#فاطمة
#العليلة صلوات الله عليها


مشه مشه والله
ظعن شايل ضوه الله أو للذبح كاصد
مشه مشه والله
أو خدّي أمن البواجي اعله الأبو بايد

عاف ابنيّته .. أو ماشي الموتته
.
.
ممشه الماي يمشي احسين بالبر
يِبْعد والجروح البيّه تكبر
حنان الله تركلي روحي تسعر
وأنه قلبي مثل جامه تكسّر

حيطان المدينة ... وي حزني حزينة
أو تنوح اوياي
ما واحد بقالي ... أو رف قلبه اعله حالي
أو رحم مبچاي

بلكي يِردلي احسين
ادعي أمّنْ يجيبُ دعوةَ المضطر
بلكي يردلي احسين
على افراكه أنه او قلبي فلا نكدر

آ يا غربته .. ماشي الموتته
.
.
مثل مجرى النهر تجري المدامع
"مو حي الله زلمة" احسين ضايع
عليلة أو عجّت بروحي المواجع
واشوفن بالسمه لوحة مَصَارع

طشيت ابرحيله ... اعظامي النحيلة
أو سواد العين
رسمت بروحي ظِنَّه ... عسى ايرد أو احظنه
ابوي احسين

بيّه النسيم ايعيل
مثل الجمره يلچمني الهوا واثغب
بيّه النسيم ايعيل
يلمّ الذكريات الاصعب الاصعب

قلبي أو لوعته ... ماشي الموتته
.
.
احاول اغفى ويفززني رسمك
أنه ابنص المدينة أو روحي يمك
يكاطع سچة الموت اعله دمك
ينور اعيوني مشتاكه ارد اشمك

مشتاكه العيونك ... بالفركه اعله هونك
يروح الروح
فاطمتك تتاني ... عليلة أو هم تعاني
أو ذبحها النوح

كل روحي ليك اتريد
كمت اكتب حروفك بالهوا وانعه
كل روحي ليك اتريد
تفاصيلك على العينين متربعه

صعبة امصيبته ... ماشي الموتته
.
.
.

يشلعان القلب جَيت الليالي
اجي لفراشك أو ألكيه خالي
ادورك ودري ما هو انت يغالي
يجرحي الچلچل بْحيله اعله بالي

يشوك ايامي وينك ... يمن فدوه السنينك
ادورك وين
ذبح عمري غيابك ... أو رسم لوحة مصابك
يضيّ العين

بنتك تسئلك ليش
على أمواج الرمال اتسافر اضعونك
بنتك تسئلك ليش
عفتها موْحِشة ديرتنه من دونك

كاصد چتلته ... ماشي الموتته
.
.
اشيط أو اركض بدمعي وادورك
تارس كل ثنايا البيت عطرك
رد يل ريت من عمري اعله عمرك
يحارك روحي سعفة بنار هجرك

عفت دارك خِليّة ... أو كاصد للمنية
لوين اتريد
سحن قلبي رحيلك ... رد ليه دخيلك
يماشي ابعيد

درب البعد چتال
كمت اكتب حروف اسمك واشابكها
درب البعد جتال
أنه بيبانك اعله النوح اسابكها

تذبح غيبته ... ماشي الموتته
.
.
فاضل عباس الخزاعي
https://t.me/fadlkuzay