أمير اعله الزمن أبا الحسن سلطاني
رؤوف أو رحمته بضي نظرته سلطاني
عشكته أو عشكي اله بمنزلة لا توصف
ضواي أو منيتي وقبلتي سلطاني

بشوك أو دمعة اسولف حب لابو محمد
أمنيتي يرف جنحي بسمه مشهد
ضوه بابه حلم عيني أو سواديني
قلبي بنار عشكه والله ما يبرد

كل شوكي أو احلامي للرضا
والعشك البيامي للرضا
يمتى أوصل بدموعي للرضا
آنه او قلبي الضامي للرضا
.
.
أطير المشهده وأكصّده سلطاني
جبير إبلا وصف ابو العطف سلطاني
غريب او غربته كعمته بلايه اهله
سكن قلبي هوه والي الدوه سلطاني

يمتى ابابه تسجد روحي وعيوني
واشم عطر الضريح أو ينتفض لوني
بالروح أمنية أو ادعي الله تجرالي
خيط ابنص ضريحه اهلي يضيعوني

عايش عمري ابحبي للرضا
روحي أو كلشي بقلبي للرضا
يضملي ابابه أسجد للرضا
ايجرني ليه من دربي للرضا
.
.
على طول العمر حلم أمر سلطاني
اشوفن كبته ورايته سلطاني
واشم عطره الزهي بصحن علي معشوكي
واسولف بالبجي بلا حجي سلطاني

ترسمله سوالف قلبي دمعاتي
ماي الله الرؤوف اليروي حسراتي
الراية الخضرة عشكي اليچوي بضلوعي
محد غيره ساكن والله نبضاتي

هيج اتخيل رايح للرضا
وادخل صحنه ابنايح للرضا
اوكع من شوك أو فرحة للرضا
عشكه الروحي الذابح للرضا
.
.
غرام بهالقلب ترسني حب سلطاني
أنيس الكل نفس أو هو الشمس سلطاني
متى الصحنه آنه اصل واله الفضل لو جيته
واكله بالعشك وهو اليدك سلطاني

احسدها كل حمامة تسكن الحضرة
ليل انهار تنظر كبته الصفرة
أو هنيال الهوا اليلمس دفو الراية
يخلد بٱسم سلطانه وعلي ذكره

كلشي بدمي اينادي للرضا
أوصل يمه امرادي للرضا
يمتى المس شباجة للرضا
ذاك اكبر اعيادي للرضا
.
.
فاضل عباس الخزاعي
https://t.me/fadlkuzay