جاي جاي ... ظعنهم للذبح جاي
ماي ماي ... جتّال الظعن ماي
اهداي اهداي ... يمشون النده اهداي

ظعن الماي كاصدله شريعة موت
خضار الله يبس بيه النبض بسكوت
مسايير اعله أجلهم بالعجل يرحون
ظعنهم يونس أو طف كربلاء الحوت


يكصدون المناية
او بعد العز سباية
العدو اهناك الخدرهم
الفرات المنع مايه
.
.
وين وين ... زينب تنشد الوين
احسين احسين ... وين الكصد يحسين
البين البين ... مدري اشضام الي البين

أميرة ابفي كمر وجفوفه تبرالي
كلشي آنه الاريده أبساع يجرالي
عزيزة ابخير ابو فاضل لجن يحسين
القلب خايف يضل هذا الظعن خالي


ظعنكم وين رايح
تحس روحي بنوايح
او حلمت الليلة خويه
لَن الكمر طايح
.
.
ابعيد ابعيد ... دربهم ماهو البعيد
البيد البيد ... ظعنهم كاطع البيد
ايريد ايريد ... الموت احسينه ايريد


يرتل آية المذبوح بونينه
ظعن رايح يشاهد موتت احسينه
اويه النوك المناية اوياهم اتساير
او على اعزاز الله حتى الجن جرت عينه

متعنّي الرزية
ظعن شايل رقية
باجر بالبراري
ما تسمع خطية
.
.
حيل حيل .. دربهم رايد الحيل
خيل خيل ... أتاني أحسينهم خيل
ويل ويل ... مناحر تنكطع ويل

يزغر بالدرب عبدالله ما يكبر
سهم منتظره رايد ياكل المنحر
او يفيض ابحضن ابوه أو يسگي منه الغيم
او ربابه اتشاهد أمن الخيمة هالمنظر

مصيبة اتجر مصبية
"حبيب بلا حبيبة"
باجر كلها تصرخ
"زينب يا غريبة "
.
.
الروح الروح ... بحوافر تطلع الروح
اينوح اينوح ... كلشي بنينوى اينوح
اتروح اتروح ... زينب للسبي اتروح

خدر الله بحبل باجر يجتفونه
او جبير السادة ميت بس يسلبونه
فوك ارماح هاشم تمشي لأرض الشام
أو راس احسين يم زينب يضربونه


دواوين أو عشاير
الخدر الله تناظر
قصر أو سوك طبن
او جان الحادي كافر
.
.
فاضل عباس الخزاعي
https://t.me/fadlkuzay