الشاعر حيدر عيسى البديري

دلللول دلللول يعبد الله يبني
————————
نامت عيون النجم وعيوني سهرانه
طول الليل بصبح سكتاته ويانه
كلمن بهمه مشه وكلمن عله مجانه
وانه يم حفره انحنيت وروحي خلصانه

دلللول دلللول يعبد الله يبني
—————————
بجفي هزيته التراب اوونت الساني
يمه يالجنك ورد غافي بحضن ثاني
جفوفك جفوفي شتهت شحجي بعد اني
يمه ردت الصدري الم خنگتني احزاني

دلللول دلللول يعبد الله يبني
————————
خالي كاروك واهز بعضاي واجروحي
سلوتي صار البچي وهمومي ونوحي
يمه عيدي وفرحتي لون طلعت روحي
كلشي ما ظل للفرح بس للحزن يوحي

دلللول دلللول يعبد الله يبني
————————
الموت ليش اختارك وخلاني من بعدك
يومه من گد هيبتك حتى السهم ودك
طير جنه ورفرفت لان الگمط شدك
يا ضوه عيوني شگلك غافي ابمهدك

دلللول دلللول يعبد الله يبني
————————
يا دمع يشفي الالم هو الضنه غالي
شلون واول ضحكتك تو لاحت گبالي
عيوني لو صبت حمم ما برد دلالي
غافي چن طلعت گمر شحجيلك احوالي

دلللول دلللول يعبد الله يبني
————————
حيدر عيسى البديري

١٧/٧/٢٠١٩

#القصيدة_الاولى_لعبد_الله_عليه_السلام

——————————
فز يالولد لتنام .. لا مو وكت نومه
لا مو وكت احلام .. تتركني ما لومه

اكعد ييمه لتنام خل انضر عيونك
يا دنيتي وضوه العين لا تطبگ جفونك
خل انضر ابّسمتك ادري اني ما هونك
ما ينبض الكلب ضال تدر انت مجنونك

نبضاته بس اهات .. من تبتعد صوته
من ما يحس نبضك .. ما ينبض بيومه

.....
انضر لمهدك خالي وبجفي اهز يبني
نار واحس وي روحي من ادفعه يشبني
ابني الجنت اريده بنص لحدي يدفني
كل لحضه اشوفه غافي يا ربي تكتلني

غافي انضر بنحره .. سهم وغفه بنومه
احجله ما يردلي .. وانضرله مهمومه
....
در صدري وبحنانك كل روحي مشتعله
ارويك اريدن يمه لا تنروي بنبله
يايمه رد كاروكك حضرته والكله
سولف لبوك يردك بأمي ارتوي گله

ماي ارتوي عيوني .. بس رد يبعد امك
من عيني اتروه .. ويمها اگطع الصومه
......
لو جاوبت شتگول من نحرك المذبوح
تحجيله عن جرحك لو دمك المسفوح
شتگلي خلته الماي لي ترتوي ومتلوح
گلي يماي العين جاوبني ردلي الروح

جاوبني عبد الله .. وانضرلي بعيونك
بس لا تسولفلي .. عن نحر وسهومه
...
يالگطعت دليلي جاوبني يا عمري
ما اگدر وبلياك والله انتهى صبري
صوتك اريد اسمع وبروحي خل يسري
عبد الله المن انغه والمن اگضي سهري

المن اهز مهدك .. ومن يغفه دللول
والمن اظل ليلي .. احسبله بنجومه

....
حيدر عيسى البديري

عبد الله الرضيع (ع)

عاينتله كبالي .. يعبد الله
يمه مهدك خالي .. يعبد الله

يعبد الله

————————————
راح اهز اجروحي يمه بالكي تغفه
ولو شينيمها يمه هواي كلفه
يمه من بعدك سنين العمر وسفه
شلون اشوفنك مدمه عيوني صلفه

كسرتها امالي .. يعبد الله
يمه مهدك خالي .. يعبد الله
يعبد الله

————————————
الزم اهدومك واشماً بيها عطرك
شلون اصدگ والله حيره خبر هجرك
حيل حيل زغير والله يمه عمرك
شگد يحفرولك ييمه شبر گبرك

والله لا ما غالي .. يعبد الله
يمه مهدك خالي .. يعبد الله

————————————
يمه در مني حليبي ودمع عيني
يمه ما حسبت افگدك يا حنيني
يمه كل يوم انه افكر من تجيني
لگبري ما فكرت تسبگلي سنيني

