MEN SENI SOG'INDIM BAHOR

Bir xush nazar tashlar mo'ysafid tog'lar,
Gurillab, gurkirab bormoqda bog'lar,
Muattar ifordan sarmast dimog'lar,
Men seni judayam sog'indim, bahor.

Bolalar tilida boychechak – alyor,
Turnalar parida bahordan xat bor,
Qaldirg'och chug'urlar – qalamqosh nigor,
Men seni judayam sog'indim, bahor.

Binafshani ko'zga surgan momolar,
Gullardan iforli ezgu duolar,
Jonga jon bag'ishlar namxush havolar,
Men seni judayam sog'indim, bahor.

Quyoshni o'ynatar sharqiroq soylar,
Ajib tuyg'ularni ko'ngilga joylar,
O'zgacha ko'rinar yulduzlar, oylar
Men seni judayam sog'indim, bahor.

Ko'kda jimirlagan kamalaklar xush,
Qizlar sochpopugi – tolbargaklar xush,
Shu damda izg'irin yo ertak, yo tush,
Men seni judayam sog'indim, bahor.
https://t.me/gayratmajidijodi