دينَك زاتُـو هو دين الاُمـة
ودين الأمة إنتخبَك لـيـنـا
جِيتنا رئيـس والأمة تهلِّل
وما فاكراك حا تطلِّع عِينـا
وما مُتخيِله يوم بي إيدَك
تشبَع مَغصـة وإنتَ تَهِينــا
دِينَـك وإنتَ تَزُور الكعـبـه
ماقال ليك سَوَّيت الشِينه ؟
بي يات منطق إنتَ تَعمِّـر
ونحنا بنرجِف ما إتغطِّينـا ؟
ياتُو شريعـة وإنتَ الزيَّـك
هُو الجَّهجَهنا وسابنا بكينا ؟
نَـحـنـا معاك والله تِعـبـنــا
وياااااتُو مُـرَتَّـب بيَكفِّـيـنـا ؟
مادام نصـرُف وإنـتَ تَغلِّي
في الأسعار يُوماتِي علينـا
حتي كمـان الأدويَـة زادت
ولو عارفين ما كُنا عِيِـيـنــا
حالنا معاك ياريِّس أصـبَـح
كلُو متاعب وحالة حَزِيـنــه
الإنقـاذ من جاتــنــا نعـانِـي
لانا فَطَـرنـا ولاااا إتغـدِّيـنـا
وطُـول الليل ياريس نبكِي
لما أظِن بالحَـسـره عِمِـينــا
ونلقَي صباحَـك زي إنقاذِك
ونَفس الشِّرزمة من حَوَلينا
شرطة وأمن وحالـة تحيِّـر
ياها السُلطة اللِّعبَت بِـيـنـــا
الخَلتنـا نمُووووت بالوَجعه
ولِسَّه نَجَـدِّف وماااا عَدِّينـا
بَحَر العِيشة المُوجُـو يَغَـرِّق
في الإنســان الطيِّـب فِيـنـا
ونِحنـا غلااااابه ..!!
فـيـنــا الصااااابِر واليِـتـألَّـم
والبيعيشـا حَـيـاتُـو جَـرُورَه
وفينـا السَّاكِـت ومـا بيتكلَّم
عايش الواقِع ساكِت صُوره
وناس بالآهة تشُوفا بِتعرِف
عايزة تمُوت بَس لِسَّع دورَا
لينا بيُوت بالجُوع بِـتـمـنِّـح
بَس من مافِي تَمَشِّي أمُورا
ورغم الضِيـق ما خُنـا بلدنـا
ولاااا حاولـنـا نَـفـارِق سُورا
عِشنا عليها معيشة الرَّاضِي
ولما نمُـوت راح نملأ قُـبُـورا
هادِي الأرض إتزرعَـت عِـزَّه
وشالت وحدها ما مجبُـوره
عازه يا ريِّس حُبهـا بااااقِي
وجُوَّه قلوبنـا بِقَت محفُوره
فيها عِشقنا جِبالا الراااسيه
نيلا الجـارِي وحتَي طيُـورا
وغَـنِّـيـنـالا غُنانـا الطااااعِم
وأنا سَمِّيتا يا ريِّس نُووورا
عِندَك مانِـع ؟؟
كَونِي أسمِّي بلدنـا براااااي
وإختار ليها الإسم الأجمَل ؟
نُورا الماضـِي المابننساهُو
عشم الحاضِــر والمُستقبَل
نُورا نَعـيـم الدُنيـا وخيــرا
نُورا فَرَحـنـا القاعِـد طـوَّل
نُورا غُناااااي الما دسِّـيـتُـو
نُورا العِشق المااااا بيتبدَّل
وأي حُكومة تقصِّر فـيـهــا
يبقَي نِظاما مشاتِر وأهبَـل
نورا بلدنـا وياهـا عشمـنــا
ولازِم ترجَـع زي الأوَّووول
زَمن الناس بتنُوم وسعِيده
ومافِي اليشحَد واليِتبهدَل
والبيَحِب بتساعدُو ظرُوفُو
ويقدر عادِي يقيف يتـأمَّـل
ويبعَت شُوقُو المالِي الدُنيا
وعندُو يَقِين الرسَّلو يَوصَل
للمحبُـوبـه العـاش علشانــا
وكم علشانا كمان إستحمَل
وعاش مبسُوووط ..!!
آاااه يا ريِّـس لو تسمـعـنِـي
أنا مغبُـون لي درجه كبيـره
فينِـي مآسـِي بلادي تحيِّــر
وكم حاجات أحكيها مُثيره
عارفَك عارِف بَـس بتطنِّش
وما بترضالنا نجيبلَك سيره
عامِل نـفـسَـك ريِّـس وإنـتَ
زي ما تقُول كِدَه إتقرضمتَ
ناسِي الآخره وحتي سَعيرا
ياااا ويلك من عَرَق الفُـقـرَا
وإنتَ بِـتـلـعـب بالتَّسعِيــره
سافِي بلـدنـا وكُـل الفـيـهــا
وعامِل فينـا بلاوِي كـتـيـره
وحَق الناس الديمة تعـانِـي
وإنتَ الكُنتَ سَبـب تدميـرا
عايِن الشارِع تلقَي عجايِب
ناس بِـتـلـفـلِـف حُمَّـد ديـرا
كم خِرِّيج ما لاقِي وظيـفـه
وكَم خريجه بِقَت كَـمَـريـره ؟
كَم نِـسـوان إتهـانَن شُوفِـن
وربُُــو عِـيــالُـم بالكَـفـتـيـره ؟
راجِـع رُوحَك وحاوِل غَـيـِّـر
نَفسِك حاوِل صَحِّي ضميرا
ياسيب لينا بلدنا في غيرك
ناس بِتعدَّهـا أغلَي أمـيـــره
ناس بتراعِي ضميرا بتحكم
بالقُـرآن والحُــب و السِّيــرَه
#محمد_الحسن_سالم_حميد