شنهو بعدك حالي .. يعبد الله
يمه مهدك خالي .. يعبد الله

————————————
يمه سهم الصاب نحرك ريته نحري
وگبل لا اشوفن منيتك خلص عمري
اه يمه شلون اوصف نار صدري
شلون اعيشن لحضه دونك انت تدري

حيره يبني الغالي .. يعبد الله
يمه مهدك خالي .. يعبد الله

————————————
يا نفس ريتي وضحكتي وحلم روحي
سهم نحرك يمه هيجلي جروحي
يمه علمني البواجي وكثر نوحي
وهدم امالي وعواليها صروحي

واختنگ دلالي .. يعبد الله
يمه مهدك خالي .. يعبد الله
—————————-
حيدر عيسى البديري

ثكيل رقيه ع

ارد انام ..ارد انام
——————
والينام شلون بس ذكروني
خايفه وشلون اغمض عيوني
هم انام ويرجع يضربوني
بيا مكان امشيله ويعيفوني

وبسلام .. ارد انام
——————
المشي تعبني الدروب بعيده
بويه اخذني وشفته مال وريده
شلت ايدي الرمحه ادور ايده
اني اريد وهو جفي يريده


والكلام .. ارد انام
——————
عمه كتلها التعب اذاني
بجت واسمعها اهمست باذاني
اكثر اني همومي واحزاني
گولي للعباس اگلج اني

بلا خيام .. ارد انام
——————
متني مهدوم الضرب كاتلني
شلون اعيش وانت مبعد عني
شكد غريبه احجي ولا تجاوبني
احس بعيونك الي تعاتبني

والاحلام ... ارد انام
——————
شويه وتنامين مو بالهيمه
بس خرابه لا سكن لا خيمه
يم حبيبج ذاك راعي الشيمه
طشت عندج جنه ملمس غيمه

نامي عام .. ارد انام
———————

مرقد الامام علي ع

١٥/٦/٢٠١٩
١٠:١٢ دقيقه صباحاً

🕋🕋🕋🕋🕋🕋🕋

ثگيل رقيه عليها السلام
—————
من اشرد بخطواتي اعثر
بحافر فرس من جدمي اكبر
اطيح .. وادمع العين
واصيح .. بويه يحسين
من اشرد بخطواتي اعثر
——————
بويه الحوافر ما تخليلي درب اشرد
ونيران الخيام بكفاي شما ردت ابعد
بويه وبعد سوطه عله متني واسمعه يعدد
وكلما عبر عشره عله متني بالعد يجدد

هم عشره فوگ متوني عده
ما بيه اشيلن متني هده

رحت .. عني لا وين
واصيح .. بويه يحسين

من اشرد بخطواتي اعثر
..........
كل حافر يعثرني اطيحاً وانظر لدربك
مو عادتك اندب باسمك وانتظر ردك
كل مره بويه من اهمس بانفاسي ما فرقك
تخلط انفاسك وي روحي واذبل بحبك

وي دم وريدي وعندي اگرب
مو عاده تخليني انحب

دموع .. فوگ خدين
واصيح .. بويه يحسين
من اشرد بخطواتي اعثر
..........
بويه سلب ترجيتي واذني دموم تسيل
چاوين جفك تجمع دمومي يبويه تشيل
لو تاخذ بجفي من اطيحاً انهض بيا حيل
نحلت اجدامي وعيني شافت جم مصيبه وويل

خيام وعطش ورماح وفراگ
خدر مشن تحملهن انياگ

مشيت .. گلبي صوبين
واصيح .. بويه يحسين
من اشرد بخطواتي اعثر
——-
بويه من اهيمن لو شردت اليا درب وجهي
راح اكعد عله الكاع اتاني تصيحلي باسمي
شو طولت گلبي اللچم يالغالي ارحمني
مضيع طريقك مثلي ما تندل تجي يمي

اگعد وادورك بين الدروب
گلب اليحب يندل المحبوب

الغرام .. جمع كلبين
واصيح .. بويه يحسين

من اشرد بخطواتي اعثر
..........
وصيتني وصيه بزغر كتلي يعافيتي
باجر يمر بينه وكت ينحز نفس ريتي
يبنيتي عينج ع الرمح لا تنسي وصيتي
دربج بدربي لا تتيهي لو نج مشيتي

