ما صدگت وافتكيت منها
جبروني يخواني ارجعلها

بوكت ردتي ليها
گلت موتتي بيها

هاي الشام هاية
______
ومن جديد رجعت للشام بغرب
وحدي هالمرة انجبرت عليها اطب
مو بدية بس علي موقف صعب
وانه منها طلعت مكسورة گلب

رجعت ذاكرة ذيچ المأسي
ناس الشام غربة موش ناسي
همين رجعت ومدنكة راسي

اذكر بالخرابة و بقصرها
رقية هنانة ماكملت عمرها

تعبتني بچيها
كلت موتتي بيها
هاي الشام هاية
______
شكثر بيها جروح ظلن ذكريات
جبيرة جانت بيها ذيچ النايبات
عله الهزلة و راس اخويه بالقناة
لا اخوتي وياي هسة و لا خوات

مرتين دخلت شام المصيبه
تذكرني بجرح ماصح طبيبه
لان من گاعها صرت الغريبه

انه القبل محد شاف ضلها
ماترضه تهدني الغربة جنها

تذكرني بسبيها
كلت موتتي بيها
هاي الشام هاية
______
وره مصايب كربله  وجرح السبايه
دخلت ديرة من الشماته بلايا رآيه
ابابها رقية ألزمت طرف العباية
تگلي عمه خايفة من الديرة هايه

اول ما وكفنه أبابها هواي
بكثر ما طولينه طول بچاي
ثاري الغربة يعني الموت بهداي

اول مرة من طبيت ألها
شفت الغربة يعباس كلها

شسولفلك عليها
كلت موتتي بيها
هاي الشام هاية
______
وره كل ذاك العذاب بدربي شفته
الشام هوا اكبر جرح لمن وصلته
وين حچي اليكسر الخاطر سمعته
عرفت شنهي گلبه اليبچي سكته

شگد بكربله ميته تمنيت
الف وتسعمية حسرة ظميت
محد يمسح دموعي من بچيت

الشامت عمداً حجايه سألها
هالراس لبرمحة منو يكلها

شماته يغث حجيها
كلت موتتي بيها
هاي الشام هاية
______
انه ادري هنانه موتي بهل الديار
بيها ضربوني بحجر حته الزغار
ذيچة نظرات الغرب نار وشرار
الما تمنيته يصير بحالي صار

العايش بالغرب موتته سهله
و فوگ جنازته ماتحظر اهله
حته بموتته هم يحس ذله

ايا مصيبتي المحد وصلها
جنازة بالغرب ماهم اهلها

محد يعتنيها
كلت موتتي بيها
هاي الشام هاية
______
حسين علي التقي