
Boyazid lashkari topdi talofat.
Qochdi uch Chalabiy otasin tashlab,
Bu qanday ko‘rgulik, bu qanday ofat ?
* * *
Jangchilar Sultonni asirga olib,
Keltirishdi Temur qarorgohiga.
Raqibin qarshilar tabassum bilan,
Bu og‘ir botadi turk podshohiga.
- " Bu ne hol, ey Amir, yarasharmu ayt ?
Mag‘lubning ustidan kulganing nechun? "
- " Kulganim sababi : Dunyo taqdiri
Ko‘r bilan cho‘loqqa qolgani uchun ! "
* * *
O'g'limning tilida yangraydi savol :
- Temur Boyazidni etdimi qatl?
- Yo'q aslo. Boyazid "bod" kasalidan
Bu yorug‘ olamni tark etgandi, bil.
Yuzlarimdan asta o‘pib o‘g‘lonim
Qaddin tik tutib der : - Menman Temurbek!
Qalbida iftixor va g'urur ila,
- Bo'laman mard , jasur o‘shal bobomdek!
- Bolam, g‘ayratingni so'ndirma aslo,
Sen axir bo'lajak Sohibqironim.
O‘tmishin tan olib, tanidi dunyo,
Kelajagi buyuk O'ZBEKISTONIM !
BARNO YUSUPXODJAYEVA
TOSHKENT VILOYATI
YANGIYO‘L TUMANI
https://t.me/ezgulikgazeta