بالغربه ما تتأمن الناس
بيها الخله من گلبه الاحساس

بعيد .. من تشردين
واصيح .. بويه يحسين
من اشرد بخطواتي اعثر
..........
حيدر عيسى البديري

7/7/2019

#القصيدة_الثالثة_لرقية_عليها_السلام
____________

عتاب الليله بالطف بين العيون
رقيه بعين ابوها ورمح مجنون
تصدله بنضره العين
تنادي بويه يحسين
عتاب
...
تعاينله وتصدله بكلب مفجوع
تحاجي عينها بشاطي من الدموع
يبويه الرمح وخره كليبي مشلوع
ورد جسمك اريد احضنها الضلوع

اريد احضن واشمن بويه الهدوم
تره كلبي عله عطرك حيل ملجوم
وتضمني بحرگه جفين
تنادي بويه يحسين
عتاب
....
تعال انزل اراويك اني المتون
تزورگ حتى صوتي ولون العيون
تجويني من اغمض بويه الجفون
ويحرگني السمع لما يسبون

من يسبوني اونناً وانضر عليك
فوگ الرمح راسك وانه احاجيك

تقبل كلبي نصين
تنادي بويه يحسين
عتاب
......
تگله عله التراجي تفر اذنها
تراوي دمها وتسمعله ونها
وتجر حسره تطيح الشمس منها
تون بيها اله وتطبگ جفنها

تشوفه ابين الاحلام انحنا الها
يقبلها ويشمها بدمعه هلها
تفز تصفگ الجفين
تنادي بويه يحسين
عتاب
....
تكله امسحلي راسي بجفك اهناه
مثل مسحت حميده وتدمع وياه
يبويه ادري يتيمه وتون فركاه
بعد عينك يبويه طفله والأه

اون بيها ومدامع هي سلواي
يبويه الليل الاكشر يسهر وياي

تعاين للرمح زين
تنادي بويه يحسين
عتاب

.....
اريد اطلب طلب واخر طلب هاي
وانت اختاري لبي وحده وياي
يبويه ما اريدا جربه لا ماي
ردت ترجيتي بويه وتمسح دماي


واذا جبت التراجي المحبس تجيب
بعد ماكو عذر عن عين لا تغيب

اريداً طلبتي الحين
تنادي بويه يحسين
عتاب

@@@@
حيدر عيسى البديري

#القصيدة_السادسة_لرقية_عليها_السلام

بويه سودني الدرب
حركت عيوني الغرب
بالخيم نيران اشوف
تهنه ما بين الطفوف
بويه سودني الدرب
.....
نار اصيحاً يالهواشم من يطفي المشتعل
سوده محتركات اديه سوده من لون الكحل
بويه اريداً يم خواتي عله عمتنه نجل
سوده خلاها المخيم الدنيا دربي ما ادل

من انوحاً يضربوني
دم جرت بويه عيوني

منين ارد ومنين اطب
بويه سودني الدرب

..........
ومني سلبوها التراجي بويه حيل تالمت
عاينت صوبك عيوني بويه يا بويه صحت
بويه جراها وجرحني ومن المها انه طحت
صحتك وما جاوبتني ريت يا بويه متت

كمت مشدوهه النضر
الجدمك اتلمس اثر

والدمع مني يصب
بويه سودني الدرب
........
هايمه ابين الجثث امشي اشماً ريحتك
خايفه جني يتيمه خاف اشوفاً جثتك
بويه امشي عليك زينب كوم لمني بصايتك
كضني بويه وردني بيدك خلني اشوفاً رايتك

كوم يابويه الي
خلي همي ينجلي

امسح اهموم الكلب
بويه سودني الدرب

......
بويه اخاف الليل تدري ومن يچل اركض الك
جنه سدل بويه وينك بساع لمني بمحملك
بحضنك تخليني اريداً وترد تضحك يم هلك
ارد احط شفتي عله خدك بويه وينك اسألك

كمت اتعثر واكوم
طالت عليه الهدوم

تدري بفراگك صعب
بويه سودني الدرب
.......
بويه شيب شعر راسي ووجهي غطاه التراب
والدمع جرح خدودي احمر بلون المصاب
اه يا عمري عله طولك زغير بس طولك غياب
انه يعقوب بمصابي ما بجه بكدي عتاب

ساعه عادل ونتي
شكد هموم بدنتي

نار من كلبي تهب
بويه سودني الدرب

.......
حيدر عيسى البديري

#القصيدة_الخامسة_لرقية_عليها_السلام
—————-

ملف ١٤

عندما انتهت المعركه وسكتت طبول الحرب ونزل اول خيط للضلام خرجت رقيه تبحث عن اباها

.... القصيده ....
بويه ضلمه الدنيا نورك طافي
وانه نار تلاعب وي أجتافي
وينك ارد اوصل الك
شسوت اعداك بهلك

بويه ضلمه الدنيا نورك طافي
......
كلي بويه بيا ارض خل اوصلك
واحط جفي بجفك وارد اسألك
افتح عيونك اريدن احجي الك
بويه وينك مبعد وعايف هلك

ضلمه ودروبك غريبه
موحشه وكلش گأيبه

خاف ما تعرف يبويه اوصافي
بويه ضلمه الدنيه نورك طافي
..........
بويه تدريني اخاف من الضلام
دلني دربك خل اجيلك يا امام
افرشلي صدرك فوكه اريداً بويه انام
شلون طير ونازل بعشه الحمام

وتمسح ادروب البواجي
خرطو مني التراجي

دلني دربك عني لا لتچافي
بويه ضلمه الدنيه نورك طافي
....
بويه وينك ارد انام عيونه حمره
وكلبي من اخيامنه بويه انه جمره
مات گلبي بفركتك واحترگ صبره
كلشي انسه وهسه اطيباً لواً نضره

عينك تناضر عليه
كلشي انسه وهاي هيه

بويه بس تنضرلي اشوفك كافي
بويه ضلمه الدنيا نورك طافي
......
بويه امسح راسي تعرفني يتيمه
بويه تدري الدنيا من دون اليمه
شلون حالي تايها بحاله هضيمه
بين الجيوش وجثث والله حريمه

تايها متيها ضواك
لحضه اريد اشتم هواك

اتجرحت رجلين جدمي الحافي
بويه ضلمه الدنيا نورك طافي
.......
ليش ما تتلكه اليضيف يجيك
للكرم وين الضوه لليعتنيك
يبن حيدر هلي واتلكه ابحجيك
وانه طفله وتهت وانه اتعنه ليك

اعرف شلون اعتنيك
افتح اعيونك واجيك

ليش غالگ عينك ٱنت وغافي
بويه ضلمه الدنيا نورك طافي

....

حيدر عيسى البديري

#القصيدة_الرابعة_لرقية_عليها_السلام
_____————

ناري عله نارك
وحرگولي دارك
بأول صبايا
طفت بمزارك
.....
بويه طفت عله الرمح وعليه قريت
الفاتحه بذاك الحزن يمه وبجيت
بويه غطيت الاذن لماً اجيت
خاف ازيدنك الم لو شاهديت

مسلوبه اذاني
والدم اعاني
اگعد ينايم
رجعلي ثارك
.....
بويه اول زاير يطوف بمقامك
ذايبه بحبك يبويه وبغرامك
وبالالم احجيلك واسمع كلامك
واول اليسمع يبويه ترد سلامك

من جرحي صوتي
يتمنه موتي
ومسبيه اگلك
وامشي بمسارك
.....
بويه بسياط انضرب من اعتنيك
وعينك تصدلي يبويه وعيني ليك
واحتمل اهي وعذابي وليك اجيك
امسح ادموعي عله رمحك جنها اديك

تمسح عيوني
تسكن جنوني
واغف بحنانك
وجف اعتذارك
.....
اغفه احس روحي بحلم يمك اطب
انضر بعينك نضر عاشك يحب
وتبتبسملي وابتسملك يا گلب
واسعه الك مدري امشي اطيراً عالدرب

تاخذني الاشواگ
لحضانك اشتاگ
تشتم واشمك
خليني جارك
انسه انتضارك
.....
بويه ما ضوك العذب بعدك نويت
اله من جفك وگبلي انت رويت
لو حرام بشفتي اضوگه وليه دنيت
خلني اموتاً ضاميه مثلك رجيت

يابويه مثلك
اتمنه كتلك
ماخذلي روحي
مثل انتصارك
....
حيدر عيسى البديري

#القصيدة_الثانية_لرقية_عليها_السلام
__________

رقيه ع مع الامام الحسين ع اثناء المسير ورؤيه رأس والدها الحسين ع على الرمح خاطبته ..
...

ليش جسمك من حديد ؟؟
لا له صدر ولا له ايد
امشي وانضرلك وانوح
بويه خنگتني الجروح
ليش جسمك من حديد ؟؟
........
وين صدرك .. ارد احضنك .. وارد انام .. والله كاتلني التعب
وين جفك .. ارد اكلفك .. ذاك ذاك .. اخذ ترجيتي بغضب
گبال عينك .. وصوتي وينك .. من اصيح .. سوطه وي متني لعب
يالغريب .. ما تجيب .. وينه جسمك .. موتي يابويه گرب

غمضت واتخيلك
احضني كمت ادنه الك
فوگ صدرك نومي اريد
ليش جسمك من حديد ؟؟
........
بويه لمني .. ضهري محني .. والله صعبه ..وانه كل طولي شبر
خل احضنك .. واشم منك .. عطر جسمك .. امنية اخر عمر
كلفه منك .. وانه بنتك .. من اطيحن .. ويكضي من روحي الصبر
ادنه ليه .. واخذ اديه .. من المشاگف .. مدري زرگه لو حمر

وين جفك جسمي شاط ؟؟
وبي تشاكفلي السياط
يمي بس طولك بعيد
ليش جسمك من حديد ؟؟
.....
بويه اسمعه .. وتهل دمعه .. من نضرني .. گلي يا ؟ سبني وبجيت
ودرت عيني .. وبأنيني .. اه بويه .. شو اشوفك ما اجيت
لا تجاوب .. ما اعاتب .. بس رموشك .. لمني بيها ارسمها بيت
تدري عمري .. والله تدري .. ما انامن .. اله من عطرك رويت

افرشلي ذرعانك الي
وكلي بنتي اتدللي
بسكتتك روحي تبيد
ليش جسمك من حديد ؟؟
.....
فرلي رمحك ..خل اجرحك .. شوف حالي .. راسي ابيض وانحنيت
اليوم عمره .. صار عشره .. من السنين .. كاس كل مر ارتويت
وشوف اذاني .. منها اعاني .. من سِحِبته .. من اخذ ترجيتي وبجيت
يهون لو مر .. بعد اكثر .. من الجرالي .. ولو حصل اكثر فديت

بس تفر عينك الي
رمشه بس لمحملي
احيه اردن من جديد
ليش جسمك من حديد ؟؟
.......
رد عليه .. شوف اديه .. من الحبال .. بادت ورادت تطيح
شوف جسمي .. نحل وأمَشِي .. وي النسيم .. اهتزت بهبت الريح
ونار بيه .. چن منيه .. من المخيم ..محد يطفي اليصيح
صحت بوبه .. وصحت خويه .. وصحت عمي .. ما سمع صوتي ذبيح

ظلمت بيه الشمس
وكمت اجودن بالنفس
همي البگلبي شديد
ليش جسمك من حديد؟؟
.......

حيدر عيسى البديري

#القصيدة_الاولى_للرقيه_ع
...............
لسان حال رقيه للامام الحسين ( عليهم السلام )

لعينك امد جفي
عن جفي لا تجفي
ادري بدموعك نار
يابويه ليه ندار
لعينك امد جفي
...........
اسرار الي بمسحت عيونك لا تطفيها
ادموع عينك بويه الي عيني تجويها
وارجع اجاوب للدمع دمعك احاجيها
لا لا تدير العين عني والله تعميها

يعماً عيوني بساع
انظرلي دون اوداع

انظر الك واحتار
يابويه اليه اندار
العينك امد جفي
.........
عمري زغيره ودمعك ايأذيني مااريده
ينزف بدمعك بويه كلبي ينزف وريده
ليش المنيه وانه طفله صارت بعيده
لو ميته بالطف والله كلبي ينحسب عيده

ولا ليه صار الصار
طفله ودليلي بنار


فرونه بالامصار
يابويه اليه اندار
لعينك امد جفي
.........
محتاجه اناماً واختنگ من ما اشوفنك
من الطشت راسك الي ديره ارد اشمنك
اشتم بنحرك يالابو وانحب وارد ونك
تقبل يبويه بنومتي اغفه واعوفنك

نومني يم نحرك
جاوبني عن صدرك

لا تخفي عني اسرار
يابويه اليه اندار
العينك امد جفي
................
راسك الخلو بالطشت راسي اقترب منه
وبغفوت احلامي المنيه شفت انه الجنه
وناصب عزه جبريل اشوفاً يرفع الونه
وهاي السبايه واهلي اشوف اگبالي تتهنه

بالجنه اشوف اهلي
وانت اللي اتهلي

امسح الي الاثار
يابويه اليه اندار
لعينك امد جفي

....
هاك بمنيتي احضني بويه وخل اسولفلك
لحضات الي بدرب ومسيري هوايه اوصفلك
ما تدري بيهن غافي بويه عله الرمح شفتك
من اشرتلك ما شفتني عله الاذن كتلك

عن التراجي احجي
ومن حسرتي ابجي

نادي يبويه الثار
يا بويه اليه اندار
لعينك امد جفي

.....

حيدر عيسى البديري

رقيه ع ورأس الحسين ع في الطشت
--------
بويه حرگو تدري من عدنه الخيام
وين صدرك ارد احط راسي وانام
عالطشت هم تغفه عين ؟؟
خد احط لو احط جبين !!
وين صدرك ارد احط راسي وانام
.....
ما اريدن ماي .. لا اريدك جاي .. راح اغمض بس اريدك بالحلم
احلف عله الراس .. ما اريد انفاس .. بس عله راسي جفوفك بويه لم
والطشت شيله .. لا يظله ليله .. ثالم گليبي من اشوفنه ثلم
تدري بخيامي .. يالرحت ضامي .. احتركت وظلينه تبره النه الزلم
بس اخذ روحي .. يا دوه جروحي .. لو اشوفن طولك ونحرك اشم

امنياتي وانه طفله وگلبي ليك
بأي وسيله وأي طريقه اردن اجيك
واندب بصوتي الحزين
خد احط لو احط جبين
وين صدرك ارود احط راسي وانام

.......
ذبلت عيوني .. من افتح جفوني .. بس طشت وعيونك مغمضات اشوف
امسح دموعك .. وادري ايلوعك .. تنزل ادموعي انت ما عندك جفوف
نحرك الدامي .. شهگ كدامي .. واسمع يسولفلي سطرها الحروف
گلي بس ودي .. خدچ بخدي ..
احط واغفه وروحي وي روحج تطوف

هاي بويه منيتي خد بخدي حاط
ما اگدر احني الضهر من السياط
حيلي ما ظل بي يعين
خد احط لو احط جبين
وينه صدرك ارد احط راسي وانام
....
مفطر شفافك .. والترب رافك .. مخضبه لحيتك دمه ووجهك حزين
غافيه عيونك .. والحزن لونك .. خدودك من صياطهم متملخين
بويه جاوبني .. ليش تاركني .. وياك اخذني وخل انامن يالحنين
سوطهم ياذي .. بالضرب ماذي .. وين ما موجود اخذني وياك وين

اجي ويمك عندي كل الامنيات
ظلمت من دونك بعيني الجهات
يمك ارد انسه الانين
خد احط لو احط جبين
وينه صدرك ارد احط راسي وانام
......
تدري البعمري .. اي اضن تدري .. تغفه بالاحضان ما تغفه بطشت
حيرتي حيره .. مصيبتي چبيره .. رغم ما عمر الورد والله حرت
شفايفك جمره .. ومتني الحمره .. بويه نفس الونه من عدهن صحت
ودمعك الهامل .. بالطشت نازل .. قسم لو تقبلني بطشتك نمت

بجفي احضننك مثل حضنك گبل
من تنيمني عله صدرك ما امل

جنت اسألك يالحنين
خد احط لو احط جبين
وين صدرك ارد احط راسي وانام
.....
عمه يا زينب .. كلبي يتعذب .. والدي هالحضه اريدنه يرد
ارد اشم نحره .. والثم بثغره .. واذبل بحضنه مثل ذبلت ورد
عمه اشوفنه .. اله احط حنه .. عله كل حايط كبر هذا البعد
وافتح گليبي .. وانهي تعذيبي .. والله بجفوفي عليه صدري اسد

اقفل ضلوعي عليه من السهام
خل يصيبن صدري اسهام اللئام
وتسمع بروحي حنين
خد احط لو احط جبين
وين صدرك ارد احط راسي وانام
.....

حيدر عيسى البديري